મધ્યમકશાસ્ત્ર · અધ્યાય 13

13 સંસ્કારપરીક્ષા ત્રયોદશમં પ્રકરણમ્ ।
તન્મૃષા મોષધર્મ યદ્ભગવાનિત્યભાષત ।
સર્વે ચ મોષધર્માણઃ સંસ્કારાસ્તેન તે મૃષા

તન્મૃષા મોષધર્મ યદ્યદિ કિં તત્ર મુષ્યતે ।
એતત્તૂક્તં ભગવતા શૂન્યતાપરિદીપકમ્

ભાવાનાં નિઃસ્વભાવત્વમન્યથાભાવદર્શનાત્ ।
અસ્વભાવો ભાવો નાસ્તિ ભાવાનાં શૂન્યતા યતઃ

કસ્ય સ્યાદન્યથાભાવઃ સ્વભાવશ્ચેન્ન વિદ્યતે ।
કસ્ય સ્યાદન્યથાભાવઃ સ્વભાવો યદિ વિદ્યતે

તસ્યૈવ નાન્યથાભાવો નાપ્યન્યસ્યૈવ યુજ્યતે ।
યુવા ન જીર્યતે યસ્માદ્યસ્માજ્જીર્ણો ન જીર્યતે

તસ્ય ચેદન્યથાભાવઃ ક્ષીરમેવ ભવેદ્દધિ ।
ક્ષીરાદન્યસ્ય કસ્યાથ દધિભાવો ભવિષ્યતિ

યદ્યશૂન્યં ભવેત્કિંચિત્સ્યાચ્છૂન્યમિતિ કિંચન ।
ન કિંચિદસ્ત્યશૂન્યં ચ કુતઃ શૂન્યં ભવિષ્યતિ

શૂન્યતા સર્વદૃષ્ટીનાં પ્રોક્તા નિઃસરણં જિનૈઃ ।
યેષાં તુ શૂન્યતા દૃષ્ટિસ્તાનસાધ્યાન્ બભાષિરે