કાલિકાપુરાણમ્ · અધ્યાય 52

॥ઔર્વ્વ ઉવાચ॥
એવં વદતિ ભૂતેશે તદા વેતાલભૈરવૌ।
પ્રાહતુર્વ્યોમકેશં તૌ હર્ષોત્ફુલ્લવિલોચનૌ

॥વેતાલભૈરવાવૂચતુઃ॥
પાર્વત્યા ન હિ જાનીવો ધ્યાનં મન્ત્રં વિધિં તથા।
કથમારાધયિષ્યાવો ભગવન્ સમ્યગુચ્યતામ્

॥ભીગવાનુવાચ॥
મહામાયાવિધિં મન્ત્રં ચ ભવતોઃ સુતૌ।
ઉપદેક્ષ્યામિ તત્ત્વેન યેન સર્વં ભવિષ્યતિ

॥ઔર્વ્વ ઉવાચ॥
ઇત્યુક્ત્વા સ મહામાયાધ્યાનં મન્ત્રં વિધિં તથા।
કથયામાસ ગિરિશસ્તયોઃ સમ્યઙ્ નૃપોત્તમ

યદષ્ટાદશભિઃ પશ્ચાત્પટલૈશ્ચ સ ભૈરવઃ।
સ નિર્ણયવિધિં કલ્પં નિબબન્ધ શિવામૃતે

॥સગર ઉવાચ॥
કીદૃઙ્ મન્ત્રં પુરા શમ્ભુરવોચદુભયોસ્તયોઃ।
યેનારાધ્ય મહામાયાં તૌ ગણેશત્વમાપતુઃ

સકલ્પં સરહસ્યં ચ સાઙ્ગં તચ્છ્રીતુમુત્સહે।
દશાષ્ટપટલૈર્યત્ તુ નિબબન્ધ સ ભૈરવઃ

॥ઔર્વ્વ ઉવાચ॥
બહુત્વાદ્ વદિતું તસ્ય ચિરેણૈવ તુ શક્યતે।
તસ્માત્ સદ્યઃ સમુદ્‌ધૃત્ય યન્મહાદેવભાષિતમ્।
સંક્ષેપાત્ કથયે તત્ત્વં તચ્છૃણુષ્વ નૃપોત્તમ

પૃચ્છન્તૌ પાર્વતી મન્ત્રં તદા વેતાલભૈરવૌ।
જગાદ સ મહાદેવઃ શૃણુત મન્ત્રકલ્પકૌ

॥શ્રીભગવાનુવાચ॥
શૃણુ મન્ત્રં પ્રવક્ષ્યામિ ગુહ્યાદ્ ગુહ્યતમં પરમ્।
અષ્ટાક્ષરં તુ વૈષ્ણવ્યા મહામાયામહોત્સવમ્

અસ્ય શ્રીવૈષ્ણવીમન્ત્રસ્ય નારઋષિઃ શમ્ભુર્દેવતા।
અનુષ્ટુપ્ છન્દઃ સર્વાર્થસાધને વિનિયોગઃ

હાન્તાન્તયુર્વો રાન્તશ્ચ નાન્તો ણાન્તસ્તથૈવ ચ।
કૈકાદશાષ્ટાદિષષ્ઠઃ ખાન્તો વિષ્ણુપુરઃસરઃ

એભિરષ્ટાક્ષરૈર્મન્ત્રં શોણપત્રસમપ્રભમ્।
ૐકારં પૂર્વતઃ કૃત્વા જપ્યં સર્વૈસ્તુ સાધકૈઃ

મહામન્ત્રમિદં ગુહ્યં વૈષ્ણવીમન્ત્રસંજ્ઞકમ્।
મન્ત્રં કલેવરગતં તસ્માદઙ્ગં પ્રકીર્તિતમ્

