Kramastotra · શ્લોક 1-20

અયં દુઃખવ્રાતવ્રતપરિગમે પારણવિધિર્ મહાસૌખ્યાસારપ્રસરણરસે દુર્દિનમ્ ઇદમ્ ।
યદ્ અન્યન્યક્કૃત્યા વિષમવિશિખપ્લોષણગુરોર્ વિભોઃ સ્તોત્રે શશ્વત્ પ્રતિફલતિ ચેતો ગતભયમ્ ॥

વિમૃશ્ય સ્વાત્માનં વિમૃશતિ પુનઃ સ્તુત્યચરિતં તથા સ્તોતા સ્તોત્રે પ્રકટયતિ ભેદૈકવિષયે ।
વિમૃષ્ટશ્ ચ સ્વાત્મા નિખિલવિષયજ્ઞાનસમયે તદિત્થં ત્વત્સ્તોત્રે ઽહમ્ ઇહ સતતં યત્નરહિતઃ ॥

અનામૃષ્ટઃ સ્વાત્મા ન હિ ભવતિ ભાવપ્રમિતિભાજ્ અનામૃષ્ટઃ સ્વાત્મેત્ય્ અપિ હિ ન વિના ઽમર્શનવિધેઃ ।
શિવશ્ ચાસૌ સ્વાત્મા સ્ફુરદ્ અખિલભાવૈકસરસસ્ તતો ઽહમ્ ત્વત્સ્તોત્રે પ્રવણહૃદયો નિત્યસુખિતઃ ॥

વિચિત્રૈર્ જાત્યાદિભ્રમણપરિપાટીપરિકરૈર્ અવાપ્તમ્ સાર્વજ્ઞં હૃદય યદ્ અયત્નેન ભવતા ।
તદ્ અન્તસ્ ત્વદ્બોધપ્રસરસરણીભૂતમહસિ સ્ફુટમ્ વાચિ પ્રાપ્ય પ્રકટય વિભોઃ સ્તોત્રમ્ અધુના ॥

વિધુન્વાનો બન્ધાભિમતભવમાર્ગસ્થિતિમ્ ઇમાં રસીકૃત્યાનન્તસ્તુતિહુતવહપ્લોષિતભેદામ્ ।
વિચિત્રસ્વસ્ફારસ્ફુરિતમહિમારમ્ભરભસાત્ પિબન્ ભાવાન્ એતાન્ વરદ મદમત્તો ઽસ્મિ સુખિતઃ ॥

ભવ પ્રાજ્યૈશ્વર્યપ્રથિતબહુશક્તેર્ ભગવતો વિચિત્રં ચારિત્રં હૃદયમ્ અધિશેતે યદિ તતઃ ।
કથં સ્તોત્રં કુર્યાદ્ અથ ચ કુરુતે તેન સહસા શિવૈકાત્મ્યપ્રાપ્તૌ શિવનતિર્ ઉપાયઃ પ્રથમકઃ ॥

જ્વલદ્રૂપં ભાસ્વત્પચનમ્ અથ દાહં પ્રકટનમ્ વિમુચ્યાન્યદ્ વહ્નેઃ કિમ્ અપિ ઘટતે નૈવ હિ વપુઃ ।
સ્તુવે સંવિદ્રશ્મીન્ યદિ નિજનિજાંસ્ તેન સ નુતો ભવેન્ નાન્યઃ કશ્ચિદ્ ભવતિ પરમેશસ્ય વિભવઃ ॥

વિચિત્રારમ્ભત્વે ગલિતનિયમે યઃ કિલ રસઃ પરિચ્છેદાભાવાત્ પરમપરિપૂર્ણત્વમ્ અસમમ્ ।
સ્વયં ભાસાં યોગઃ સકલભવભાવૈકમયતાવિરુદ્ધૈર્ ધર્મૌઘૈઃ પરચિતિર્ અનર્ઘોચિતગુણા ॥

ઇતીદૃક્ષૈર્ રૂપૈર્ વરદ વિવિધં તે કિલ વપુર્ વિભાતિ સ્વાંશે ઽસ્મિન્ જગતિ ગતભેદં ભગવતઃ ।
તદ્ એવૈતત્સ્તોતું હૃદયમ્ અથ ગીર્બાહ્યકરણપ્રબન્ધાશ્ ચ સ્યુર્ મે સતતમ્ અપરિત્યક્તરભસઃ ॥

તવૈવૈકસ્યાન્તઃ સ્ફુરિતમહસો બોધજલધેર્ વિચિત્રોર્મિવ્રાતપ્રસરણરસો યઃ સ્વરસતઃ ।
ત એવામી સૃષ્ટિસ્થિતિલયમયસ્ફૂર્જિતરુચાં શશાઙ્કાર્કાગ્નીનાં યુગપદ્ ઉદયાપાયવિભવાઃ ॥

