લક્ષ્મીતન્ત્રમ્ · અધ્યાય 35

પઞ્ચત્રિંશોઽધ્યાયઃ - 35
શ્રીઃ---
અન્તર્યાગાદિસિદ્ધ્યર્થં ભૂતશુદ્ધિં નિશામય।
કથ્યમાનં મયા શક્ર સાવધાનેન ચેતસા

1. ભૂતશુદ્ધિર્નામ સાધકસ્ય પ્રાકૃતદેહસ્થાનાં માંસમેદોઽસ્થિભૂયિષ્ઠાનાં ભૂતાનાં શુદ્ધીકરણમ્। તચ્ચ ભગવદારાધનયોગ્યતાસંપત્ત્યૈ। તત્પ્રકારશ્ચ પ્રાકૃતાનાં તેષાં સ્વસ્વકારણેષુ લયચિન્તનપૂર્વકં ભગવતિ સમર્પણં કૃત્વા પુનસ્તત્સકાશાત્ ભગવન્મયાપ્રાકૃતભૂતાવિર્ભાવપૂર્વકં તદારબ્ધદેહાવસ્થિતિભાવનમ્। એષા ચ ભૂતશુદ્ધિઃ સર્વૈરપિ તાન્ત્રિકૈઃ સ્વસ્વસમયાનુસારેણ સ્વસ્વતન્ત્રેષુ પ્રતિપાદિતા દૃસ્યતે।
પ્રકૃત્યન્તસ્ય પૃથ્વ્યાદેઃ કાદિભાન્તતયૈવ ચ।
મન્મયીકરણં બુદ્ધ્યા ભૂતશુદ્ધિરિહોચ્યતે

2. કાદિ ભાન્તમિતિ। કકારેણ પૃથિવી ભકારેણ પ્રકૃતિશ્ચ ગૃહ્યતે।
પૃથિવ્યાદિ પ્રકૃત્યન્તં યત્ પ્રકૃત્યષ્ટકં સ્થિતમ્।
સ્થૂલસૂક્ષ્મવિભેદેન તત્ર રૂપદ્વયં વિદુઃ

ચક્ષુર્ગોચરસંસ્થાનં સ્થૂલરૂપં તુ વર્ણ્યતે।
કારણાકારતા યત્ર તત્તુ તન્માત્રમુચ્યતે

સ્થૂલસૂક્ષ્મવિભેદેન તત્ત્વમેતદ્ દ્વિરષ્ટકમ્।
વિષયેન્દ્રિયવૃત્તીશ્ચ તત્ર તત્ર નિવેશયેત્

ઘ્રાણાદિ પાયૂપસ્થાદિ ગન્ધાદીતિ ત્રયં ત્રયમ્।
તન્માત્રવર્ગે પૃથ્વ્યાદૌ પ્રાતિલોમ્યાચ્છમં નયેત્

તરઙ્ગા જલધૌ યદ્વદસ્તં યાન્તિ સમીરણાત્।
વિષયેન્દ્રિયકલ્લોલા મહાભૂતમહોદધૌ

7. પૂર્વોક્તં લયં નિદર્શનમુખેનાહ---તરઙ્ગા ઇતિ।
સુસમીચીનયા બુદ્ધ્યા તદ્વદસ્તં નયેદ્ બુધઃ।
મનોઽભિમાન ઇત્યેતાવહંકારે શમં નયેત્

પ્રાણમધ્યવસાયં ચ બુદ્ધિતત્ત્વે નિબર્હયેત્।
સત્ત્વં રજસ્તમશ્ચૈવ ત્રૈગુણ્યં પ્રકૃતૌ નયેત્

યત્તત્ ત્રૈગુણ્યમવ્યક્તં કારણં મહદાદિકે।
ત્રૈગુણ્યં ચ પ્રસૂતિશ્ચ માયેત્યેતત્ ત્રિધા તુ તત્

