લિઙ્ગપુરાણ · અધ્યાય 1.108

દૃષ્ટો ઽસૌ વાસુદેવેન કૃષ્ણેનાક્લિષ્ટકર્મણા
ધૌમ્યાગ્રજસ્તતો લબ્ધં દિવ્યં પાશુપતં વ્રતમ્ ॥

કથં લબ્ધં તદા જ્ઞાનં તસ્માત્કૃષ્ણેન ધીમતા
વક્તુમર્હસિ તાં સૂત કથાં પાતકનાશિનીમ્ ॥

સ્વેચ્છયા હ્યવતીર્ણો ઽપિ વાસુદેવઃ સનાતનઃ
નિન્દયન્નેવ માનુષ્યં દેહશુદ્ધિં ચકાર સઃ ॥

પુત્રાર્થં ભગવાંસ્તત્ર તપસ્તપ્તું જગામ ચ
આશ્રમં ચોપમન્યોર્વૈ દૃષ્ટવાંસ્તત્ર તં મુનિમ્ ॥

નમશ્ચકાર તં દૃષ્ટ્વા ધૌમ્યાગ્રજમહો દ્વિજાઃ
બહુમાનેન વૈ કૃષ્ણસ્ ત્રિઃ કૃત્વા વૈ પ્રદક્ષિણમ્ ॥

તસ્યાવલોકનાદેવ મુનેઃ કૃષ્ણસ્ય ધીમતઃ
નષ્ટમેવ મલં સર્વં કાયજં કર્મ્મજં તથા ॥

ભસ્મનોદ્ધૂલનં કૃત્વા ઉપમન્યુર્મહાદ્યુતિઃ
તમગ્નિરિતિ વિપ્રેન્દ્રા વાયુરિત્યાદિભિઃ ક્રમાત્ ॥

દિવ્યં પાશુપતં જ્ઞાનં પ્રદદૌ પ્રીતમાનસઃ
મુનેઃ પ્રસાદાન્માન્યો ઽસૌ કૃષ્ણઃ પાશુપતે દ્વિજાઃ ॥

તપસા ત્વેકવર્ષાન્તે દૃષ્ટ્વા દેવં મહેશ્વરમ્
સાંબં સગણમવ્યગ્રં લબ્ધવાન્પુત્રમાત્મનઃ ॥

તદાપ્રભૃતિ તં કૃષ્ણં મુનયઃ સંશિતવ્રતાઃ
દિવ્યાઃ પાશુપતાઃ સર્વે તસ્થુઃ સંવૃત્ય સર્વદા ॥

અન્યં ચ કથયિષ્યામિ મુક્ત્યર્થં પ્રાણિનાં સદા
સૌવર્ણીં મેખલાં કૃત્વા આધારં દણ્ડધારણમ્ ॥

સૌવર્ણં પિણ્ડિકં ચાપિ વ્યજનં દણ્ડમેવ ચ
નરૈઃ સ્ત્રિયાથ વા કાર્યં મષીભાજનલેખનીમ્ ॥

ક્ષુરાઃ કર્તરિકા ચાપિ અથ પાત્રમથાપિ વા
પાશુપતાય દાતવ્યં ભસ્મોદ્ધૂલિતવિગ્રહૈઃ ॥

સૌવર્ણં રાજતં વાપિ તામ્રં વાથ નિવેદયેત્
આત્મવિત્તાનુસારેણ યોગિનં પૂજયેદ્બુધઃ ॥

તે સર્વે પાપનિર્મુક્તાઃ સમસ્તકુલસંયુતાઃ
યાન્તિ રુદ્રપદં દિવ્યં નાત્ર કાર્યા વિચારણા ॥

તસ્માદનેન દાનેન ગૃહસ્થો મુચ્યતે ભવાત્
યોગિનાં સંપ્રદાનેન શિવઃ ક્ષિપ્રં પ્રસીદતિ ॥

રાજ્યં પુત્રં ધનં ભવ્યમ્ અશ્વં યાનમથાપિ વા
સર્વસ્વં વાપિ દાતવ્યં યદીચ્છેન્મોક્ષમુત્તમમ્ ॥

અધ્રુવેણ શરીરેણ ધ્રુવં સાધ્યં પ્રયત્નતઃ
ભવ્યં પાશુપતં નિત્યં સંસારાર્ણવતારકમ્ ॥

એતદ્વઃ કથિતં સર્વં સંક્ષેપાન્ન ચ સંશયઃ
યઃ પઠેચ્છૃણુયાદ્વાપિ વિષ્ણુલોકં સ ગચ્છતિ ॥