લિઙ્ગપુરાણ · અધ્યાય 1.1

નમો રુદ્રાય હરયે બ્રહ્મણે પરમાત્મને
પ્રધાનપુરુષેશાય સર્ગસ્થિત્યન્તકારિણે ॥

નારદો ઽભ્યર્ચ્ય શૈલેશે શઙ્કરં સઙ્ગમેશ્વરે
હિરણ્યગર્ભે સ્વર્લીને હ્ય્ અવિમુક્તે મહાલયે ॥

રૌદ્રે ગોપ્રેક્ષકે ચૈવ શ્રેષ્ઠે પાશુપતે તથા
વિઘ્નેશ્વરે ચ કેદારે તથા ગોમાયુકેશ્વરે ॥

હિરણ્યગર્ભે ચન્દ્રેશે ઈશાન્યે ચ ત્રિવિષ્ટપે
શુક્રેશ્વરે યથાન્યાયં નૈમિષં પ્રયયૌ મુનિઃ ॥

નૈમિષેયાસ્તદા દૃષ્ટ્વા નારદં હૃષ્ટમાનસાઃ
સમભ્યર્ચ્યાસનં તસ્મૈ તદ્યોગ્યં સમકલ્પયન્ ॥

સો ઽપિ હૃષ્ટો મુનિવરૈર્ દત્તં ભેજે તદાસનમ્
સમ્પૂજ્યમાનો મુનિભિઃ સુખાસીનો વરાસને ॥

ચક્રે કથાં વિચિત્રાર્થાં લિઙ્ગમાહાત્મ્યમાશ્રિતામ્
એતસ્મિન્નેવકાલે તુ સૂતઃ પૌરાણિકઃ સ્વયમ્ ॥

જગામ નૈમિષં ધીમાન્ પ્રણામાર્થં તપસ્વિનામ્
તસ્મૈ સામ ચ પૂજાં ચ યથાવચ્ચક્રિરે તદા ॥

નૈમિષેયાસ્તુ શિષ્યાય કૃષ્ણદ્વૈપાયનસ્ય તુ
અથ તેષાં પુરાણસ્ય શુશ્રૂષા સમપદ્યત ॥

દૃષ્ટ્વા તમ્ અતિવિશ્વસ્તં વિદ્વાંસં રોમહર્ષણમ્
અપૃચ્છંશ્ચ તતઃ સૂતમ્ ઋષિં સર્વે તપોધનાઃ ॥

પુરાણસંહિતાં પુણ્યાં લિઙ્ગમાહાત્મ્યસંયુતામ્
ત્વયા સૂત મહાબુદ્ધે કૃષ્ણદ્વૈપાયનો મુનિઃ ॥

ઉપાસિતઃ પુરાણાર્થં લબ્ધા તસ્માચ્ચ સંહિતા
તસ્માદ્ભવન્તં પૃચ્છામઃ સૂત પૌરાણિકોત્તમમ્ ॥

પુરાણસંહિતાં દિવ્યાં લિઙ્ગમાહાત્મ્યસંયુતામ્
નારદો ઽપ્યસ્ય દેવસ્ય રુદ્રસ્ય પરમાત્મનઃ ॥

ક્ષેત્રાણ્યાસાદ્ય ચાભ્યર્ચ્ય લિઙ્ગાનિ મુનિપુઙ્ગવઃ
ઇહ સંનિહિતઃ શ્રીમાન્ નારદો બ્રહ્મણઃ સુતઃ ॥

ભવભક્તો ભવાંશ્ચૈવ વયં વૈ નારદસ્તથા
અસ્યાગ્રતો મુનેઃ પુણ્યં પુરાણં વક્તુમર્હસિ ॥

સફલં સાધિતં સર્વં ભવતા વિદિતં ભવેત્
એવમુક્તઃ સ હૃષ્ટાત્મા સૂતઃ પૌરાણિકોત્તમઃ ॥

અભિવાદ્યાગ્રતો ધીમાન્ નારદં બ્રહ્મણઃ સુતમ્
નૈમિષેયાંશ્ચ પુણ્યાત્મા પુરાણં વ્યાજહાર સઃ ॥

નમસ્કૃત્ય મહાદેવં બ્રહ્માણં ચ જનાર્દનમ્
મુનીશ્વરં તથા વ્યાસં વક્તું લિઙ્ગં સ્મરામ્યહમ્ ॥

શબ્દં બ્રહ્મતનું સાક્ષાચ્ છબ્દબ્રહ્મપ્રકાશકમ્
વર્ણાવયવમ્ અવ્યક્ત લક્ષણં બહુધા સ્થિતમ્ ॥

અકારોકારમકારં સ્થૂલં સૂક્ષ્મં પરાત્પરમ્
ઓઙ્કારરૂપમ્ ઋગ્વક્ત્રં સમજિહ્વાસમન્વિતમ્ ॥

યજુર્વેદમહાગ્રીવમ્ અથર્વહૃદયં વિભુમ્
પ્રધાનપુરુષાતીતં પ્રલયોત્પત્તિવર્જિતમ્ ॥

તમસા કાલરુદ્રાખ્યં રજસા કનકાણ્ડજમ્
સત્ત્વેન સર્વગં વિષ્ણું નિર્ગુણત્વે મહેશ્વરમ્ ॥

પ્રધાનાવયવં વ્યાપ્ય સપ્તધાધિષ્ઠિતં ક્રમાત્
પુનઃ ષોડશધા ચૈવ ષડ્વિંશકમ્ અજોદ્ભવમ્ ॥

સર્ગપ્રતિષ્ઠાસંહાર લીલાર્થં લિઙ્ગરૂપિણમ્
પ્રણમ્ય ચ યથાન્યાયં વક્ષ્યે લિઙ્ગોદ્ભવં શુભમ્ ॥