કલ્પદ્રુમાવદાનમાલા · શ્લોક 1-20

અથાશોકો મહારાજઃ સર્વશોકવિનોદિતઃ
ઉપગુપ્તં ગુરું નત્વા કૃતાઞ્જલિપુટો ઽવદત્* ॥

ભદન્ત શ્રોતુમ્ ઇચ્છામિ પુનર્ અન્યત્ સુભાષિતમ્*
યદ્ ઉક્તં શાક્યસિંહેન તન્ મે ગદિતુમ્ અર્હસિ ॥

ઇતિ પૃષ્ટો નૃપેણાસાવ્ ઉપગુપ્તો યતીશ્વરઃ
પર્ષદં ચ સમાલોક્ય સંબભાષ સુભાષિતમ્* ॥

શૃણુ રાજન્ મહાબાહો સર્વલોકહિતાર્થતઃ
સુભૂતેર્ અવદાનં યત્ તત્ પ્રવક્ષ્યે યથાશ્રુતમ્* ॥

પુરા શ્રીભગવાન્ બુદ્ધો ધર્મરાજસ્ તથાગતઃ
વિદ્યાચરણસંપન્નઃ સુગતો લોકવિજ્જિનઃ ॥

શાસ્તા દેવમનુષ્યાણાં સમ્યક્સંબોધિદેશકઃ
સત્કૃતો માનિતઃ સત્વૈર્ ગુરુકૃતશ્ ચ પૂજિતઃ ॥

રાજભી રાજમાત્રૈશ્ ચ ધનિભિઃ પુરવાસિભિઃ
શ્રેષ્ઠિભિઃ સાર્થવાહૈશ્ ચ નાનાદેશસમાગતૈઃ ॥

દેવાસુરમહાનાગૈર્ યક્ષગન્ધર્વકિન્નરૈઃ
ગુરુડૈશ્ ચ મહાસર્પૈસ્ તથાન્યસત્વજાતિકૈઃ ॥

સુસંજ્ઞાતો મહાપુણ્યો લાભી ચીવરવાસસામ્*
પિણ્ડપાતાસનાદીનાં શય્યાદીનાં તથૈવ ચ ॥

ઔષધાદિપરિષ્કાર વસ્તૂનાં સર્વતઃ સદા
સાર્ધં સશ્રાવકૈઃ સંઘૈર્ ભિક્ષુભિશ્ ચ જિતેન્દ્રિયૈઃ ॥

ભિક્ષુણ્યુપાસિકાભિશ્ ચ ચેલકોપાસકૈસ્ તથા
બોધિસત્વમહાસત્વૈઃ સત્વાર્થબોધિવાઞ્છિભિઃ ॥

શ્રાવસ્ત્યાં રાજધાન્યાં વૈ જેતવને મનોરમે
વિહારે વ્યહરદ્ ધર્મં દેશયઞ્ છુભયસ્ સદા ॥

તદા ભગવતા સત્વ વિનયાનુગ્રહાર્થિના
આમન્ત્ર્ય ભિક્ષવઃ સર્વે સમ્યગાજ્ઞાપિતા ઇતિ ॥

ગચ્છત ભિક્ષવો યૂયં સત્વાનાં વિનયાર્થતઃ
દેશાન્ પ્રત્યભિગચ્છન્તઃ પ્રકાશયત સંવૃતિમ્* ॥

તથેત્ય્ એવ પ્રતિશ્રુત્ય શાસ્તુઃ પાદૌ પ્રણમ્ય ચ
શ્રાવકા ભિક્ષવશ્ ચૈવ પ્રતસ્થુસ્ તે નિયોગિનઃ ॥

ગુરો આજ્ઞાં વહન્તસ્ તે કેચિત્ પ્રાચીં દિશં ગતાઃ
દેશયન્તિ સ્મ સદ્ધર્મં પ્રતિદેશાનુપાસ્થિતાઃ ॥

દક્ષિણસ્યાં તથા કેચિત્ કેચિચ્ ચ પશ્ચિમાં દિશમ્*
તથોત્તરાં દિશં ગત્વા વિદિક્ષુ ચાપિ સર્વતઃ ॥

તેષાં ધ્યાનરતા યે વૈ તે વિવિક્તસુખૈષિણઃ
મેરોર્ ઉપરિષણ્ડાયામ્ અધ્યૂષુર્ ધ્યાનતત્પરાઃ ॥

તદાબ્ધેર્ ગરુડેનૈકો નાગપોતઃ સમુદ્ધૃતઃ
તમ્ આશ્રમમ્ ઉપાનીય ભક્ષિતુમ્ ઉપચક્રમે ॥

તત્રસ્થાસ્ તેન નાગેન ભિક્ષવો ધ્યાનસંરતાઃ
દૃષ્ટ્વૈવ સુપ્રસન્નેન મનસા પ્રણિધિર્ દધે ॥