લક્ષ્મીતન્ત્રમ્ · અધ્યાય 54

ચતુષ્પઞ્ચાશોઽધ્યાયઃ - 54
શ્રીઃ---
ચતુરશ્રાં સમાં પીતાં વજ્રચિહ્નાં વસુંધરામ્।
મન્ત્રેણાકૃષ્ય દેહાન્તઃ સ્વસ્થાને ચ લયં નયેત્

ગન્ધમાત્રે તતસ્તચ્ચ સ્વબીજેનાસ્તમાનયેત્।
સ્વબીજેન નિવૃત્તૌ તાં સ્વમન્ત્રેણાસ્તમાનયેત્

મય્યધિષ્ઠાનભૂતાયાં માં ચ બાહ્યેઽમ્ભસિ ક્ષિપેત્।
મન્ત્રેણાર્ધેન્દુસંકાશં પદ્માઙ્કં તચ્ચ દેહતઃ

સ્વસ્થાનસ્થં લયં નીત્વા રસમાત્રે સ્વમન્ત્રતઃ।
મન્ત્રેણ તત્પ્રતિષ્ઠાયાં તચ્ચ મય્યાનયેલ્લયમ્

માં ચ વહ્નિમનાવૃત્ત્યા પ્રકૃત્યા ચ તતઃ ક્રમાત્।
સર્વત્ર નૈકં બુધ્યેત મચ્છક્તેર્વિલયં બુધઃ

યથા હિ સર્પિરાસિઞ્ચેત્ ક્ષીરે તન્મથનોદ્ભવમ્।
સર્પિરન્યત્ર ચ ક્ષીરે તત્સર્પિરપિ ચાન્યકમ્

એવમા પ્રકૃતેઃ શક્તિમધિષ્ઠાત્રીં સ્મરેદ્ બુધઃ।
એવં માં પરમાં શક્તિં શક્તિસપ્તકસંયુતામ્

દ્વાદશાન્તાન્તમુન્નીય મન્ત્રમય્યાં મયિ ક્ષિપેત્।
અગ્નીષોમાર્કકોટ્યાભા સર્વતોઽક્ષિશિરોમુખી

સર્વજીવોપકારાય સા મે મન્ત્રમયી તનુઃ।
શક્રઃ---
કાનિ સ્થાનાનિ દેહેઽસ્મિન્ યત્ર કાર્યો લયઃ ક્રમાત્

કીદૃશાનિ ચ બિમ્બાનિ ભૂરાદીનાં વદામ્બુજે।
શ્રીઃ---
આ જાનુતો ભુવઃ સ્થાનમા કટ્યાઃ પયસઃ સ્મૃતમ્

આ નાભેસ્તેજસઃ સ્થાનં વાયોઃ સ્થાનં તદા હૃદઃ।
આ કણ્ઠાન્નભસઃ સ્થાનમા બિલાચ્ચાપ્યહંકૃતેઃ

આ ભ્રુવોર્મહતઃ સ્થાનમાકાશે તુ પરં સ્મૃતમ્।
ચતુરશ્રં ભવેદ્બિમ્બં વજ્રાઙ્કં પાર્થિવં મહત્

અર્ધેન્દુસદૃશં શુક્લં પદ્માઙ્કં પયસઃ સ્મૃતમ્।
ત્રિકોણં સ્વસ્તિકાઙ્કં ચ રક્તં તેજસ ઉચ્યતે

ધૂમ્રં ષડ્‌બિન્દુસંયુક્તં વૃત્તં વાયવ્યમુચ્યતે।
અઞ્ચનાભં તથાકાશં બિમ્બમાત્રં સ્મૃતં પદમ્

એવં તત્ત્વોપસંહારે કૃતે હૃત્કોટરોદ્ગતમ્।
જ્ઞાનરજ્જ્વવલમ્બં ચ સુષુમ્નામધ્યમાર્ગગમ્

ઊર્ધ્વમાત્મન ઉન્નીય શક્તિસોપાનપઙ્‌ક્તિભિઃ।
દ્વાદશાન્તં મહાપદ્મમધ્યસ્થાયાં મયિ ક્ષિપેત્

દ્વાદશાન્તં મહાપદ્મં સહસ્રદલસંયુતમ્।
સૂર્યકોટિસહસ્રાભમિન્દુકોટ્યયુતપ્રભમ્

અગ્નીષોમદ્વયાન્તઃસ્થા મહાનન્દમયી તનુઃ।
અનિર્દેશ્યોપમા સંવિન્માયા સા મામિકા તનુઃ

અંશતઃ પ્રસરન્ત્યસ્યા જીવાનન્દા સરિદ્વરા।
સ્વાનન્દમેનમાનીય મહાનન્દમયીં નયેત્

તતો લવણકૂટાભં પિણ્ડમસ્મન્મુખોદ્ગતૈઃ।
મહાજ્વાલાવલીજાલૈશ્ચિન્મયૈઃ પરિતૌ દહેત્

રક્તતામરસઃ ષષ્ઠો બિન્દુમાન્ દેહપાવકઃ।
સોમમય્યા મમાસ્યોત્થૈઃ પીયૂષૈઃ પ્લાવયેત્તતઃ

સિસૃક્ષાયા મમોદ્યન્ત્યા સંવિત્પ્ર ણોપગૂઢયા।
પ્રેરિતાસ્તાઃ સ્મરેચ્છક્તીર્મન્ત્રમય્યાં તનૌ સ્થિતાઃ

તત્સતાભિઃ સ્વશક્તીભિશ્ચોદનદ્વારપૂર્વકમ્।
પ્રકૃત્યાદિ વિશેષાન્તં નિર્મિતં સંસ્મરેત્ ક્રમાત્

તતઃ પિણ્ડસમુત્પત્તિં કારણવ્યઞ્જનોજ્જ્વલમ્।
એવં પિણ્ડં સમુત્પાદ્ય શુદ્ધલક્ષ્મીમયં મહત્

પૂર્વોક્તગતિમાર્ગેણ વ્યુત્ક્રમેણાનયેદ્ધૃદિ।
મહાનન્દાત્ સ્વમાત્માનં સંવિદાનન્દલક્ષણમ્

તતઃ કરશરીરેષુ મન્ત્રન્યાસં સમાચરેત્।
અઙ્ગુષ્ઠાદિકનિષ્ઠાન્તમઙ્‌ગુલીસ્થેષુ પર્વસુ

તલયોઃ પૃષ્ઠયોશ્ચૈવ કરયોરુભયોરપિ।
નાભિતશ્ચાઙ્‌ઘ્રિપર્યન્તં નાભેરા મૂર્ધતસ્તથા

ન્યસ્ય સંધિષુ મદ્બીજં હૃદાદ્યઙ્ગાનિ ચ ન્યસેત્।
પુનર્હૃદાદિષટ્‌કેન નાભિપૃષ્ટકરોરુષુ

જઙ્ઘાપદોશ્ચ જ્ઞાનાદિ ષાડ્‌ગુણ્યં વિન્યસેદ્ બુધઃ।
એવમુત્પાદિતે દેહે શુદ્ધે લક્ષ્મીમયે શુભે।
આધારષટ્‌કવિન્યાસં જ્ઞાનદૃષ્ટ્યા સમાચરેત્

ઇતિ શ્રીપાઞ્ચરાત્રસારે લક્ષ્મીતન્ત્રોદ્ધારે તન્ત્રાર્થસંગ્રહે ચતુષ્પઞ્ચાશોઽધ્યાયઃ
********ઇતિ ચતુષ્પઞ્ચાશોઽધ્યાયઃ********