કાલિકાપુરાણમ્ · અધ્યાય 54

॥શ્રીભગવાનુવાચ॥
તતોઽર્ઘપાત્રે તન્મન્ત્રમષ્ટધાકૃત્ય સઞ્જજપેત્।
તેન તોયાનિ પુષ્પાણિ સ્વં મણ્ડલમથાસનમ્

આશોધયેત્ તતઃ પશ્ચાત્ પૂજોપકરણં સમમ્।
ૐ ઐં હ્રીં હ્રૌ મિંતિ મન્ત્રેણ શબ્દપ્રાંશુવિવર્જિતમ્

દ્વારપાલં તતો દેવ્યા આસનાનિ ચ પૂજયેત્।
નન્દિભૃઙ્ગિમહાકાલગણેશા દ્વારપાલકાઃ।
ઉત્તરાદિક્રમાત્ પૂજ્યા આસનાનિ ચ મધ્યતઃ

આધારશક્તિપ્રભૃતિ હેમાદ્યન્તાત્ પ્રપૂજયેત્।
પ્રસિદ્ધાત્ સર્વતન્ત્રેષુ પૂજાકલ્પેષુ ભૈરવ

દશદિક્પાલસહિતાન્ ધર્માધર્માદિકાંસ્તથા।
મણ્ડલાગ્ન્યાદિકોણેષુ પૂજયેત્ પાર્શ્વદેશતઃ

સૂર્યાગ્નિસોમમરુતાં મણ્ડલાનિ ચ પદ્મકમ્।
રજસ્તથા તમઃ સત્ત્વં યોગપીઠં ગુરોઃ પદમ્

સારાદીન્ ભદ્રપીઠાન્તાન્ સાઙ્ગોપાઙ્ગાન્ પ્રપૂજયેત્।
બ્રહ્માણ્ડં સ્વર્ણડિમ્બં ચ બ્રહ્મવિષ્ણુમહેશ્વરાન્

સસાગરાન્ સપ્તદ્વીપાન્ સ્વર્ણદ્વીપં સમણ્ડપમ્।
રત્નપદ્મં સપર્યઙ્કં રત્નસ્તમ્ભં તથૈવ ચ

પઞ્ચાનનં મણ્ડલસ્ય મધ્યેઽવશ્યં પ્રપૂજયેત્।
હ્રીં મન્ત્રેણ તતઃ કૂર્મપૃષ્ઠં પાણ્યોર્નિબધ્ય ચ

ધ્યાયેચ્ચ પૂર્વવદ્ દેવીમાસાદ્યાસનમુત્તમમ્।
હૃન્મધ્યે ચિન્તયેત્ સ્વર્ણદ્વીપં પર્યઙ્કસમ્ભૃતમ્

પશ્યન્નિવ તતો દેવીમેકાગ્રમનસા સ્મરેત્।
પ્રત્યક્ષીકૃત્ય હૃદયે માનસૈરુપચારકૈઃ

ષોડશાનાં પ્રકારૈસ્તુ હૃદિસ્થાં પૂજયેચ્છિવામ્।
તતસ્તુ વાયુબીજેન દક્ષિણે ચ પુટેન ચ

નાસિકાયા વિનિઃસાર્યં ક્રીં મન્ત્રેણ ચ ભૈરવ।
સ્થાપયેત્ પદ્મમધ્યે તુ તદ્‌ધસ્તં ન વિયોજયેત્

કૃતે વિયોગે હસ્તસ્ય પુષ્પાત્ તસ્માચ્ચ ભૈરવ।
ગન્ધર્વૈઃ પૂજ્યતે દેવી પૂજકૈર્નાપ્યતે ફલમ્

આવાહનં તતઃ કુર્યાદ્ ગાયત્ર્યા શિરસા સહ ।
મહામાયાયૈ વિદ્મહે ત્વાં ચણ્ડિકાખ્યાં ધીમહિ

એતદુક્ત્વા તતઃ પશ્ચાદ્ ધિયો યો નઃ પ્રચોદયાત્।
સ્નાનીયં દેવિ તે તુભ્યં ૐ હ્રીં શ્રીં નમ ઇત્યતઃ

સ્નાનીયં ચ તતો દૈવ્યૈ દદ્યાલ્લક્ષણલક્ષિતમ્।
તતસ્તુ મૂલમન્ત્રેણ ગન્ધપુષ્પં સદીપકમ્

ધૂપાદિકં પ્રદદ્યાત્ તુ મોદકં પાયસં તથા।
સિતાં ગુડં દધિક્ષીરં સર્પિર્નાનાવિધૈઃ ફલૈઃ

રક્તપુષ્પં પુષ્પમાલાં સુવર્ણરજતાદિકમ્।
નૈવેદ્યમુત્તમં દેવ્યા લાઙ્ગલં મોદકં સિતામ્

શાણ્ડિલ્યકરતામ્રાખ્યકૂષ્માણ્ડાનાં ફલાનિ ચ।
હરીતકીફલં ચાપિ નાગરઙ્ગકમેલકમ્

બાલપ્રિયં ચ યદ્ દ્રવ્યં કસેરુકબિસાદિકમ્।
તોયં ચ નારિકેલસ્ય દેવ્યૈ દેયં પ્રયત્નતઃ

રક્તં કૌશેયવસ્ત્રં ચ દેયં નીલં કદાપિ ન।
દેવ્યાઃ પ્રિયાણિ પુષ્પાણિ બકુલં કેશરં તથા

