કાલિકાપુરાણમ્ · અધ્યાય 71

॥શ્રીભગવાનુવાચ॥
પ્રસાય દક્ષિણં હસ્તં સ્વયં નમ્રશિરાઃ પુનઃ।
દક્ષિણં દર્શયત્ પાર્શ્વં મનસાપિ ચ દક્ષિણઃ

સકૃત્ ત્રિર્વા વેષ્ટયેયુર્દૈવ્યાઃ પ્રીતિઃ પ્રજાયતે।
સ ચ પ્રદક્ષિણો જ્ઞેયઃ સર્વદેવૌઘતુષ્ટિદઃ

અષ્ટોત્તરશતં યસ્તુ દેવ્યાઃ કુર્યાત્ પ્રદક્ષિણમ્।
સ સર્વકામમાસાદ્ય પશ્ચાન્મોક્ષમવાપ્નુયાત્

મનસાપિ ચ યો દદ્યાદ્ દેવ્યૈ ભક્ત્યા પ્રદક્ષિણમ્।
પ્રદક્ષિણાદ્ યમગૃહે નરકાણિ ન પશ્યતિ

કાયિકો વાગ્ભવશ્ચૈવ માનસસ્ત્રિવિધિઃ સ્મૃતઃ।
નમસ્કારઃ શ્રુતસ્તજ્જ્ઞૈરુત્તમાધમમધ્યમઃ

પ્રસાર્ય પાદૌ હસ્તો ચ પતિત્વા દણ્ડવત્ ક્ષિતૌ।
જાનુભ્યામવર્નિ ગત્વા શિરસાસ્પૃશ્ય મેદિનીમ્

ક્રિયતે યો નમસ્કાર ઉત્તમઃ કાયિકસ્તુ સઃ।
જાનુભ્યાં ચ ક્ષિતિં સ્પૃષ્ટ્વા શિરસાસ્પૃશ્ય મેદિનીમ્

ક્રિયતે યો નમસ્કારો મધ્યમઃ કાયિકઃ સ્મૃતઃ।
પુટીકૃત્ય કરૌ શીર્ષે દીયતે યદ્ યથા તથા।
અસ્પૃષ્ટ્વા જાનુશીર્ષાભ્યાં ક્ષિતિં સોઽધમ ઉચ્યતે

યા સ્વયં ગદ્યપદ્યાભ્યાં ઘટિતાભ્યાં નમસ્કૃતિઃ।
ક્રિયતે ભક્તિયુક્તેન વાચિકસ્તૂત્તમસ્તુ સઃ

પૌરાણિકૈર્વૈદિકૈર્વા મન્ત્રૈર્વા ક્રિયતે નતિઃ।
સ મધ્યમો નમસ્કારો ભવેદ્ વાચનિકઃ સદા

યત્ તુ માનુષ્યવાક્યેન નમનં ક્રિયતે સદા।
સ વાચિકોઽધમો જ્ઞેયો નમસ્કારેષુ પુત્રકૌ

ઇષ્ટમધ્યાનિષ્ટગતૈર્મનોભિસ્ત્રિવિધં પુનઃ।
નમનં માનસં પ્રોક્તમુત્તમાધમમધ્યમમ્

ત્રિવિધે ચ નમસ્કારે કાયિકશ્ચોત્તમઃ સ્મૃતઃ।
કાયિકૈસ્તુ નમસ્કારૈર્દેવાસ્તુષ્યન્તિ નિત્યશઃ

અયમેવ નમસ્કારો દણ્ડાદિપ્રતિનામભિઃ ।
પ્રણામ ઇતિ વિજ્ઞેયઃ સ પૂર્વં પ્રતિપાદિતઃ

નૈવેદ્યેન ભવેત્ સર્વં નૈવેદ્યનામૃતં ભવેત્।
ધર્માર્થકામમોક્ષાશ્ચ નૈવેદ્યષુ પ્રતિષ્ઠિતાઃ

સર્વયજ્ઞમયં નિત્યં નૈવેદ્યં સર્વતુષ્ટિદમ્।
જ્ઞાનદં કામદં પુણ્યં સર્વભોગ્યમયં તથા

મનસાપિ મહાદેવ્યૈ નૈવેદ્યં દાતુમિચ્છતિ।
યો નરો ભક્તિયુક્તઃ સન્ સ દીર્ઘાયુઃ સુખી ભવેત્

મહામાયાં સદા દેવીમર્ચંયિષ્યામિ ભક્તિતઃ ।
નાનાવિધૈસ્તુ નેવેદ્યૌરિતિ ચિન્તાકુલસ્તુ યઃ।
સ સર્વકામાન્ સમ્પ્રાપ્ય મમ લોકે મહીયતે

મનસાપિ ચ યો દદ્યાદ્ દેવ્યૈ ભક્ત્યા પ્રદક્ષિણમ્।
સ દક્ષિણે યમગૃહે નરકાણિ ન પશ્યતિ

દેવમાનુષગન્ધર્વા યક્ષરાક્ષસપન્નગાઃ।
નમસ્કારેણ તુષ્યન્તિ મહાત્માનઃ સમન્તતઃ

નમસ્કારેણ લભતે ચતુર્વર્ગં મહામત્તિઃ।
સર્વત્ર સર્વસિદ્ધ્યર્થં નતિરેવ પ્રશસ્યતે

નત્યા વિજયતે લોકાન્નત્યાયુરપિ વર્ધતે।
નમસ્કારેણ દીર્ઘાયુચ્છિન્ના લભતે પ્રજાઃ

નમસ્કુરુ મહાદેવ્યૈ પ્રદક્ષિણમથો કુરુ।
નૈવેદ્યં દેહિ નિતરામિતિ યો ભાષતે મુહુઃ।
સોઽપિ કામાનવાપ્યેહ મમ લોકે પ્રમોદતે

વિદધાતિ ચ નૈવેદ્યં મહાદેવ્યૈ સુભક્તિમાન્।
દાતું પ્રતિ નરઃ સોઽપિ દેવીલોકમવાપ્નુયાત્

ઇતિ વાં કથિતાઃ સમ્યગુપચારાસ્તુ ષોડશ।
કિમન્યદ્રુચિતં વાં તત્ કથયિષ્યામિ પૃચ્છતોઃ

ઇતિ શ્રીકાલિકાપુરાણે ષોડશોપચારનિર્ણયે એકસપ્તતિતમોઽધ્યાયઃ॥