મહાભારત · અધ્યાય 1.216

પાણ્ડવૈઃ સહ સંયોગં ગતસ્ય દ્રુપદસ્ય હ ।
ન બભૂવ ભયં કિઞ્ચિદ્દેવેભ્યોઽપિ કથઞ્ચન ॥

કુન્તીમાસાદ્ય તા નાર્યો દ્રુપદસ્ય મહાત્મનઃ ।
નામ સન્કીર્તયન્ત્યોઽસ્યા જગ્મુઃ પાદૌ સ્વમૂર્ધભિઃ ॥

કૃષ્ણા ચ ક્ષૌમસંવીતા કૃતકૌતુકમઙ્ગલા ।
કૃતાભિવાદના શ્વશ્ર્વાસ્તસ્થૌ પ્રહ્વા કૃતાઞ્જલિઃ ॥

રૂપલક્ષણસમ્પન્નાં શીલાચારસમન્વિતામ્ ।
દ્રૌપદીમવદત્પ્રેમ્ણા પૃથાશીર્વચનં સ્નુષામ્ ॥

યથેન્દ્રાણી હરિહયે સ્વાહા ચૈવ વિભાવસૌ ।
રોહિણી ચ યથા સોમે દમયન્તી યથા નલે ॥

યથા વૈશ્રવણે ભદ્રા વસિષ્ઠે ચાપ્યરુન્ધતી ।
યથા નારાયણે લક્ષ્મીસ્તથા ત્વં ભવ ભર્તૃષુ ॥

જીવસૂર્વીરસૂર્ભદ્રે બહુસૌખ્યસમન્વિતા ।
સુભગા ભોગસમ્પન્ના યજ્ઞપત્ની પતિવ્રતા ॥

અતિથીનાગતાન્સાધૂન્વૃદ્દાન્બાલાંસ્તથા ગુરૂન્ ।
પૂજયન્ત્યા યથાન્યાયં શશ્વદ્ગચ્છન્તુ તે સમાઃ ॥

કુરુજાઙ્ગલમુખ્યેષુ રાષ્ટ્રેષુ નગરેષુ ચ ।
અનુ ત્વમભિષિચ્યસ્વ નૃપતિં ધર્મવત્સલા ॥

પતિભિર્નિર્જિતામુર્વીં વિક્રમેણ મહાબલૈઃ ।
કુરુ બ્રાહ્મણસાત્સર્વામશ્વમેધે મહાક્રતૌ ॥

પૃથિવ્યાં યાનિ રત્નાનિ ગુણવન્તિ ગુણાન્વિતે ।
તાન્યાપ્નુહિ ત્વં કલ્યાણિ સુખિની શરદાં શતં ॥

યથા ચ ત્વાઽભિનન્દામિ વધ્વદ્ય ક્ષૌમસંવૃતામ્ ।
તથા ભૂયોઽભિનન્દિષ્યે જાતપુત્રાં ગુણાન્વિતાં ॥
વૈશમ્પાયન ઉવાચ ।

તતસ્તુ કૃતદારેભ્યઃ પાણ્ડુભ્યઃ પ્રાહિણોદ્ધરિઃ ।
વૈદૂર્યમણિચિત્રાણિ હૈમાન્યાભરણાનિ ચ ॥

વાસાંસિ ચ મહાર્હાણિ નાનાદેશ્યાનિ માધવઃ ।
કમ્બલાજિનરત્નાનિ સ્પર્શવન્તિ શુભાનિ ચ ॥

શયનાસનયાનાનિ વિવિધાનિ મહાન્તિ ચ ।
વૈદૂર્યવજ્રચિત્રાણિ શતશો ભાજનાનિ ચ ॥

રૂપયૌવનદાક્ષિણ્યૈરુપેતાશ્ચ સ્વલઙ્કૃતાઃ ।
પ્રેષ્યાઃ સમ્પ્રદદૌ કૃષ્ણો નાનાદેશ્યાઃ સ્વલઙ્કૃતાઃ ॥

ગજાન્વિનીતાન્ભદ્રાંશ્ચ સદશ્વાંશ્ચ સ્વલઙ્કૃતાન્ ।
રથાંશ્ચ દાન્તાન્સૌવર્ણૈઃ શુભ્રૈઃ પટ્ટૈરલઙ્કૃતાન્ ॥

કોટિશશ્ચ સુવર્ણં ચ તેષામકૃતકં તથા ।
વીથીકૃતમમેયાત્મા પ્રાહિણોન્મધુસૂદનઃ ॥

તત્સર્વં પ્રતિજગ્રાહ ધર્મરાજો યુધિષ્ઠિરઃ ।
મુદા પરમયા યુક્તો ગોવિન્દપ્રિયકામ્યયા ॥