લક્ષ્મીતન્ત્રમ્ · અધ્યાય 55

પઞ્ચપઞ્ચાશોઽધ્યાયઃ - 55
શ્રીઃ---
આધારાન્ સંપ્રવક્ષ્યામિ શૃણુ ત્વં પાકશાસન।
અથ મેઢ્રાન્તરે મેઢ્રે નાભિમધ્યે ધનાધિપ

હૃદિ કૂપે ભ્રુવોર્મધ્યે ષટ્‌ પદ્માનિ સ્મરેદ્‌ બુધઃ।
વેદૈ રસૈઃ પ્રજાનાથૈરર્કૈશ્ચૈવ વિકારકૈઃ

અશ્વિબ્યાં ચ દલૈર્યુક્તાન્ સૂર્યકોટિસમપ્રભાન્।
કાદિતાન્તૈઃ સ્વરૈઃ સૂર્યવર્ણાન્તાભ્યાં ચ સંયુતાન્

પઙ્કજેષ્વેષુ માં દેવીં રત્નદીપાકૃતિં સ્મરેત્।
યત્ર યત્ર ભવેદ્વાઞ્છા તત્રસ્થો યોગમભ્યસેત્

પ્રથમાધારમારભ્ય દ્વાદશાન્તામ્બુજાતતામ્।
એકાં દીપાકૃતિં ધ્યાયેદ્દેહસ્થામાદિકાં પરામ્

ક્રમોત્ક્રમાભ્યાં સ્મરતસ્તામિમાં ચિન્મયીં પરામ્।
યદા લયં મનો યાતિ સા સત્તા વૈષ્ણવી પરા

દેહબન્ઘે ચ વાઞ્છા ચેદ્દેહં ત્વં મામકં શૃણુ।
એકસ્મિન્ હૃદયે તોયં માહેન્દ્રં મણ્ડપં સ્મરેત્

ચતુર્દ્વારયુતં તત્ર સંસ્મરેદ્ દ્વારપાલિકાઃ।
બલાકિનીં પુરઃ શ્યામાં વનમાલાં તથાપરે

શ્વેતાં વિબીષિકાં પશ્ચાદુક્તવર્ણામનુસ્મરેત્।
ઉત્તરે શાંકરીં શક્ર ધૂમ્રવર્ણામનુસ્મરેત્

તત્ર મણ્ડપમધ્યે તુ સહસ્રાદિત્યસંનિભમ્।
અષ્ટપત્રં સ્મરેત્ પદ્મં કર્ણિકાકેસરોજ્જ્વલમ્

પૂર્વે દલે વાસુદેવં સંકર્ષં ચૈવ દક્ષિણે।
પ્રદ્યુમ્નં પશ્ચિમે પત્રે ત્વનિરુદ્ધમથોત્તરે

શઙ્ખચક્રધરાન્ સર્વાન્ વનમાલાવિભૂષિતાન્।
યુગાનુસારિકાન્તીંશ્ચ સ્મરેદભિમુખાન્ મમ

ગુલ્ગુલું ચ ગુરુણ્યં ચ મદનં શલલં તથા।
ગજેન્દ્રાન્ સંસ્મરેત્ કોણે સુધાં મામભિષિઞ્ચતઃ

કર્ણિકાબીજમધ્યસ્થાં સર્વલોકમહેશ્વરીમ્।
માં સ્મરેત્તપ્તહેમાભાં પઙ્કજદ્વયધારિણીમ્

વરદાભયહસ્તાં ચ સર્વાભરણભૂષિતામ્।
અનિર્દેશ્યામનૌપમ્યાં વિષ્ણુપત્નીમનિન્દિતામ્

સ્મિતજ્યોત્સ્નાનુગૈર્દિવ્યૈરસિતાપાઙ્ગસંભવૈઃ।
સિઞ્ચન્તીં કિરણૈઃ શીતૈસ્તપ્તતપ્તં જગત્ત્રયમ્

ઉત્પાદ્ય જ્ઞાનતો ભોગાંસ્તૈર્યજેત્ પરમેશ્વરીમ્।
બ્રહ્માનન્દમયૈઃ સમ્યઙ્ મન્મયૈર્દોષવર્જિતૈઃ

યદ્વા નારાયણાઙ્કસ્થાં તત્સઙ્ગાહ્લાદભૂષિતામ્।
કરેણ દક્ષિણેનેશમાશ્લિષ્યન્તીં નિરન્તરમ્

પ્રતિપત્તિસ્તુ કર્તવ્યા તદા વૈમાનિકી તનૌ।
દાંપત્યં તદમીમાંસ્યમાવયોઃ શ્રુતિગહ્વરમ્