કરતોયામાહાત્મ્ય · શ્લોક 61-80

શૃણુધ્વં મુનયઃ સર્વે માહાત્મ્યં તજ્જલસ્ય ચ
બાહુદાયાશ્ ચ તીરે ઽસ્મિન્ જલં સર્વમલાપહમ્ ॥

ગઙ્ગા વા કરતોયા વા વિશેષો નાત્ર વિદ્યતે
હરમૂર્ધ્નિ સ્થિતા ગઙ્ગા સાપરા કરનિર્ગતા ॥

કરતોયે સદાનીરે સરિચ્છ્રેષ્ઠે સુવિશ્રુતે
પૌણ્ડ્રાન્ પ્લાવયસે નિત્યં પાપં હર કરોદ્ભવે
મન્ત્રેણાનેન વૈ સ્નાયાત્ કરતોયાજલે શુભે ॥

તત્તુલ્યરૂપાસ્તિ નદી ન કા ચિદ્ રજોવિહીના તરુણો યતો ઽસિ
ધન્યાસિ પુણ્યાસિ સરિદ્વરાસિ શ્રીકણ્ઠપાણિપ્રભવે નમસ્ તે ॥

સ્નાનાદ્ ઇયં કરજલા દુરિતાનિ હન્તિ જ્ઞાનં દદાતિ ભગવાન્ ઇહ તારકારિઃ ॥

બાહુદા બાહુદાનાચ્ ચ લિખિતસ્ય મુનેઃ પુરા
સદાનીરા મહાપુણ્યા શીતવાહિનિકા શુભા ॥

ઋષયો મુનયશ્ ચૈવ માર્કણ્ડેયો મહામુનિઃ
અશ્વત્થામા કપિવરો વાસુદેવઃ સ્વયં વિભુઃ ॥

ચતુર્મુખઃ પઞ્ચમુખઃ કરિમુખશ્ ચ ષણ્મુખઃ
સર્વે તે પશ્ચિમે ભાગે કરતોયાસરિત્તટે ॥

તિષ્ઠન્તિ તપસો હેતોઃ સદાનીરાજલાર્થિનઃ
રજોહીના મહાપુણ્યા વિશેષઃ સિંહભાસ્કરે ॥

કરતોયાસરિન્નીર પ્રાપ્તિમાત્રેણ સુન્દરિ
સ્નાનતર્પણમ્ આવશ્યં તદાપારં વિધીયતે ॥

અસ્નાત્વા ગચ્છતઃ પારં પૂર્વધર્મક્ષયો ભવેત્
સ્નાત્વા પીત્વા તથા નીરં પારાવારે ન દૂષયેત્ ॥

પૌણ્ડ્રક્ષેત્રં મહાપુણ્યં પ્લાવિતં કરસંભવૈઃ
તજ્જલસ્નાનમાત્રેણ વિષ્ણુપ્રીતિવિવર્ધનમ્ ॥

પૌણ્ડ્રક્ષેત્રાદ્ ઉત્તરે ચ યોજનદ્વયમ્ અન્તરા
તત્રાસ્તે ચણ્ડિકા દેવી લોહિની યત્ર મૃત્તિકા ॥

તદ્ધારે પ્રાર્થનામાત્રાત્ તુરગાન્ ભવનાનિ ચ
દદાતિ ચણ્ડિકા દેવી કરતોયાસરિત્તટે
અહો ક્ષેત્રસ્ય માહાત્મ્યાદ્ બ્રહ્મહત્યાં વ્યપોહતિ ॥

ચાણ્ડાલાન્ત્યજસંસ્પૃષ્ટં તીર્થતોયં ન પાવનમ્
વિહાય કરજાગઙ્ગા નર્મદાયમુનાજલમ્ ॥

ભાણ્ડાનીતજલેનાપિ સ્નાનં કુર્વન્તિ યે નરાઃ
પાપૌઘાન્ અવિશેષેણ મુઞ્ચન્તિ નાત્ર સંશયઃ ॥

કરતોયાજલે જ્ઞાના (અ)જ્ઞાનતઃ સ્નાતિ યો નરઃ
બ્રહ્મલોકમ્ અવાપ્નોતિ દિનપાપાન્ વિનશ્ય વૈ ॥

અજ્ઞાનેનાપિ કરજા જલં યે મનુજાઃ સકૃત્
દુર્વૃત્તાઃ પાપરહિતા પ્રપિબન્તિ ભવન્તિ તે ॥

અત્રૈવ પૌણ્ડ્રનગરે પુરુષાર્થસિદ્ધિર્ વારાણસી વ્યસનમ્ એવ પરં નરાણામ્
તત્રૈવ વિષ્ણુનિલયં સકલં ચ યજ્ઞો જ્ઞાનં સમાધિવિવિધં જપસાધ્યસિદ્ધિઃ ॥

કૃષ્ણવેણી તામ્રપર્ણી સરયૂર્ ગણ્ડકી તથા
વિષ્ણુપાદોદ્ભવા પુણ્યા યમુના ચ સરસ્વતી ॥