માધ્યં કહ્લારવજ્રાણિ કરવીરકુરુણ્ટકાન્।
અર્કપુષ્પં શાલ્મલકં દૂર્વાઙ્કુરં સુકોમલમ્

કુશમઞ્જરિકા દર્ભા બન્ધૂકકમલે તથા।
માલૂરપત્રં પુષ્પં ચ ત્રિસન્ધ્યારક્તપર્ણકે

સુમનાંસિ પ્રિયાણ્યેતાન્યમ્બિકાયાશ્ચ ભૈરવ।
બન્ધૂકં બકુલં માધ્યં બિલ્વપત્રાણિ સન્ધ્યકમ્

ઉત્તમં સર્વપુષ્પેષુ દ્રવ્યે પાયસમોદકૌ।
માલ્યં બન્ધૂકપુષ્પસ્ય શિવાયૈ બકુલસ્ય વા

કરવીરસ્ય માધ્યસ્ય સહસ્રાણાં દદાતિ યઃ।
સ કામાન્ પ્રાપ્ય ચાભીષ્ટાન્ મમ લોકે પ્રમોદતે

ચન્દનં શીતલં ચૈવ કાલીયકસમન્વિતમ્।
અનુલેપનમુખ્યં તુ દેવ્યૈ દદ્યાત્ પ્રયત્નતઃ

કર્પૂરં કુઙ્કુમં કૂર્ચં મૃગનાભિં સુગન્ધિકમ્ ।
કાલીયકં સુગન્ધેષુ દેવ્યાઃ પ્રીતિકરં પરમ્

યક્ષધૂપઃ પ્રતીવાહઃ પિણ્ડધૂપઃ સગોલકઃ ।
અગુરુઃ સિન્ધુવારશ્ચ ધૂપાઃ પ્રીતિકરા મતાઃ

અઙ્ગરાગેષુ સિન્દૂરં દેવ્યાઃ પ્રીતિકરં પરમ્।
સુગન્ધિ શાલિજં ચાન્નં મધુમાંસસમન્વિતમ્

અપૂપં પાયસં ક્ષીરમન્નં દેવ્યાઃ પ્રશસ્યતે।
રત્નોદકં સકર્પૂરં પિણ્ડીતકકુમારકૌ

રોચનં પુષ્પકં દેવ્યાઃ સ્નાનીયં પરિકીર્તિતમ્।
ઘૃતપ્રદીપો દીપેષુ પ્રશસ્તઃ પરિકીર્તિતઃ

પુષ્પાઞ્જલિત્રયં દદ્યાદ્ મૂલમન્ત્રેણ શોભનમ્।
દત્ત્વોપચારાનખિલાન્મધ્યે ચૈતાઃ પ્રપૂજયેત્॥ ૨.૫૪. ૩૪ ॥
કામેશ્વરીં ગુપ્તદુર્ગાં વિન્ધ્યકન્દરવાસિનીમ્।
કોટેશ્વરી દીર્ઘિકાખ્યાં પ્રકટીં ભવનેશ્વરીમ્ ॥ ૨.૫૪. ૩૫ ॥
આકાશગઙ્ગાં કામાખ્યાં યદા દિક્કરવાસિનીમ્ ।
માતઙ્ગી લલિતાં દુર્ગાં ભૈરવી સિદ્ધિદાં તથા

બલપ્રમથિનીં ચણ્ડીં ચણ્ડોગ્રાં ચણ્ડનાયિકામ્।
ઉગ્રાં ભીમાં શિવાં શાન્તાં જયન્તીં કાલિકાં તથા

મઙ્ગલાં ભદ્રકાલીં ચ ચ શિવાં ધાત્રીં કપાલિનીમ્ ।
સ્વાહાં સ્વધામપર્ણાં ચ પઞ્ચપુષ્કરિણીં તથા

મદનીં સર્વભૂતાનાં મનઃ પ્રોત્સાહકારિણીમ્ ।
દમનીં સર્વભૂતાનાં ચતુઃષષ્ટિં ચ યોગિનીઃ

એતાઃ સમ્પૂજ્ય મધ્યે તુ મન્ત્રેણાઙ્ગાનિ પૂજયેત્।
હૃચ્છિરસ્તુ શિખાવર્મનેત્રબાહુપદાનિ ચ

મૂલમન્ત્રાદ્યક્ષરૈસ્તુ ત્રિભિરાદ્યઙ્ગપૂજનમ્।
એકૈકં વર્દ્ધયેત્ પશ્ચાન્મન્ત્રાણ્યઙ્ગૌઘપૂજને

સિદ્ધસૂત્રં ચ ખડ્ગં ચ ખડ્ગમન્ત્રેણ પૂજયેત્।
તતોઽષ્ટપત્રમધ્યે તુ પૂજયેદષ્ટયોગિનીઃ

શૈલપુત્રીં ચણ્ડઘણ્ટાં સ્કન્દમાતરમેવ ચ।
કાલરાત્રિં ચ પૂર્વાદિચતુર્દિક્ષુ પ્રપૂજયેત્

ચણ્ડિકામથ કૂષ્માણ્ડીં તતા કાત્યાયનીં શુભામ્।
મહાગૌરીં ચાગ્નિકોણે તૈઋત્યાદિષુ પૂજયેત્

મહામાયાં ક્ષમસ્વેતિ મૂલમન્ત્રેણ ચાષ્ટધા।
પૂજયેત્ પદ્મમધ્યે તુ બલિદાનં તતઃ પરમ્

એવં યદા કલ્પવિધાનમાનૈઃ સમ્પૂજ્યતે ભૈરવ કામદેવી।
તદા સ્વયં મણ્ડલમેત્ય દેયં ગૃહ્ણાતિ કામં ચ દદાતિ સમ્યક્

ઇતિ શ્રીકાલિકાપુરાણે અષ્ટાદશપટલોદ્ધારે મહામાયાકલ્પચતુઃપઞ્ચાશોઽધ્યાયઃ॥