મહાભારત · અધ્યાય 1.59

ભૃગુવંશાત્પ્રભૃત્યેવ ત્વયા મે કીર્તિતં મહત્ ।
આખ્યાનમખિલં તાત સૌતે પ્રીતોઽસ્મિતેન તે ॥

પ્રક્ષ્યામિ ચૈવ ભૂયસ્ત્વાં યથાવત્સૂતનન્દન ।
યાઃ કથા વ્યાસસમ્પન્નાસ્તાશ્ચ ભૂયો વિચક્ષ્વ મે ॥

તસ્મિન્પરમદુષ્પારે સર્પસત્રે મહાત્મનામ્ ।
કર્માન્તરેષુ યજ્ઞસ્ય સદસ્યાનાં તથાઽધ્વરે ॥

યા બભૂવુઃ કથાશ્ચિત્રા યેષ્વર્થેષુ યથાતથમ્ ।
ત્વત્ત ઇચ્છામહે શ્રોતું સૌતે ત્વં વૈ પ્રચક્ષ્વ નઃ ॥
સૌતિરુવાચ ।

કર્માન્તરેષ્વકથયન્દ્વિજા વેદાશ્રયાઃ કથાઃ ।
વ્યાસસ્ત્વકથયચ્ચિત્રમાખ્યાનં ભારતં મહત્ ॥
શૌનક ઉવાચ ।

મહાભારતમાખ્યાનં પાણ્ડવાનાં યશસ્કરમ્ ।
જનમેજયેન પૃષ્ટઃ સન્કૃષ્ણદ્વૈપાયનસ્તદા ॥

શ્રાવયામાસ વિધિવત્તદા કર્માન્તરે તુ સઃ ।
તામહં વિધિવત્પુણ્યાં શ્રોતુમિચ્છામિ વૈ કથામ્ ॥

મનઃસાગરસમ્ભૂતાં મહર્ષેર્ભાવિતાત્મનઃ ।
કથયસ્વ સતાં શ્રેષ્ઠ સર્વરત્નમયીમિમામ્ ॥
સૌતિરુવાચ ।

હન્ત તે કથયિષ્યામિ મહદાખ્યાનમુત્તમમ્ ।
કૃષ્ણદ્વૈપાયનમતં મહાભારતમાદિતઃ ॥

શૃણુ સર્વમશેષેણ કથ્યમાનં મયા દ્વિજ ।
શંસિતું તન્મહાન્હર્ષો મમાપીહ પ્રવર્તતે ॥