10. ત્રૈગુણ્યમિતિ। એષાં ક્રમેણ પ્રધાનમવ્યક્તં તમ ઇત્યૌપનિષદૌ વ્યવહારઃ।
એવં તત્ત્વવિદાં જ્ઞેયા એતાઃ પ્રકૃતયો દશ।
સ્થૂલસૂક્ષ્મવિબેદેન તાઃ પુનર્વિંશતિઃ સ્મૃતાઃ

સ્થૂલાનાં પ્રકૃતીનાં તુ દશ મન્ત્રા ઇમે સ્મૃતાઃ।
તત્તત્સંજ્ઞા હુંફડન્તાસ્તારિકાદ્યા ધ્રુવાદિકાઃ

12. તત્તત્સંજ્ઞા ઇતિ। આદૌ પ્રણવઃ, તતસ્તારિકા, તતો ભૂતસંજ્ઞાઃ, તતો હું ફટ્। આહત્ય ઓં હ્નીં પૃથિવ્યૈ હું ફટ્ ઇતિ મન્ત્રઃ। જયાખ્યે તુ (10-15) તારિકાસ્થાને મન્ત્રાન્તરાણ્યુક્તાનિ।
માંસં મેદસ્તથા સ્મૃત્વા રસો વ્યોમાક્ષરત્રયમ્।
પરાત્ પરદ્વયં ચૈવ બિન્દુનાદવિભૂષિતમ્

દશાનાં સૂક્ષ્મરૂપાણાં શક્ત્યાદ્યાસ્તા નવ સ્મૃતાઃ।
દેહેષુ જીવભૂતા યાઃ શક્તયઃ પરસંજ્ઞિતાઃ

માયાવ્યોમયુતાનેતાન્ શક્ત્યાદીંસ્તદનુ સ્મરેત્।
નિવૃત્તિશ્ચ પ્રતિષ્ઠા ચ વિદ્યા શાન્તિસ્તથૈવ ચ

15. જીવશક્તીનાં નામાન્યાહ---નિવૃત્તિરિત્યાદિ।
શાન્ત્યતીતાભિમાના ચ પ્રાણા ગુણવતી તથા।
ગુણસૂક્ષ્મા નિર્ગુણા ચ એતાઃ સંજ્ઞાઃ ક્રમાત્ સ્મૃતાઃ

બીજાનાં દશકે તસ્મિન્ વહ્નિવિષ્ણ્વર્ધચન્દ્રકાન્।
સંયોજ્ય મન્ત્રાન્ જાનીયાદધિષ્ઠાત્રીગતાનિમાન્

17. વહ્નીત્યાદિ। રીં ઇત્યેતત્ સંયોજ્યેત્યર્થઃ।
ગન્ધશ્રીશ્ચ રસશ્રીશ્ચ રૂપશ્રીઃ સ્પર્શપૂર્વિકા।
શબ્દશ્રીરભિમાનશ્રીઃ પ્રાણશ્રીર્ગુણપૂવિકા

18. ગન્ધશ્રીરિત્યાદીનિ શક્તિનામાનિ।
તથૈવ ગુણસૂક્ષ્મશ્રીર્માયાશ્રીરિતિ સંજ્ઞયા।
અધિષ્ઠાત્ર્યોઽપિ વર્તન્તે શક્તયો દશકે મમ

એવં પરિકરં બુદ્ધ્વા ભૂતશુદ્ધિં સમાચરેત્।
સ્થાનશુદ્ધિં પુરા કુર્યાદ્યથા તદવધારય

20. પુરેતિ। ભૂતશુદ્ધેઃ પૂર્વમિત્યર્થઃ।
કાલાગ્ન્યર્કસહસ્રાભાં નિર્ધૂમાઙ્ગારસંનિભામ્।
માં સ્મૃત્વા મન્મુખોત્થેન વહ્નિના નિર્દહેદ્ભુવમ્

