કાલિકાપુરાણમ્ · અધ્યાય 53

॥શ્રીભગવાનુવાચ॥
તતો લમિતિ મન્ત્રેણ અર્ઘપાત્રસ્ય મણ્ડલમ્।
ચતુષ્કોણં વિધાયાશુ દ્વારપદ્મવિવર્જિતમ્

ઓં હ્રીં શ્રીમિતિમન્ત્રેણ અર્ઘપાત્રં તુ મણ્ડલે।
વિન્યસેત્ પ્રથમં તત્ર પૂજયિત્વા સમિધ્યતિ

ઓં હ્રી હ્રૌમિતિમન્ત્રેણ ગન્ધપુષ્પે તથા જલમ્।
અર્ઘપાત્રે ક્ષિપેત્ તત્ર મણ્ડલં વિન્યસેત્ તતઃ

પૂર્વવન્મણ્ડલં કૃત્વા અર્ઘપાત્રે તતો જલૈઃ।
ત્રિભાગૈઃ પૂરયેત્ પાત્રં પુષ્પં તત્ર વિનિઃક્ષિપેત્ ૫૩.૪ ॥
તતો હ્રીમિતિ મન્ત્રેણ આસનં પૂજયેત્ સ્વકમ્।
તતઃ ક્ષૌમિતિમન્ત્રેણ આત્માનં પૂજયેદ્ બુધઃ

ગન્ધૈઃ પુષ્પૈઃ શિરોદેશે તતઃ પૂજાં સમાચરેત્ ।
ઓં હ્રીં સ ઇતિ મન્ત્રેણ પુષ્પં હસ્તતલસ્થિતમ્

સંમૃજ્ય સવ્યહસ્તેન ઘ્રાત્વા વામકરેણ તુ।
ઐશાન્યાં નિક્ષિપેદેતત્ પૂર્વમન્ત્રેણ કોવિદઃ

રક્તં પુષ્પં ગૃહીત્વા તુ કરાભ્યાં પાણિકચ્છપમ્।
બદ્‌ધ્વા કુર્યાત્ તતઃ પશ્ચાદ્ દહનપ્લવનાદિકમ્

વામહસ્તસ્ય તર્જન્યાં દક્ષિણસ્ય કનિષ્ઠિકામ્ ।
તતા દક્ષિણતર્જન્યાં વામાઙ્ગષ્ઠં નિયોજયેત્

ઉન્નતં દક્ષિણાઙ્ગુષ્ઠં વામસ્ય મધ્યમાદિકાઃ।
અઙ્ગુલીર્યોજયેત્ પૃષ્ઠે દક્ષિણસ્ય કરસ્ય ચ

વામસ્ય પિતૃતીર્થેન મધ્યમાનામિકે તથા।
અધોમુખે તુ તે કુર્યાદ્ દક્ષિણસ્ય કરસ્ય ચ

કૂર્મપૃષ્ઠસમં પૃષ્ઠં કુર્યાદ્ દક્ષિણહસ્તતઃ ।
એવં બદ્ધઃ સર્વસિદ્ધિં દદાતિ પાણિકચ્છપઃ

કુર્યાત્ તદ્‌ધૃદયાસન્નં નિમીલ્ય નયનદ્વયમ્।
સમં કાયશિરોગ્રીવં કૃત્વા સ્થિરમના બુધઃ

ધ્યાનં સમારભેદ્ દેવ્યા દાહપ્લવનપૂર્વકમ્।
અગ્નિં વાયૌ વિનિક્ષિપ્ય વાયું તોયે જલં હૃદિ

હૃદયં નિશ્ચલે દત્ત્વા આકાશે નિક્ષિપેત્સ્વનમ્ સ્વકમ્ ।
ૐ હૂં ફડિતિ મન્ત્રેણ ભિત્ત્વા રન્ધ્રં તુ મસ્તકે

શબ્દેન સહિતં જીવમાકાશે સ્થાપયેત્ તતઃ।
વાય્વગ્નિયમશક્રાણાં બીજેન વરુણસ્ય ચ

પરાસ્થાનપરાશ્ચૈતૈઃ સાર્ધચન્દ્રૈઃ સવિન્દુકૈઃ।
શોષં દાહં તથોચ્છાદં પીયૂષાસેવનં પરમ્

યથાક્રમેણ કર્તવ્યં ચિન્તામાત્રં વિશુદ્ધયે।
તતસ્તુ દેવીબીજેન અણું જામ્બૂનદાકૃતિમ્

તત્રાસાદ્ય દ્વિધા કુર્યાત્ ઉમ્ હ્રીં શ્રીમિતિ મન્ત્રકાઃ।
તદૂર્ધ્વભાગેષુ હૃદ્લોકં સ્વર્ગં ચ ખં તથા

નિષ્પાદ્ય શેષભાગેન ભુવં પાતાલવારિણિ ધારિણીમ્ ।
ચિન્તયેત્તત્ર સર્વાણિ સપ્તદ્વીપાં ચ મેદિનીમ્

