કલિવિડમ્બન · શ્લોક 81-100

પ્રસ્થાસ્યમાનઃ પ્રવિશેત્ પ્રતિષ્ઠેત દિને દિને
વિચિત્રાન્ ઉલ્લિખેદ્ વિઘ્નાંસ્ તિષ્ઠાસુર્ અતિથિશ્ ચિરમ્ ॥

પ્રદીયતે વિદુષ્ય્ એકં કવૌ દશ નટે શતમ્
સહસ્રં દામ્ભિકે લોકે શ્રોત્રિયે તુ ન કિમ્ચન ॥

ઘટકં સમ્યગારાધ્ય વૈરાગ્યં પરમં વહેત્
તાવદ્ અર્થાઃ પ્રસિદ્ધ્યન્તિ યાવચ્ ચાપલમ્ આવૃતમ્ ॥

એકતઃ સર્વશાસ્ત્રાણિ તુલસીકાષ્ઠમ્ એકતસ્
વક્તવ્યં કિં ચિદ્ ઇત્ય્ ઉક્તં વસ્તુતસ્ તુલસી પરા ॥

વિસ્મૃતં વાહટેનેદં તુલસ્યાઃ પઠતા ગુણન્
વિશ્વસંમોહિની વિત્ત દાયિનીતિ ગુણદ્વયમ્ ॥

કૌપીનં ભસિતાલેપો દર્ભા+રુદ્રાક્ષમાલિકા
મૌનમ્ એકાસિકા ચેતિ મૂર્ખસંજીવનાનિ ષટ્ ॥

વાસઃ પુણ્યેષુ તીર્થેષુ પ્રસિદ્ધશ્ ચ મૃતો ગુરુસ્
અધ્યાપનાવૃત્તયશ્ ચ કીર્તનીયા ધનાર્થિભિસ્ ॥

મન્ત્રભ્રંશે સંપ્રદાયઃ પ્રયોગશ્ ચ્યુતસંકૃતૌ
દેશધર્મસ્ ત્વ્ અનાચારે પૃચ્છતાં સિદ્ધમ્ ઉત્તરમ્ ॥

યથા જાનન્તિ બહવો યથા વક્ષ્યન્તિ દાતરિ
તથા ધર્મં ચરેત્ સર્વં ન વૃથા કિં ચિદ્ આચરેત્ ॥

સદા જપપટો હસ્તે મધ્યે મધ્યે ઽક્ષિમીલનમ્
સર્વં બ્રહ્મેતિ વાદશ્ ચ સદ્યસ્પ્રત્યયહેતવસ્ ॥

આમધ્યાહ્નં નદીવાસઃ સમાજે દેવતાર્ચનમ્
સતતં શુચિવેષશ્ ચેત્ય્ એતદ્ દમ્ભસ્ય જીવિતમ્ ॥

તાવદ્ દીર્ઘં નિત્યકર્મ યાવત્ સ્યાદ્ દ્રષ્ટૃમેલનમ્
તાવત્સંક્ષિપ્યતે સર્વં યાવદ્ દ્રષ્ટા ન વિદ્યતે ॥

આનન્દબાષ્પરોમાઞ્ચૌ યસ્ય સ્વેચ્છાવશંવદૌ
કિં તસ્ય સાધનૈર્ અન્યૈઃ કિંકરાઃ સર્વપાર્થિવાસ્ ॥

દણ્ડ્યમાના વિકુર્વન્તિ લાલ્યમાનાસ્ તતસ્ તરામ્
દુર્જનાનામ્ અતો ન્યાય્યં દૂરાદ્ એવ વિસર્જનમ્ ॥

અદાનમ્ ઈષદ્દાનં ચ કિમ્ચિત્કોપાય દુર્ધિયામ્
સંપૂર્ણદાનં પ્રકૃતિર્ વિરામો વૈરકારણમ્ ॥

જ્યાયાન્ અસંસ્તવો દુષ્ટૈર્ ઈર્ષ્યાયૈ સંસ્તવઃ પુનસ્
અપત્યસંબન્ધવિધિઃ સ્વાનર્થાયૈવ કેવલમ્ ॥

જ્ઞાતેયં જ્ઞાનહીનત્વં પિશુનત્વં દરિદ્રતા
મિલન્તિ યદિ ચત્વારિ તદ્ દિશે ઽપિ નમો નમસ્ ॥

પરછિદ્રેષુ હૃદયં પરવાર્તાસુ ચ શ્રવસ્
પરમર્માસુ વાચં ચ ખલાનામ્ અસૃજદ્ વિધિસ્ ॥

વિષેણ પુચ્છલગ્નેન વૃશ્ચિકઃ પ્રાણિનામ્ ઇવ
કલિના દશમાંશેન સર્વઃ કાલો ઽપિ દારુણસ્ ॥

યત્ર ભાર્યાગિરો વેદા યત્ર ધર્મો ઽર્થસાધનમ્
યત્ર સ્વપ્રતિભા માનં તસ્મૈ શ્રીકલયે નમસ્ ॥