સોમાયુતાભમદ્વક્ત્રજેનાસિઞ્ચેદથામ્બુના।
સ્થાનશુદ્ધિર્ભવેદેવં ભૂતશુદ્ધિમથો શૃણુ

22. એવં નિર્દગ્ધસ્ય સ્થાનસ્ય પુનરુજ્જીવનમાહ---સોમેત્યાદિ।
ચતુરશ્રાં સમાં પીતાં વજ્રચિહ્નાં વસુંધરામ્।
મન્ત્રેણાકૃષ્ય દેહાન્તઃ સ્વસ્થાનસ્થાં લયં નયેત્

23. મન્ત્રેણેતિ। અત્ર મન્ત્રઃ શ્લાં ઇતિ જયાખ્યે ઉક્તઃ (10-17).
ગન્ધમાત્રે તતસ્તચ્ચ સ્વબીજેનાસ્તમાનયેત્।
મય્યધિષ્ઠાનભૂતાયાં માં ચ બાહ્યામ્ભસિ ક્ષિપેત્

મન્ત્રેણાર્ધેન્દુસંકાશં પદ્માઙ્કં તચ્ચ દૈવત્મ્।
સ્વસ્થાને વિલયં નીત્વા રસમાત્રે સ્વમન્ત્રતઃ

મન્ત્રેણ તં પ્રતિષ્ઠાપ્ય તચ્ચ મય્યાનયેલ્લયમ્।
માં ચ બાહ્યે ક્ષિપેદ્વહ્નાવામાયં તત્ક્રમસ્ત્વયમ્

26. મન્ત્રેણેતિ। ષ્વાં ઇતિ જયાખ્યે મન્ત્ર ઉક્તઃ। આમાયમિતિ। માયાપર્યન્તમિત્યર્થઃ।
સર્વત્ર નૈકં બુધ્યેત મચ્છક્તેર્વિલયં બુધઃ।
યથા હિ સર્પિરાસિઞ્ચેત્ ક્ષીરે તન્મથનોદ્ભવમ્

27. નૈકમિતિ। લયં સર્વત્રૈકવિધં ન બુધ્યેતેત્યન્વયઃ। તદેવ નિદર્શનમુખેનાહ--યથા હીતિ। તન્મથનોદ્ભવમિતિ સર્પિર્વિશેષણમ્।
સર્પિરન્યત્ર ચ ક્ષીરે તત્સર્પિષ્યપિ ચાન્યકમ્।
એવમા પ્રકૃતેઃ શક્તીરધિષ્ઠાત્રીઃ સ્મરેદ્ બુધઃ

એવં માં પરમાં શક્તિં નવશક્તિસમન્વિતામ્।
નિર્ગુણાન્તવિધાં ધ્યાતાં માયાધિષ્ઠાનકારિણીમ્

દશમીં તત્પરં નીત્વા શક્તિમેકાદશીં સ્થિતામ્।
મહાક્ષોભમયીં લક્ષ્મીં વ્યૂહાભ્યુદયરૂપિણીમ્

એકાદશીં ચ તાં નીત્વા દ્વાદશીં પરમાત્મિકામ્।
અનિર્દેશ્યામનૌપમ્યાં દ્વાદશીં તાં મયિ ક્ષિપેત્

એવં તાં પરમાં શક્તિં દ્વાદશીમશિલાત્મિકામ્।
દ્વાદશાન્તાન્તમુન્નીય વર્ણમય્યાં મયિ સ્મરેત્

32. દ્વાદશાન્તેતિ। મૂર્ધ્ન ઉપરિ માયાતો દ્વાદશાઙ્ગુલાદૂર્ધ્વં સ્થાનં દ્વાદશાન્તમિતિ સાંપ્રદાયિકો વ્યવહારઃ।
અગ્નીષોમાર્કકોટ્યાભા સર્વતોઽક્ષિશિરોમુખી।
ધારાસંતાનરૂપા મે સૂક્ષ્મા વર્ણમયી તનુઃ

