કૂર્મ પુરાણ · અધ્યાય 2.42

ઇતિ શ્રીકૂર્મપુરાણે ષટ્સાહસ્ત્ર્યાં સંહિતાયામુપરિવિભાગે એકચત્વારિંશો ઽધ્યાયઃ
સૂત ઉવાચ
અન્યચ્ચ તીર્થપ્રવરં જપ્યેશ્વરસમીપતઃ ।
નામ્ના પઞ્ચનદં પુણ્યં સર્વપાપપ્રણાશનમ્

ત્રિરાત્રોપોષિતસ્તત્ર પૂજયિત્વા મહેશ્વરમ્ ।
સર્વપાપવિશુદ્ધાત્મા રુદ્રલોકે મહીયતે

અન્યચ્ચ તીર્થપ્રવરં શઙ્કરસ્યામિતૌજસઃ ।
મહાભૈરવમિત્યુક્તં મહાપાતકનાશનમ્

તીર્થાનાં ચ પરં તીર્થં વિતસ્તા પરમા નદી ।
સર્વપાપહરા પુણ્યા સ્વયમેવ ગિરીન્દ્રજા

તીર્થં પઞ્ચતપં નામ શંભોરમિતતેજસઃ ।
યત્ર દેવાદિદેવેન ચક્રાર્થં પૂજિતો ભવઃ

પિણ્ડદાનાદિકં તત્ર પ્રેત્યાનન્તફલપ્રદમ્ ।
મૃતસ્તત્રાપિ નિયમાદ્ બ્રહ્મલોકે મહીયતે

કાયાવરોહણં નામ મહાદેવાલયં શુભમ્ ।
યત્ર માહેશ્વરા ધર્મા મુનિભિઃ સંપ્રવર્તિતાઃ

શ્રાદ્ધં દાનં તપો હોમ ઉપવાસસ્તથાક્ષયઃ ।
પરિત્યજતિ યઃ પ્રાણાન્ રુદ્રલોકં સ ગચ્છતિ

અન્યચ્ચ તીર્થપ્રવરં કન્યાતીર્થમિતિ શ્રુતમ્ ।
તત્ર ગત્વા ત્યજેત્ પ્રાણાંલ્લોકાન્ પ્રાપ્નોતિ શાશ્વતાન્

જામદગ્ન્યસ્ય તુ શુભં રામસ્યાક્લિષ્ટકર્મણઃ ।
તત્ર સ્નાત્વા તીર્થ વરે ગોસહસ્રફલં લભેત્

મહાકાલમિતિ ખ્યાતં તીર્થં ત્રૈલોક્યવિશ્રુતમ્ ।
ગત્વા પ્રાણાન્ પરિત્યજ્ય ગાણપત્યમવાપ્નુયાત્

ગુહ્યાદ્ ગુહ્યતમં તીર્થં નકુલીશ્વરમુત્તમમ્ ।
તત્ર સન્નિહિતઃ શ્રીમાન્ ભગવાન્ નકુલીશ્વરઃ

હિમવચ્છિખરે રમ્યે ગઙ્ગાદ્વારે સુશોભને ।
દેવ્યા સહ મહાદેવો નિત્યં શિષ્યૈશ્ચ સંવૃતઃ

તત્ર સ્નાત્વા મહાદેવં પૂજયિત્વા વૃષધ્વજમ્ ।
સર્વપાપૈર્વિમુચ્યેત મૃતસ્તજ્જ્ઞાનમાપ્નુયાત્

અન્યચ્ચ દેવદેવસ્ય સ્થાનં પુણ્યતમં શુભમ્ ।
ભીમેશ્વરમિતિ ખ્યાતં ગત્વા મુઞ્ચતિ પાતકમ્

તથાન્યચ્ચણ્ડવેગાયાઃ સંભેદઃ પાપનાશનઃ ।
તત્ર સ્નાત્વા ચ પીત્વા ચ મુચ્યતે બ્રહ્મહત્યયા

સર્વેષામપિ ચૈતેષાં તીર્થાનાં પરમા પુરી ।
નામ્નાવારાણસી દિવ્યા કોટિકોટ્યયુતાધિકા

તસ્યાઃ પુરસ્તાન્માહાત્મ્યં ભાષિતં વો મયા ત્વિહ ।
નાન્યત્ર લભ્યતે મુક્તિર્યોગિનાપ્યેકજન્મના

એતે પ્રાધાન્યતઃ પ્રોક્તા દેશાઃ પાપહરા નૃણામ્ ।
ગત્વા સંક્ષાલયેત્ પાપં જન્માન્તરશતૈઃ કૃતમ્

યઃ સ્વધર્માન્ પરિત્યજ્ય તીર્થસેવાં કરોતિ હિ ।
ન તસ્ય ફલતે તીર્થમહિ લોકે પરત્ર ચ

પ્રાયશ્ચિત્તી ચ વિધુરસ્તથા પાપચરો ગૃહી ।
પ્રકુર્યાત્ તીર્થસંસેવાં યે ચાન્યે તાદૃશા જનાઃ

સહાગ્નિર્વા સપત્નીકો ગચ્છેત્ તીર્થાનિ યત્નતઃ ।
સર્વપાપવિનિર્મુક્તો યથોક્તાં ગતિમાપ્નુયાત્

ઋણાનિ ત્રીણ્યપાકૃત્ય કુર્યાદ્ વા તીર્થસેવનમ્ ।
વિધાય વૃત્તિં પુત્રાણાં ભાર્યાં તેષુ નિધાય ચ

પ્રાયશ્ચિત્તપ્રસઙ્ગેન તીર્થમાહાત્મ્યમીરિતમ્ ।
યઃ પઠેચ્છૃણુયાદ્ વાપિ મુચ્યતે સર્વપાતકૈઃ