કૂર્મ પુરાણ · અધ્યાય 2.40

ઇતિ શ્રીકૂર્મપુરાણે ષટ્સાહસ્ત્ર્યાં સંહિતાયામુપરિવિભાગે એકોનચત્વારિશો ઽધ્યાયઃ
માર્કણ્ડેય ઉવાચ
તતો ગચ્છેત રાજેન્દ્ર ભૃગુતીર્થ મનુત્તમમ્ ।
તત્ર દેવો ભૃગુઃ પુર્વં રુદ્રમારાધયત્ પુરા

દર્શનાત્ તસ્ય દેવસ્ય સદ્યઃ પાપાત્ પ્રમુચ્યતે ।
એતત્ ક્ષેત્રં સુવિપુલં સર્વપાપપ્રણાશનમ્

તત્ર સ્નાત્વા દિવં યાન્તિ યે મૃતાસ્તે ઽપુનર્ભવાઃ ।
ઉપાનહોસ્તથા યુગ્મં દેયમન્નં સકાઞ્ચનમ્ ।
ભોજનં ચ યથાશક્તિ તદસ્યાક્ષયમુચ્યતે

ક્ષરન્તિ સર્વદાનાનિ યજ્ઞદાનં તપઃ ક્રિયા ।
અક્ષયં તત્ તપસ્તપ્તં ભૃગુતીર્થે યુધિષ્ઠિર

તસ્યૈવ તપસોગ્રેણ તુષ્ટેન ત્રિપુરારિણા ।
સાન્નિધ્યં તત્ર કથિતં ભૃગુતીર્થે યુધિષ્ઠિર

તતો ગચ્છેત રાજેન્દ્ર ગૌતમેશ્વરમુત્તમમ્ ।
યત્રારાધ્ય ત્રિશૂલાઙ્કં ગૌતમઃ સિદ્ધિમાપ્નુયાત્

તત્ર સ્નાત્વા નરો રાજન્ ઉપવાસપરાયણઃ ।
કાઞ્ચનેન વિમાનેન બ્રહ્મલોકે મહીયતે

વૃષોત્સર્ગં તતો ગચ્છેચ્છાશ્વતં પદમાપ્નુયાત્ ।
ન જાનન્તિ નરા મૂઢા વિષ્ણોર્માયાવિમોહિતાઃ

ધૌતપાપં તતો ગચ્છેદ્ ધૌતં યત્ર વૃષેણ તુ ।
નર્મદાયાં સ્થિતં રાજન્ સર્વપાતકનાશનમ્ ।
તત્ર તીર્થે નરઃ સ્નાત્વા બ્રહ્મહત્યાં વ્યપોહતિ

તત્ર તીર્થે તુ રાજેન્દ્ર પ્રાણત્યાગં કરોતિ યઃ ।
ચતુર્ભુજસ્ત્રિનેત્રશ્ચ હરતુલ્યબલો ભવેત્

વસેત્ કલ્પાયુતં સાગ્રં શિવતુલ્યપરાક્રમઃ ।
કાલેન મહતા જાતઃ પૃથિવ્યામેકરાડ્ ભવેત્

તતો ગચ્છેત રાજેન્દ્ર હંસતીર્થ મનુત્તમમ્ ।
તત્ર સ્નાત્વા નરો રાજન્ બ્રહ્મલોકે મહીયતે

તતો ગચ્છેત રાજેન્દ્ર સિદ્ધો યત્ર જનાર્દનઃ ।
વરાહતીર્થ માખ્યાતં વિષ્ણુલોકગતિપ્રદમ્

તતો ગચ્છેત રાજેન્દ્ર ચન્દ્રતીર્થમનુત્તમમ્ ।
પૌર્ણમાસ્યાં વિશેષેણ સ્નાનં તત્ર સમાચરેત્ ।
સ્નાતમાત્રો નરસ્તત્ર ચન્દ્રલોકે મહીયતે

તતો ગચ્છેત રાજેન્દ્ર કન્યાતીર્થમનુત્તમમ્ ।
શુક્લપક્ષે તૃતીયાયાં સ્નાનં તત્ર સમાચરેત્ ।
સ્નાતમાત્રો નરસ્તત્ર પૃથિવ્યામેકરાડ્ ભવેત્

દેવતીર્થ તતો ગચ્છેત્ સર્વદેવનમકૃતમ્ ।
તત્ર સ્નાત્વા ચ રાજેન્દ્ર દૈવતૈઃ સહ મોદતે

તતો ગચ્છેત રાજેન્દ્ર શિખિતીર્થમનુત્તમમ્ ।
યત્ તત્ર દીયતે દાનં સર્વં કોટિગુણં ભવેત્

તતો ગચ્છેત રાજેન્દ્ર તીર્થં પૈતામહં શુભમ્ ।
યત્તત્ર ક્રિયતે શ્રાદ્ધં સર્વં તદક્ષયં ભવેત્

