Kramastotra · શ્લોક 21-29

તદિત્થં તે તિસ્રો નિજવિભવવિસ્ફારણવશાદ્ અવાપ્તાઃ ષટ્ચક્રક્રમકૃતપદં શક્તય ઇમાઃ ।
ક્રમાદ્ ઉન્મેષેણ પ્રવિદધતિ ચિત્રાં ભવદશામ્ ઇમાભ્યો દેવીભ્યઃ પ્રવણહૃદયઃ સ્યાં ગતભયઃ ॥

ઇમાં રુન્ધે ભૂમિં ભવભયભિદાતઙ્કકરણીમ્ ઇમાં બોધૈકાન્તદ્રુતિરસમયીમ્ ચાપિ વિદધે ।
તદિત્થં સંરોધં દ્રુતિમ્ અથ વિલુપ્યાશુભતતીર્ યથેષ્ટં ચાચારં ભજતિ લસતાં સા મમ હૃદિ ॥

ક્રિયાબુદ્ધ્યક્ષાદેઃ પરિમિતપદે માનપદવીમ્ અવાપ્તસ્ય સ્ફારં નિજનિજરુચા સંહરતિ યા ।
ઇયં માર્ત.ઙ્દસ્ય સ્થિતિપદયુજઃ સારમ્ અખિલમ્ હઠાદ્ આકર્ષન્તી કૃશતુ મમ ભેદં ભવભયાત્ ॥

સમગ્રામ્ અક્ષાલીં ક્રમવિરહિતા સાત્મનિ મુહુર્ નિવેશ્યાનન્તાન્તર્બહલિતમહારશ્મિનિવહા ।
પરા દિવ્યાનન્દં કલયિતુમ્ ઉદારાદરવતી પ્રસન્ના મે ભૂયાત્ હૃદયપદવીં ભૂષયતુ ચ ॥

પ્રમાણે સંલીને શિવપદલસદ્વૈભવવશાત્ શરીરપ્રાણાદિર્ મિતકૃતકમાતૃસ્થિતિમયઃ ।
યદા કાલોપાધિઃ પ્રલયપદમ્ આસાદયતિ તે તદા દેવી યાસૌ લસતિ મમ સા સ્યાચ્ છિવમયી ॥

પ્રકાશાખ્યા સંવિત્ ક્રમવિરહિતા શૂન્યપદતો બહિર્લીનાત્યન્તમ્ પ્રસરતિ સમાચ્છાદકતયા ।
તતો ઽપ્ય્ અન્તઃસારે ગલિતરભસાદ્ અક્રમતયા મહાકાલી સેયં મમ કલયતાં કાલમ્ અખિલમ્ ॥

તતો દેવ્યાં યસ્યાં પરમપરિપૂર્ણસ્થિતિજુષિ ક્રમં વિચ્છિદ્યાશુ સ્થિતિમતિરસાત્ સંવિદધતિ ।
પ્રમાણં માતારં મિતિમ્ અથ સમગ્રં જગદ્ ઇદં સ્થિતાં ક્રોડીકૃત્ય શ્રયતુ મમ ચિત્તં ચિતિમ્ ઇમામ્ ॥

અનર્ગલસ્વાત્મમયે મહેશે તિષ્ઠન્તિ યસ્મિન્ વિભુશક્તયસ્ તાઃ ।
તં શક્તિમન્તં પ્રણમામિ દેવં મન્થાનસંજ્ઞં જગદેકસારમ્ ॥

ઇત્થં સ્વશક્તિકિરણૌઘનુતિપ્રબન્ધાન્ આકર્ણ્ય દેવ યદિ મે વ્રજસિ પ્રસાદમ્ ।
તેનાશુ સર્વજનતાં નિજશાસનાંશુસંશાન્તિતાખિલતમઃપટલાં વિધેયાઃ ॥