33. વર્ણમયીં તનું વિશિનિષ્ટિ---અગ્નીત્યાદિ। ધારાસંતાનેતિ। અમૃતધારાસંતાનરૂપેત્યર્થઃ।
સર્વજીવોપકારાય સર્વસંભારસંભૃતા।
ઉદિતા સા પુરા વિષ્ણોર્મેઘાદ્વિદ્યુદિવોજ્જ્વલા

શક્રઃ---
કાનિ સ્થાનાનિ દેહેઽસ્મિન્ યત્ર કાર્યો લયઃ ક્રમાત્।
કીદૃશાનિ ચ બિમ્બાનિ ભૂમ્યાદીનાં વદામ્બુજે

શ્રીઃ---
આ જાનુતો ભુવઃ સ્થાનમા કટ્યાઃ પયસઃ સ્મૃતમ્।
આ નાભેસ્તેજસઃ સ્થાનં વાયોઃ સ્થાનં તદા હૃદઃ

આ કર્ણાન્નભસઃ સ્થાનમા બિલાચ્ચાપ્યહંકૃતેઃ।
આ ભ્રુવોર્મહતઃ સ્થાનમાકાશે તુ પરં સ્મૃતમ્

તતઃ પ્રાદેશમાત્રાગ્રે મૂર્ધતશ્ચતુરઙ્ગુલે।
સ્થાને પ્રકૃત્યાઃ શેષં તદઙ્ગુલીનાં દ્વિરષ્ટકમ્

38. પ્રકૃત્યાઃ સ્થાનમાકાશે આહ---તત ઇતિ। મૂર્ધ્નશ્ચતુરઙ્ગુલોર્ધ્વભાગે પ્રકૃત્યા અવસ્થાનમ્। તતઃ ષોડશાઙ્ગુલોપરિ ભાગે અવ્યક્તસ્યાવસ્થાનમ્।
એકાદશ્યાં દ્વિષટ્‌કાયાં સ્થાનં તત્ત્વક્ષરશ્રિયઃ।
ચતુરશ્રં ભવેદ્બિમ્બં વજ્રાઙ્કં પાર્થિવં મહત્

39. તત એકાદશાઙ્ગુલોપરિ ભાગે માયાસ્થાનમ્। તતો દ્વાદશાઙ્ગુલોપરિ ભાગે શબ્દબ્રહ્મસ્થાનમિતિ વિવેકઃ। ઇદમેવ દ્વાદશાન્તમિત્યુચ્યતે।
અર્ધેન્દુસદૃશં શુક્લં પદ્માઙ્કં પયસઃ સ્મૃતમ્।
ત્રિકોણં સ્વસ્તિકાઙ્કં ચ રક્તં તૈજસમુચ્યતે

ધૂમ્રં ષડ્‌બિન્દુસંયુક્તં વૃત્તં વાયવ્યમુચ્યતે।
અઞ્જનાભં તથાકાશં બિમ્બમાત્રં સ્મૃતં પરમ્

41. બિમ્બમાત્રમિતિ। પ્રધાનાદીનાં બિમ્બમાત્રમેવ। ન વર્ણાદિકમિત્યર્થઃ।
એવં તત્ત્વોપસંહારે કૃતે હૃત્કુહરોદ્ગતમ્।
જ્ઞાનરજ્જ્વવલમ્બં ચ સુષુમ્નામધ્યમાનુગપ્ત્

ઊર્ધ્વમાજાનુમુન્નીય શક્તિસોપાનપઙ્‌ક્તિભિઃ।
દ્વાદશાન્તાન્તરાજીવં મધ્યસ્થાયાં મયિ ક્ષિપેત્