સાવિત્રીતીર્થમાસાદ્ય યસ્તુ પ્રાણાન્ પરિત્યજેત્ ।
વિધૂય સર્વપાપાનિ બ્રહ્મલોકે મહીયતે

મનોહરં તુ તત્રૈવ તીર્થં પરમશોભનમ્ ।
તત્ર સ્નાત્વા નરો રાજન્ દૈવતૈઃ સહ મોદતે

તતો ગચ્છેત રાજેન્દ્ર માનસં તીર્થમુત્તમમ્ ।
સ્નાત્વા તત્ર નરો રાજન્ રુદ્રલોકે મહીયતે

સ્વર્ગબિન્દું તતો ગચ્છેત્તીર્થં દેવનમસ્કૃતમ્ ।
તત્ર સ્નાત્વા નરો રાજન્ દુર્ગતિં નૈવ ગચ્છતિ

અપ્સરેશં તતો ગચ્છેત્ સ્નાનં તત્ર સમાચરેત્ ।
ક્રીડતે નાકલોકસ્થો હ્યપ્સરોભિઃ સ મોદતે

તતો ગચ્છેત રાજેન્દ્ર ભારભૂતિમનુત્તમમ્ ।
ઉપોષિતોર્ઽચયેદીશં રુદ્રલોકે મહીયતે ।
અસ્મિંસ્તીર્થે મૃતો રાજન્ ગાણપત્યમવાપ્નુયાત્

કાર્તિકે માસિ દેવેશમર્ચયેત્ પાર્વતીપતિમ્ ।
અશ્વમેધાદ્ દશગુણં પ્રવદન્તિ મનીષિણઃ

વૃષભં યઃ પ્રયચ્છેત તત્ર કુન્દેન્દુસપ્રભમ્ ।
વૃષયુક્તેન યાનેન રુદ્રલોકં સ ગચ્છતિ

એતત્ તીર્થં સમાસાદ્ય યસ્તુ પ્રાણાન્ પરિત્યજેત્ ।
સર્વપાપવિશુદ્ધાત્મા રુદ્રલોકં સ ગચ્છતિ

જલપ્રવેશં યઃ કુર્યાત્ તસ્મિંસ્તીર્થે નરાધિપ ।
હંસયુક્તેન યાનેન સ્વર્ગલોકં સ ગચ્છતિ

એરણ્ડ્યા નર્મદાયાસ્તુ સંગમં લોકવિશ્રુતમ્ ।
તત્ર તીર્થં મહાપુણ્યં સર્વપાપપ્રણાશનમ્

ઉપવાસપરો ભૂત્વા નિત્યં વ્રતપરાયણઃ ।
તત્ર સ્નાત્વા તુ રાજેન્દ્ર મુચ્યતે બ્રહ્મહત્યયા

તતો ગચ્છેત રાજેન્દ્ર નર્મદોદધિસંગમમ્ ।
જમદગ્નિરિતિ ખ્યાતઃ સિદ્ધો યત્ર જનાર્દનઃ

તત્ર સ્નાત્વા નરો રાજન્ નર્મદોદધિસંગમે ।
ત્રિગુણં ચાશ્વમેધસ્ય ફલં પ્રાપ્નોતિ માનવઃ

તતો ગચ્છેત રાજેન્દ્ર પિઙ્ગલેશ્વરમુત્તમમ્ ।
તત્ર સ્નાત્વા નરો રાજન્ રુદ્રલોકે મહીયતે

તત્રોપવાસં યઃ કૃત્વા પશ્યેત વિમલેશ્વરમ્ ।
સપ્તજન્મકૃતં પાપં હિત્વા યાતિ શિવાલયમ્

તતો ગચ્છેત રાજેન્દ્ર આલિકાતીર્થમુત્તમમ્ ।
ઉપોષ્ય રજનીમેકાં નિયતો નિયતાશનઃ ।
અસ્ય તીર્થસ્ય માહાત્મ્યાન્મુચ્યતે બ્રહ્મહત્યયા

એતાનિ તવ સંક્ષેપાત્ પ્રાધાન્યાત્ કથિતાનિ તુ ।
ન શક્યા વિસ્તરાદ્ વક્તું સંખ્યા તીર્થેષુપાણ્ડવ

એષા પવિત્રા વિમલા નદી ત્રૈલોક્યવિશ્રુતા ।
નર્મદા સરિતાં શ્રેષ્ઠા મહાદેવસ્ય વલ્લભા

મનસા સંસ્મરેદ્યસ્તુ નર્મદાં વૈ યુધિષ્ઠિર ।
ચાન્દ્રાયણશતં સાગ્રં લભતે નાત્ર સંશયઃ

અશ્રદ્દધાનાઃ પુરુષા નાસ્તિક્યં ઘોરમાશ્રિતાઃ ।
પતન્તિ નરકે ઘોરે ઇત્યાહ પરમેશ્વરઃ

નર્મદાં સેવતે નિત્યં સ્વયં દેવો મહેશ્વરઃ ।
તેન પુણ્યા નદી જ્ઞેયા બ્રહ્મહત્યાપહારિણી