તત્તેષુ સાગરાંસ્તાંસ્તુ સ્વર્ણદ્વીપં વિચિન્તયેત્।
તન્મધ્યે રત્નપયઙ્ક રત્નમણ્ડપસંસ્થિતમ્

આકાશગઙ્ગાતોયોધૈઃ સદૈવ સેવિતં શુભમ્।
તત્પર્યઙ્કે રક્તપદ્મં પ્રસન્નં સર્વદાશિવમ્

ચિન્તયેત્ સ્વર્ણમાનાઙ્કં સપ્તપાતાલનાલકમ્।
આબ્રહ્મભુવનસ્પર્શિ સુવર્ણાચલકર્ણિકમ્

તત્રસ્થિતાં મહામાયાં ધ્યાયેદેકાગ્રમાનસઃ।
શોણપદ્મપ્રતીકાશાં મુક્તમૂર્ધજલમ્બિનીં

ચલત્કાઞ્ચનામારુહ્ય કુણ્ડલોજ્જ્વલશાલિનીમ્।
સુવર્ણરત્નસમ્પન્ન દ્વયધારિણીમ્

શુક્લકૃષ્ણારુણૈર્નેત્રૈ સ્ત્રિભિશ્ચારુવિભૂષિતામ્।
સન્ધ્યાચન્દ્રસમપ્રખ્ય-કપોલાં લોલલોચનામ્

વિપક્વ દાડિમીબીજદન્તાન્ સુભ્રૂ યોગોજ્જ્વલામ્।
બન્ધૂકદન્તવસનાં શિરીષપ્રભનાસિકામ્

કમ્બુગ્રીવાં વિશાલાક્ષીં સૂર્યકોટિસમપ્રભામ્।
ચતુર્ભુજાં વિવસનાં પીનોન્નતપયોધરામ્

દક્ષિણોર્ધ્વેન નિસ્ત્રિંશત્પરેણ સિદ્ધસૂત્રકમ્।
બિભ્રતીં વામહસ્તાભ્યામભીતિ વરદાયિનીમ્

નિમ્નનાભિ ક્રમાયાતાં ક્ષીણમધ્યાં મનોહરામ્।
આનમન્નાગપાશોરૂં ગુપ્તગુલ્ફાં સુપાર્ષ્ણિકામ્

બદ્ધપર્યઙ્કસઙ્કલ્પાં નિવીરાસનરાજિતામ્।
ગાત્રેણ રત્નસંસ્તમ્ભં સમ્યગાલમ્બ્ય સંસ્થિતામ્

કિમિચ્છસીતિ વચનં વ્યાહરન્તીં મુહુર્મુહુઃ।
પઞ્ચાનનં પુરઃસંસ્થં નિરીક્ષન્તીં સુવાહનમ્

મુક્તાવલી સ્વર્ણરત્નહા રકઙ્કણાદિભિઃ।
સર્વૈરલઙ્કારગણૈરુજ્જ્વલાં સસ્મિતાનનામ્

સૂર્યકોટિપ્રતીકાશાં સર્વલક્ષણસંયુતામ્।
નવયૌવનસમ્પન્નાં તથા સર્વાઙ્ગસુન્દરીમ્

ઈદૃશીમમ્બિકાં ધ્યાત્વા નમઃ ફડિતિ મસ્તકે।
સ્વકીયે પ્રથમં સાઽહમેવ વિચિન્ત્ય ચ

અઙ્ગન્યાસકરન્યાસૌ તતઃ કુર્યાત્ ક્રમેણ ચ ।
એભિર્મન્ત્રૈઃ સ્વરૈઃ સહ સૃમીસૂમૈઃ ક્રમાન્વિતૈઃ

ઓમ્ ક્ષૌમ્ ચૈતે સપ્રણવાં રક્તવર્ણાં મનોહરામ્।
અઙ્ગુષ્ઠાદિકનિષ્ઠાન્તમન્ત્રસંબેષ્ટનં ફટ્

પ્રાન્તેન કુર્યાદ્ વિન્યાસં પૂર્વં કરતલદ્વયે ।
હૃચ્છિરઃ શિખાકવચનેત્રેષુ ક્રમતો ન્યસેત્

તતસ્તુ મૂલમન્ત્રસ્ય વક્ત્રે પૃષ્ઠે તથોદરે।
બાહ્વોર્ગુહ્યે પાદયોશ્ચ જઙ્ઘયોર્જઘને ક્રમાત્

વિન્યસેદક્ષરાણ્યષ્ટૌ ઓંકારં ચ તથા સ્મરન્।
એભિઃ પ્રકારૈરતિ શુદ્ધદેહઃ પૂજાં સદૈવાર્હતિ નાન્યથા હિ।
શરીરશુદ્ધિં મનસો નિવેશં ભૂતપ્રસારં કુરુતે નૃણાં તત્

ઇતિ શ્રીકાલિકાપુરાણે મહામાયાકલ્પે ત્રિપઞ્ચાશોઽધ્યાયઃ॥