43. મયિ ક્ષિપેદિતિ। દેહસ્ય દહનચિન્તને તદન્તઃસ્થજીવસ્યાપિ દહન્ચિન્તનપ્રસક્તૌ તન્નિવારણાય જીવસ્ય દેવ્યાં નિક્ષેપ ઉચ્યતે।
તદન્તે ચ મહાપદ્મં સહસ્રદલસંયુતમ્।
સૂર્યકોટિસહસ્રાભમિન્દુકોટ્યયુતપ્રભમ્

44. તદન્તે દ્વાદશાન્તે। મહાપદ્મમિતિ। અસ્તીતિ શેષઃ।
અગ્નીષોમમયાન્તઃસ્થા મહાનન્દમયી તનુઃ।
અનિર્દેશ્યોપમા સંવિન્મયી સા મામિકા પરા

અંશતઃ પ્રસરન્ત્યસ્યા જીવાનન્દા સરિદ્વરા।
સ્વાનન્દમેનમાનીય મહાનન્દમયીં નયેત્

46. અસ્યાઃ; મમ તન્વાઃ।
તતો લવણકૂટાભં પિણ્ડમસ્મન્મુખોદ્ગતૈઃ।
મહાજ્વાલૈર્મહાવેગૈશ્ચિન્મયૈઃ પરિતો દહેત્

47. જીવે દેહાન્નિર્ગમથ્ય દ્વાદશાન્તં પ્રાપિતે સતિ, દેહસ્ય દહનચિન્તનમુચ્યતે---તત ઇત્યાદિના। લવણકૂટાભમિતિ નિર્ગમિતજીવસ્ય દેહસ્ય નિર્દેશઃ।
યુક્તઃ સરસકઃ ષષ્ઠો બિન્દુમાન્ દાહપાવકઃ।
તારિકાનતિમધ્યસ્થો વિજ્ઞેયઃ શાસ્રચક્ષુષા

48. દાહકાગ્નિમન્ત્ર ઉચ્યતે। હ્રીં ર્થૂં નમ ઇતિ।
સોમમય્યા મમાસ્યોત્થૈઃ પીયૂષૈઃ પ્લાવયેત્તતઃ।
ચન્દ્રી સૂક્ષ્મસ્તુ સવ્યોમા પિણ્ડસ્યાપ્યાયને સ્મૃતઃ

49. પુનઃ અપ્રાકૃતદેહસંપત્તિચિન્તનમાહ--સોમમય્યા ઇતિ। તત્ર મન્ત્રઃ---ઠ્યં ઇતિ। જયાખ્યે તુ વ્સં ઇત્યુક્તઃ (10-78)।
સિસૃક્ષયા મયોદ્યત્યા સંવિત્પ્રાણોપગૂઢયા।
પ્રેરિતાસ્તાઃ સ્મરેચ્છક્તીર્વર્ણમય્યાં મયિ સ્થિતાઃ

તતસ્તાભિઃ સ્વશક્તીભિશ્ચોદનાદ્વારપૂર્વકમ્।
માયાદિ ક્ષિતિપર્યન્તં નિર્મિતં સંસ્મરેત્ ક્રમાત્

51. માયા પ્રધાનસ્ય સુસૂક્ષ્માવસ્થા; યાં તમ ઇત્યૌપનિષદા વદન્તિ।
તતઃ પિણ્ડસમુત્પત્તિં કરણવ્યઞ્જનોજ્જ્વલામ્।
એવં પિણ્ડં સમુત્પાદ્ય શુદ્ધલક્ષ્મીમયં મહત્

પૂર્વોક્તમાર્ગેણ તતો હૃદયં જીવમાનયેત્।
પિણ્ડભૂતાસ્રયો વર્ણા અનલઃ સોમચન્દ્રિણૌ

53. જીવમન્ત્રમાહ---પિણ્ડભૂતા ઇતિ। ર્ટ્સ ઇતિ જાતઃ। જયાખ્યેઽપ્યેવમેવોક્તઃ।
તારિકાનતિમદ્યસ્થા જીવમન્ત્ર ઉદાહૃતઃ।
વિશુદ્ધવિગ્રહસ્ત્વેવં મન્ત્રન્યાસં સમાચરેત્

