મહાભારત · અધ્યાય 1.23

તં સમુદ્રમતિક્રમ્ય કદ્રૂર્વિનતયા સહ ।
ન્યપતત્તુરગાભ્યાશે ન ચિરાદિવ શીઘ્રગા ॥

તતસ્તે તં હયશ્રેષ્ઠં દદૃશાતે મહાજવમ્ ।
શશાઙ્કકિરણપ્રખ્યં કાલવાલમુભે તદા ॥

નિશામ્ય ચ બહૂન્વાલાન્કૃષ્ણાન્પુચ્છસમાશ્રિતાન્ ।
વિષણ્ણરૂપાં વિનતાં કદ્રૂર્દાસ્યે ન્યયોજયત્ ॥

તતઃ સા વિનતા તસ્મિન્પણિતેન પરાજિતા ।
અભવદ્દુઃખસન્તપ્તા દાસીભાવં સમાસ્થિતા ॥

એતસ્મિન્નન્તરે ચાપિ ગરુડઃ કાલ આગતે ।
વિના માત્રા મહાતેજા વિદાર્યાણ્ડમજાયત ॥

મહાસત્ત્વબલોપેતઃ સર્વા વિદ્યોતયન્દિશઃ ।
કામરૂપઃ કામગમઃ કામવીર્યો વિહન્ગમઃ ॥

અગ્નિરાશિરિવોદ્ભાસન્સમિદ્ધોઽતિભયન્કરઃ ।
વિદ્યુદ્વિસ્પષ્ટપિઙ્ગાક્ષો યુગાન્તાગ્નિસમપ્રભઃ ॥

પ્રવૃદ્ધઃ સહસા પક્ષી મહાકાયો નભોગતઃ ।
ઘોરો ઘોરસ્વનો રૌદ્રો વહ્નિરૌર્વ ઇવાપરઃ ॥

તં દૃષ્ટ્વા શરણં જગ્મુર્દેવાઃ સર્વે વિભાવસુમ્ ।
પ્રમિપત્યાબ્રુવંશ્ચૈનમાસીનં વિશ્વરૂપિણમ્ ॥

અગ્ને મા ત્વં પ્રવર્ધિષ્ઠાઃ કચ્ચિન્નો ન દિધક્ષસિ ।
અસૌ હિ રાશિઃ સુમહાન્સમિદ્ધસ્તવ સર્પતિ ॥
અગ્નિરુવાચ ।

નૈતદેવં યથા યૂયં મન્યધ્વમસુરાર્દનાઃ ।
ગરુડો બલવાનેષ મમ તુલ્યશ્ચ તેજસા ॥

જાતઃ પરમતેજસ્વી વિનતાનન્દવર્ધનઃ ।
તેજોરાશિમિમં દૃષ્ટ્વા યુષ્માન્મોહઃ સમાવિશત્ ॥

નાગક્ષયકરશ્ચૈ કાશ્યપેયો મહાબલઃ ।
દેવાનાં ચ હિતે યુક્તસ્ત્વહિતો દૈત્યરક્ષસામ્ ॥

ન ભીઃ કાર્યા કથં ચાત્ર પશ્યધ્વં સહિતા મયા ।
સૌતિરુવાચ ।
એવમુક્તાસ્તદા ગત્વા ગરુડં વાગ્ભિરસ્તુવન્ ॥

તે દૂરાદભ્યુપેત્યૈનં દેવાઃ સર્ષિગણાસ્તદા ।
દેવા ઊચુઃ ।
ત્વમૃષિસ્ત્વં મહાભાગસ્ત્વં દેવઃ પતગેશ્વરઃ ॥

ત્વં પ્રભુસ્તપનઃ સૂર્યઃ પરમેષ્ઠી પ્રજાપતિઃ ।
ત્વમિન્દ્રસ્ત્વં હયમુખસ્ત્વં શર્વસ્ત્વં જગત્પતિઃ ॥

ત્વં મુખં પદ્મજી વિપ્રસ્ત્વમગ્નિઃ પવનસ્તથા ।
ત્વં હિ ધાતા વિધાતા ચ ત્વં વિષ્ણુઃ સુરસત્તમઃ ॥

ત્વં મહાનભિભૂઃ શશ્વદમૃતં ત્વં મહદ્યશઃ ।
ત્વં પ્રભાસ્ત્વમભિપ્રેતં ત્વં નસ્ત્રાણમનુત્તમમ્ ॥

ત્વં ગતિઃ સતતં ત્વત્તઃ કથં નઃ પ્રાપ્નુયાદ્ભયમ્ । બલોર્મિમાન્સાધુરદીનસત્ત્વઃ
સમૃદ્ધિમાન્દુર્વિષહસ્ત્વમેવ । ત્વત્તઃ સૃતં સર્વમહીનકીર્તે હ્યનાગતં ચોપગતં ચ સર્વમ્ ॥

ત્વમુત્તમઃ સર્વમિદં ચરાચરં ગભસ્તિભિર્ભાનુરિવાવભાસસે ।
સમાક્ષિપન્ભાનુમતઃ પ્રભાં મુહુ- સ્ત્વમન્તકઃ સર્વમિદં ધ્રુવાધ્રુવમ્ ॥

દિવાકરઃ પરિકુપિતો યથા દહે- ત્પ્રજાસ્તથા દહસિ હુતાશનપ્રભ ।
ભયન્કરઃ પ્રલય ઇવાગ્નિરુત્થિતો વિનાશયન્યુગપરિવર્તનાન્તકૃત્ ॥

ખગેશ્વરં શરણમુપાગતા વયં મહૌજસં જ્વલનસમાનવર્ચસમ્ ।
તડિત્પ્રભં વિતિમિરમભ્રગોચરં મહાબલં ગરુડમુપેત્ય ખેચરમ્ ॥

પરાવરં વરદમજય્યવિક્રમં તવૌજસ સર્વમિદં પ્રતાપિતમ્ ।
જગત્પ્રભો તપ્તસુવર્ણવર્ચસા ત્વં પાહિ સર્વાંશ્ચ સુરાન્મહાત્મનઃ ॥

ભયાન્વિતા નભસિ વિમાનગામિનો વિમાનિતા વિપથગતિં પ્રયાન્તિ તે ।
ઋષેઃ સુતસ્ત્વમસિ દયાવતઃ પ્રભો મહાત્મનઃ ખગવર કશ્યપસ્ય હ ॥

સ મા ક્રુધઃ કુરુ જગતો દયાં પરાં ત્વમીશ્વરઃ પ્રશમમુપૈહિ પાહિ નઃ ।
મહાશનિસ્ફુરિતસમસ્વનેન તે દિશોઽમ્બરં ત્રિદિવમિયં ચ મેદિની ॥

ચલન્તિ નઃ ખગ હૃદયાનિ ચાનિશં નિગૃહ્યતાં વપુરિદમગ્નિસન્નિભમ્ ।
તવ દ્યુતિં કુપિતકૃતાન્તસન્નિભાં નિશામ્ય નશ્ચલતિ મનોઽવ્યવસ્થિતમ્ । પ્રસીદ નઃ પતગતે પ્રયાચતાં શિવશ્ચ નો ભવ ભગવન્સુખાવહઃ ॥
સૌતિરુવાચ ।

એવં સ્તુતઃ સુપર્ણસ્તુ દેવૈઃ સર્ષિગણૈસ્તદા ।
તેજસઃ પ્રતિસંહારમાત્મનઃ સ ચકાર હ ॥