અતશ્ ચિત્રાચિત્રક્રમતદિતરાદિસ્થિતિજુષો વિભોઃ શક્તિઃ શશ્વદ્ વ્રજતિ ન વિભેદં કથમ્ અપિ ।
તદ્ એતસ્યાં ભૂમાવ્ અકુલમ્ ઇતિ તે યત્ કિલ પદં તદેકાગ્રીભૂયાન્ મમ હૃદયભૂર્ ભૈરવ વિભો ॥

અમુષ્માત્ સંપૂર્નાત્ વત રસમહોલ્લાસસરસાન્ નિજાં શક્તિં ભેદં ગમયસિ નિજેચ્છાપ્રસરતઃ ।
અનર્ઘં સ્વાતન્ત્ર્યં તવ તદિદમ્ અત્યદ્ભુતમયીં ભવચ્છક્તિં સ્તુન્વન્ વિગલિતભયો ઽહં શિવમયઃ ॥

ઇદન્તાવદ્ રૂપં તવ ભગવતઃ શક્તિસરસં ક્રમાભાવાદ્ એવ પ્રસભવિગલત્ કાલકલનમ્ ।
મનઃશક્ત્યા વાચાપ્ય્ અથ કરણચક્રૈર્ બહિર્ અથો ઘટાદ્યૈસ્ તદ્રૂપં યુગપદ્ અધિતિષ્ઠેયમ્ અનિશમ્ ॥

ક્રમોલ્લાસં તસ્યાં ભુવિ વિરચયન્ ભેદકલનાં સ્વશક્તીનાં દેવ પ્રથયસિ સદા સ્વાત્મનિ તતઃ ।
ક્રિયાજ્ઞાનેચ્છાખ્યાં સ્થિતિલયમહાસૃષ્ટિવિભવાં ત્રિરૂપં ભૂયાસં સમધિશયિતું વ્યગ્રહૃદયઃ ॥

પુરા સૃષ્ટિર્ લીના હુતવહમયી યાત્ર વિલસેત્ પરોલ્લાસૌન્મુખ્યં વ્રજતિ શશિસંસ્પર્શસુભગા ।
હુતાશેન્દુસ્ફારોભયવિભવભાગ્ ભૈરવવિભો તવેયં સૃષ્ટ્યાખ્યા મમ મનસિ નિત્યં વિલસતામ્ ॥

વિસૃષ્ટે ભાવાંશે બહિર્ અતિશયાસ્વાદવિરસે યદા તત્રૈવ ત્વં ભજસિ રભસાદ્ રક્તિમયતામ્ ।
તદા રક્તા દેવી તવ સકલભાવેષુ નનુ માં ક્રિયાદ્ રક્તાપાનક્રમઘટિતગોષ્ઠીગતઘૃણમ્ ॥

બહિર્ વૃત્તિં હાતું ચિતિભુવમ્ ઉદારાં નિવસિતું યદા ભાવાભેદં પ્રથયસિ વિનષ્ટોર્મિચપલઃ ।
સ્થિતેર્ નાશં દેવી કલયતિ તદા સા તવ વિભો સ્થિતેઃ સાંસારિક્યાઃ કલયતુ વિનાશં મમ સદા ॥

જગત્સંહારેણ પ્રશમયિતુકામઃ સ્વરભસાત્ સ્વશઙ્કાતઙ્કાખ્યં વિધિમ્ અથ નિષેધં પ્રથયસિ ।
યમં સૃષ્ટ્વેત્થં ત્વં પુનર્ અપિ ચ શઙ્કાં વિદલયન્ મહાદેવી સેયં મમ ભવભયં સંદલયતામ્ ॥

વિલીને શઙ્કૌઘે સપદિ પરિપૂર્ણે ચ વિભવે ગતે લોકાચારે ગલિતવિભવે શાસ્ત્રનિયમે ।
અનન્તં ભોગ્યૌઘં ગ્રસિતુમ્ અભિતો લંપટરસા વિભો સંહારાખ્યા મમ હૃદિ ભિદાંશં પ્રહરતુ ॥

તદિત્થં દેવીભિઃ સપદિ દલિતે ભેદવિભવે વિકલ્પપ્રાણાસૌ પ્રવિલસતિ માતૃસ્થિતિર્ અલમ્ ।
અતઃ સંહારાંશમ્ નિજહૃદિ વિમૃશ્ય સ્થિતિમયી પ્રસન્ના સ્યાન્ મૃત્યુપ્રલયકરણી મે ભગવતી ॥