અધિકારાય પૂજાયાં પૂજકાનાં મુદેઽપિ ચ।
નિબર્હણાય દૈત્યાદેવિગ્નાનાં વિજયાય ચ

ક્ષિતાવુપરિ વિન્યસ્તં યત્ પુરા ફલકાદિકમ્।
સ્વેન સ્વેન તુ મન્ત્રેણ તં મન્ત્રી પઞ્ચધા સ્મરેત્

આધારશક્તિકૂર્મોર્વીદુગ્ધાબ્ધ્યમ્બુજરૂપતઃ।
તાર્ક્ષ્યં તત્ર સ્થિતં ધ્યાયેત્ ખર્વબીજાત્મના સ્થિતમ્

57. ખર્વબીજમિતિ। ખમિત્યાકારકમિત્યર્થઃ।
તત્રોપવિશ્ય લક્ષ્મીશં રૂપં સ્વમનુચિન્ત્ય ચ।
દિશો નિબધ્ય ચાસ્રેણ પુનરેવં મુહુર્મુહુઃ

58. સ્વં રૂપમિતિ। "આત્મેતિ તૂપગચ્છન્તિ" ઇત્યુક્તરીત્યા સ્વાત્મકમિત્યર્થઃ।
શરજાલોપમં કૃત્વા પ્રાકારં ચાસનાદ્બહિઃ।
સપ્રાકારં તુ તત્ સ્થાનં કવચેનાવકુણ્ઠયેત્

59. અસ્રેણ; અસ્રમન્ત્રેણ વીર્યાયાસ્રાય ફડિત્યનેન। એવં કવચેન; કવચમન્ત્રેણ બલાય કવચાય હુમિત્યનેન।
ગગનસ્થૈરદૃશ્યં સ્યાદ્યથા ન્યાસં સમાચરેત્।
કરન્યાસં પુરા કૃત્વા દેહન્યાસં સમાચરેત્

અઙ્ગુષ્ઠે તારિકાં ન્યસ્યેત્તચ્છક્તીરઙ્ગુલીષુ તુ।
તર્જન્યાં તુ ન્યસેલ્લક્ષ્મીં મધ્યાયાં કીતિમપ્યથ

અનામાયાં જયાં માયાં કનિષ્ઠાયાં તતો ન્યસેત્।
સતારતારિકાસંજ્ઞાનત્યન્તસ્તન્મનુક્રમઃ

62. સતારેત્યાદિ। ઓં હ્રીં લક્ષ્મ્યૈ તર્જનીભ્યાં નમઃ ઇત્યાદિ પ્રકારેણેત્યર્થઃ।
કનિષ્ઠિકાદ્યાસુ તતો હૃદયાદીન્યનુક્રમાત્।
અઙ્ગાનિ પઞ્ચ વિન્યસ્ય નેત્રમઙ્ગેષુ સંસ્મરેત્

કૌસ્તુભં દક્ષિણતલે વનમાલાં તથાપરે।
દક્ષિણે મધ્યતઃ પદ્મં ન્યસેદ્વામતલેઽપિ ચ

64. અથ કરન્યાસઃ---કૌસ્તુભમિત્યાદિના। મધ્યતઃ; તલ ઇત્યર્થઃ।
અડ્કુશં દક્ષિણે ન્યસ્યેત્ પાશં વામતલે તથા।
અનેન વિધિના પૂર્વં હસ્તન્યાસં સમાચરેત્

તતસ્તુ વિગ્રહન્યાસં યથા કુર્યાત્તથા શૃણુ।
આ મૂર્ધ્નશ્ચરણાન્તં ચાચરણાચ્ચ શિરોઽવધિ

66. મૂર્ધાનમારભ્ય ચરણપર્યન્તં ચરણમારભ્ય મૂર્ધપર્યન્તં ચ દેહન્યાસમાહ---આ મૂર્ધ્ન ઇતિ।
તારકં તારિકાં ચૈવ તૌ ચ ચન્દ્રાતપોપમૌ।
વામસ્કન્ધે તતો લક્ષ્મીં ન્યસેત્કીર્તિં ચ દક્ષિણે