મહાદેવસ્યોર્ધ્વમુખં બીજમેતત્ પ્રકીર્તિતમ્।
ૐકારાક્ષરબીજં ચ યકારઃ શક્તિરુચ્યતે

સબીજં કથિતં મન્ત્રં કલ્પં ચ શૃણુ ભૈરવ।
તીર્થે નદ્યાં દેવખાતે ગર્તપ્રસ્રવણાદિકે

પરકીયેતરે તોયે સ્નાનં પૂર્વં સમાચરેત્।
આચાન્તઃ શુચિતાં પ્રાપ્તઃ કૃતાસનપરિગ્રહઃ

ઉત્તરાભિમુખો ભૂત્વા સ્થણ્ડિલં માર્જયેત્ તતઃ।
કરેણાનેન મન્ત્રેણ યૂં સહઃ ક્ષિત્યા ઇતિ સ્વયમ્

ૐ હ્રીં સ ઇતિ મન્ત્રેણ આશાપૂરણકેન ચ।
તોયૈરભ્યુક્ષયેત્ સ્થાનં ભૂતાનામપસારણે

તતઃ સવ્યેન હસ્તેન ગૃહીત્વા સ્થણ્ડિલં શુચિઃ।
મન્ત્રં લિખેત્ સુવર્ણેન યાજ્ઞિકેન કુશેન વા

ૐ વૈષ્ણવ્યૈ નમઃ ઇતિ મન્ત્રરાજમથાપિ વા।
તતસ્ત્રિમણ્ડલં કુર્યાત્ તેનૈવ સમરેખયા

નિત્યાસુ ન હિ પૂજાસુ રજોભિર્મણ્ડલં લિખેત્।
પુરશ્ચરણકાર્યેષુ તત્કામ્યેષુ પ્રયોજયેત્

રેખામુદીચ્યાં પ્રથમં પશ્ચિમે તદનન્તરમ્।
દક્ષિણે તુ તતઃ પશ્ચાત્ પૂર્વભાગે તુ શેષતઃ

વર્ણાનાં ચ સહદ્વારૈરેવમેવ ક્રમો ભવેત્।
ૐ હ્રીં શ્રીં સ ઇતિ મન્ત્રેણ મણ્ડલં પૂજયેત્ તતઃ

હસ્તેન મણ્ડલં કૃત્વા કુર્યાદ્ દિગ્બન્ધનં તતઃ।
આશાબન્ધનમન્ત્રેણ પૂર્વોક્તેન યથાક્રમમ્

ફડન્તેનાત્મનાપ્યત્ર કરેણૈવ નિબન્ધયેત્।
યવાનાં મણ્ડલૈરેકમઙ્ગુલં ચાષ્ટભિર્ભવેત્

અદીર્ઘયોજિતૈર્હસ્તૈસ્ચતુર્વિંશતિરઙ્ગુલૈઃ।
તત્પ્રમાણેન હસ્તેન હસ્તૈકં તસ્ય મણ્ડલમ્

પદ્મં વિતસ્તિમાત્રં સ્યાત્ કર્ણિકારં તદર્ધકમ્।
દલાન્યન્યોન્યસક્તાનિ હ્યાયતાનિ નિયોજયેત્

ન ન્યૂનાધિકભાગાનિ સબહિર્વેષ્ટિતાનિ ચ।
મધ્યભાગે ન્યસેદ્ દ્વારં ન્યૂને નાધિકે તથા।
સુબદ્ધં મણ્ડલં તચ્ચ રક્તવર્ણં વિચિન્તયેત્

ઇતોઽન્યથા મણ્ડલમુગ્રમસ્યાઃ કરોતિ યો લક્ષણભાગહીનમ્।
ફલં ન ચાપ્નોતિ ન કામમિષ્ટં તસ્માદિદં મણ્ડલમત્ર લેખ્યમ્

ઇતિ શીકાલિકાપુરાણે મહામાયાકલ્પેઽષ્ટાદશપટલે દ્વિપઞ્ચાશત્તમોઽધ્યાયઃ॥