કલ્પદ્રુમાવદાનમાલા · શ્લોક 481-486

તસ્માદ્ અપાસ્ય કૃષ્ણાનિ કર્માણિ મિશ્રિતાનિ ચ
યતિતવ્યં શુભેષ્વ્ એવ કર્મસુ સુખવાઞ્છિભિઃ ॥

તથેતિ ભિક્ષવઃ શ્રુત્વા તે ચ લોકાઃ પ્રભાષિતાઃ
બુદ્ધવચોમૃતં પીત્વા નનન્દુર્ અનુમોદિતાઃ ॥

એવમ્ એતન્ મહારાજ શ્રુતં મે ગુરુભાષિતમ્*
ઇતિ મત્વા ત્વયા રાજન્ પરાત્મશુભવાઞ્છિના ॥

ક્રોધારિં યત્નતો જિત્વા ક્ષમાધર્મપુરસ્કૃતઃ
મૈત્રીં ભાવય સત્વેષુ સ્વાત્મજેષુ યથા સદા ॥

ઇતિ સુભાષિતં શ્રુત્વા ઉપગુપ્તસ્ય સદ્ગુરોઃ
તથેતિ નૃપરાજઃ સ નનન્દ સસભાજનઃ ॥

યે મૈત્રીભાવધર્મં કલિમતિહરણં તત્ સુભૂતેશ્ ચરિત્રં શૃણ્વન્તિ શ્રાવયન્તિ ત્રિભુવનસુખદં સંનિપાત્ય જનૌઘાન્*
તે લોકા મૈત્રચિત્તાસ્ ત્રિભુવનસુખદાઃ ક્ષાન્તિસૌરભ્યયુક્તાઃ યાતાઃ સૌખાવતીં તે ઽપ્ય્ અમિતરુચિમુનેર્ ધર્મમ્ આરાધયન્તિ ॥