કૂર્મ પુરાણ · અધ્યાય 1.36

ઇતિ શ્રીકૂર્મપુરાણે ષટ્સાહસ્ત્ર્યાં સંહિતાયાં પૂર્વવિભાગે પઞ્ચત્રિંશો ઽધ્યાયઃ
માર્કણ્ડેય ઉવાચ
ષષ્ટિસ્તીર્થસહસ્ત્રાણિ ષષ્ટિસ્તીર્થશતાનિ ચ ।
માઘમાસે ગમિષ્યન્તિ ગઙ્ગાયમુનસંગમમ્

ગવાં શતસહસ્ત્રસ્ય સમ્યગ્ દત્તસ્ય યત્ ફલમ્ ।
પ્રયાગે માઘમાસે તુ ત્ર્યહં સ્નાતસ્ય તત્ ફલમ્

ગઙ્ગાયમુનયોર્મધ્યે કાર્ષાગ્નિં યસ્તુ સાધયેત્ ।
અહીનાઙ્ગો ઽપ્યરોગશ્ચ પઞ્ચેન્દ્રિયસમન્વિતઃ

યાવન્તિ રોમકૂપાણિ તસ્ય ગાત્રેષુ માનદ ।
તાવદ્ વર્ષસહસ્ત્રાણિ સ્વર્ગલોકે મહીયતે

તતઃ સ્વર્ગાત્ પરિભ્રષ્ટો જમ્બૂદ્વીપપતિર્ભવેત્ ।
સ ભુક્ત્વા વિપુલાન્ ભોગાંસ્તત્ તીર્થં ભજતે પુનઃ

જલપ્રવેશં યઃ કુર્યાત્ સંગમે લોકવિશ્રુતે ।
રાહુગ્રસ્તો યથા સોમો વિમુક્તઃ સર્વપાતકૈઃ

સોમલોકમવાપ્નોતિ સોમેન સહ મોદતે ।
ષષ્ટિં વર્ષસહસ્ત્રાણિ ષષ્ટિં વર્ષશતાનિ ચ

સ્વર્ગતઃ શક્રલોકે ઽસૌ મુનિગન્ધર્વસેવિતઃ ।
તતો ભ્રષ્ટસ્તુ રાજેન્દ્ર સમૃદ્ધે જાયતે કુલે

અધઃ શિરાસ્ત્વયોધારામુર્ધ્વપાદઃ પિબેન્નરઃ ।
શતં વર્ષસહસ્ત્રાણિ સ્વર્ગલોકે મહીયતે

તસ્માદ્ ભ્રષ્ટસ્તુ રાજેન્દ્ર અગ્નિહોત્રી ભવેન્નરઃ ।
ભુક્ત્વા તુ વિપુલાન્ ભોગાંસ્તત્ તીર્થં ભજતે પુનઃ

યઃ સ્વદેહં વિકર્તેદ્ વા શકુનિભ્યઃ પ્રયચ્છતિ ।
વિહગૈરુપભુક્તસ્ય શૃણુ તસ્યાપિ યત્ફલમ્

શતં વર્ષસહસ્ત્રાણિ સોમલોકે મહીયતે ।
તતસ્તસ્માત્ પરિભ્રષ્ટો રાજા ભવતિ ધાર્મિકઃ

ગુણવાન્ રૂપસંપન્નો વિદ્વાન્ સુપ્રિયવાક્યવાન્ ।
ભુક્ત્વા તુ વિપુલાન્ ભોગાંસ્તતતીર્થં ભજતે પુનઃ

ઉત્તરે યમુનાતીરે પ્રયાગસ્ય તુ દક્ષિણે ।
ઋણપ્રમોચનં નામ તીર્થં તુ પરમં સ્મૃતમ્

એકરાત્રોષિતઃ સ્નાત્વા ઋણૈસ્તત્ર પ્રમુચ્યતે ।
સૂર્યલોકમવાપ્નોતિ અનૃણશ્ચ સદા ભવેત્