કૂર્મ પુરાણ · અધ્યાય 1.26

ઇતિ શ્રીકૂર્મપુરાણે ષટ્સાહસ્ત્ર્યાં સંહિતાયાં પૂર્વવિભાગે પઞ્ચવિંશો ઽધ્યાયઃ
સૂત ઉવાચ
તતો લબ્ધવરઃ કૃષ્ણો જામ્બવત્યાં મહેશ્વરાત્ ।
અજીજનન્મહાત્માનં સામ્બમાત્મજમુત્તમમ્

પ્રદ્યુમ્નસ્યાપ્યભૂત્ પુત્રો હ્યનિરુદ્ધો મહાબલઃ ।
તાવુભૌ ગુણસંપન્નૌ કૃષ્ણસ્યૈવાપરે તનૂ

હત્વા ચ કંસં નરકમન્યાંશ્ચ શતશો ઽસુરાન્ ।
વિજિત્ય લીલયા શક્રં જિત્વા બાણં મહાસુરમ્

સ્થાપયિત્વા જગત્ કૃત્સ્નં લોકે ધર્માંશ્ચ શાશ્વતાન્ ।
ચક્રે નારાયણો ગન્તું સ્વસ્થાનં બુદ્ધિમુત્તમામ્

એતસ્મિન્નન્તરે વિપ્રા ભૃગ્વાદ્યાઃ કૃષ્ણમીશ્વરમ્ ।
આજગ્મુર્દ્વારકાં દ્રષ્ટું કૃતકાર્યં સનાતનમ્

સ તાનુવાચ વિશ્વાત્મા પ્રણિપત્યાભિપૂજ્ય ચ ।
આસનેષૂપવિષ્ટાન્ વૈ સહ રામેણ ધીમતા

ગમિષ્યે તત્ પરં સ્થાનં સ્વકીયં વિષ્ણુસંજ્ઞિતમ્ ।
કૃતાનિ સર્વકાર્યાણિ પ્રસીદધ્વં મુનીશ્વરાઃ

ઇદં કલિયુગં ઘોરં સંપ્રાપ્તમધુનાશુભમ્ ।
ભવિષ્યન્તિ જનાઃ સર્વે હ્યસ્મિન્ પાપાનુવર્તિનઃ

પ્રવર્તયધ્વં મજ્જ્ઞાનં બ્રાહ્મણાનાં હિતાવહમ્ ।
યેનેમે કલિજૈઃ પાપૈર્મુચ્યન્તે હિ દ્વિજોત્તમાઃ

યે માં જનાઃ સંસ્મરન્તિ કલૌ સકૃદપિ પ્રભુમ્ ।
તેષાં નશ્યતુ તત્ પાપં ભક્તાનાં પુરુષોત્તમે

યેર્ઽચયિષ્યન્તિમાં ભક્ત્યા નિત્યં કલિયુગે દ્વિજાઃ ।
વિધાના વેદદૃષ્ટેન તે ગમિષ્યન્તિ તત્ પદમ્

યે બ્રાહ્મણા વંશજાતા યુષ્માકં વૈ સહસ્ત્રશઃ ।
તેષાં નારાયણે ભક્તિર્ભવિષ્યતિ કલૌ યુગે

પરાત્ પરતરં યાન્તિ નારાયણપરાયણાઃ ।
ન તે તત્ર ગમિષ્યન્તિ યે દ્વિષન્તિ મહેશ્વરમ્

ધ્યાનં હોમં તપસ્તપ્તં જ્ઞાનં યજ્ઞાદિકો વિધિઃ ।
તેષાં વિનશ્યતિ ક્ષિપ્રં યે નિન્દન્તિ પિનાકિનમ્

યો માં સમાશ્રયેન્નિત્યમેકાન્તં ભાવમાશ્રિતઃ ।
વિનિન્દ્ય દેવમીશાનં સ યાતિ નરકાયુતમ્

તસ્માત્ સા પરિહર્તવ્યા નિન્દા પશુપતૌ દ્વિજાઃ ।
કર્મણા મનસા વાચા તદ્ભક્તેષ્વપિ યત્નતઃ

યે તુ દક્ષાધ્વરે શપ્તા દધીયેન દ્વિજોત્તમાઃ ।
ભવિષ્યન્તિ કલૌ ભક્તૈઃ પરિહાર્યાઃ પ્રયત્નતઃ

દ્વિષન્તો દેવમીશાનં યુષ્માકં વંશસંભવાઃ ।
શપ્તાશ્ચ ગૌતમેનોર્વ્યાં ન સંભાષ્યા દ્વિજોત્તમૈઃ

ઇત્યેવમુક્તાઃ કૃષ્ણેન સર્વ એવ મહર્ષયઃ ।
ઓમિત્યુક્ત્વા યયુસ્તૂર્ણંસ્વાનિ સ્થાનાનિ સત્તમાઃ

તતો નારાયણઃ કૃષ્ણો લીલયૈવ જગન્મયઃ ।
સંહૃત્ય સ્વકુલં સર્વં યયૌ તત્ પરમં પદમ્

ઇત્યેષ વઃ સમાસેન રાજ્ઞાં વંશો ઽનુકીર્તિતઃ ।
ન શક્યો વિસ્તરાદ્ વક્તું કિં ભૂયઃ શ્રોતુમિચ્છથ

યઃ પઠેચ્છૃણુયાદ્ વાપિ વંશાનાં કથનં શુભમ્ ।
સર્વપાપવિનિર્મુક્તઃ સ્વર્ગલોકે મહીયતે