જયાં દક્ષિણપાણિસ્થાં માયા વામકરસ્થિતામ્।
નાસાન્તરે ચ હૃન્મન્ત્રં શિરોમન્ત્રં ચ મૂર્ધનિ

શિખાં ચૈવ શિખાસ્થાને સ્કન્ધયોઃ કવચં તતઃ।
વિન્યસ્ય નેત્રયોનેત્રમશ્રં પાણિતલદ્વયે

નાભૌ પૃષ્ટે કરદ્વન્દ્વ ઊરુજાનુપદેષુ ચ।
ન્યસેત્ સમ્યગુપાઙ્ગાનિ ત્રિયુગં મન્ત્રવિત્તમઃ

વક્ષઃસ્થં કૌસ્તુભં મધ્યે કણ્ઠે ચ વનમાલિકામ્।
પઙ્કજે કરયોર્ન્યસ્ય મન્ત્રમાવર્તયન્ દ્વિધા

વામહસ્તે તતઃ પાશમઙ્કુશં દક્ષિણે કરે।
પાદયોસ્તારિકાં સ્થૂલાં સૂક્ષ્માં ચૈવોપસંધિકે

ચરમાં બ્રહ્મરન્ધ્રે તુ મન્ત્રાણાં નાયિકા હિ સા।
ચન્દ્રિકાતપસંકાશં ન્યાસે ન્યાસે મનું સ્મરેત્

મનસા ભાવયેન્મુદ્રાસ્તત્ર તત્ર ચ સાધકઃ।
તારિકા યા પરા દેવી તયા વ્યાપ્તાનનુસ્મરેત્

વિન્યસ્તાન્ સકલાન્ મન્ત્રાન્ સર્વતઃ સંપ્લુતોદવત્।
એવં કૃતેઽનુસંધાને મન્ત્રાણાં ભિન્નવર્ત્મનામ્

અપામિવોદધિસ્થાનામેકીકારઃ પ્રજાયતે।
એવં ન્યાસે કૃતે મન્ત્રી સાક્ષાલ્લક્ષ્મીમયો ભવેત્

સર્વાધિકારભાગી સ્યાદાશ્રિત્ય ધ્યાનજં બલમ્।
ધ્યાયિનઃ સર્વસિદ્ધીનામાવિર્ભાવશ્ચ જાયતે

ન્યસ્તાઙ્ગો નિર્ભયસ્તિષ્ઠેદ્દેશે દુષ્ટસમાકુલે।
વિજયેતાપમૃત્યૂંશ્ચ સર્વાંશ્ચૈવૌપસર્ગિકાન્

ન્યસ્તાઙ્ગો વિધિવન્મન્ત્રી યથાશાસ્રેણ ચેતસા।
તનું મન્ત્રમયીં તાં તુ માં ધ્યાયેત્ પરમેશ્વરીમ્

અહં સ ભગવાન્ વિષ્ણુરહં લક્ષ્મીઃ સનાતની।
ઇત્યેવંભાવવાન્ યોગી ભૂયો નૈવ પ્રજાયતે

ઇતીયં ભૂતશુદ્ધિસ્તે યથાવચ્છક્ર વર્ણિતા।
અન્તર્યાગમથો વક્ષ્યે તત્ત્વતસ્તન્નિશામય

ઇતિ શ્રીપાઞ્ચરાત્રસારે લક્ષ્મીતન્ત્રે ભૂતશુદ્ધિપ્રકાશો નામ પઞ્ચત્રિંશોઽધ્યાયઃ
********ઇતિ પઞ્ચત્રિંશોઽધ્યાયઃ********