જાતકમાલા · શ્લોક 67-86

અથાસૌ મહીપતિર્ બોધિસત્ત્વમ્ અબ્રવીત્ ॥
શક્યે તત્ કુશલં દાતું સ્વસંતાનગતં યદિ ।
દદ્યાં તદ્ અપિ સુવ્યક્તં ભવતે કૃતવેદિને

વયં રાજ્યં ચ દાતારો યદ્ વાન્યત્ સાધુ મન્યસે ।
તથૈવ પ્રભુતાં તત્ર નાવગન્તવ્યમ્ અન્યથા

મયા યત્ પુણ્યમ્ આર્યાણામ્ એષામ્ અપચિતેશ્ ચિતં ।
ત્વદભ્યાગમનાકાલકૌમુદી તત્ કૃતૈવ મે

મિત્રમ્ એકાન્તકલ્યાણં બન્ધુર્ અત્યન્તવત્સલઃ ।
ગુણવાન્ દક્ષિણીયસ્ ત્વં નાથશ્ ચાનુત્તરો મમ

ક્ષુદ્રસત્ત્વો ઽપિ કો નામ ત્વદાજ્ઞામ્ અભિલઙ્ઘયેત્ ।
દ્રષ્ટવ્યરત્નં દૃષ્ટ્વા ચ ન પ્રસીદેદ્ ભવાદૃશં

એકં ત્વ્ અત્ર મહારાજ વૈધુરમ્ અવગચ્છામિ । યેન મે વક્તુમ્ અસ્ત્ય્ એતાન્ મહર્ષીન્ અસ્મિન્ પ્રયોજને સંકુચતિ માનસમ્ ॥ એતે હિ મહાત્માનો વિવેકરતિપ્રિયત્વાદ્ અભિરમન્તે હિમવતિ શૈલરાજે ॥ પશ્ય મહારાજ ॥
અમી હિ હિમવત્પ્રસ્થાઃ કદલીખણ્શમણ્ડિતાઃ ।
વિવેકાયૈવ સાધૂનાં શઙ્ખધાત્રા વિનિર્મિતાઃ

હરિણા લુઞ્ચિતોપાન્તશાદ્વલશ્યામનિર્ઝરાન્ ।
દેવદારુદ્રુમાન્ પશ્ય કૂટાગારાન્ ઇવોદ્ગતાન્

ખ્યાપયન્તીવ લોકાનાં વિનિપાતં હિમાપગાઃ ।
તરઙ્ગૈઃ કૂલપાષાણભિદ્યમાનૈર્ મુહુર્ મુહુઃ

એતાઃ સ્નિગ્ધચ્છદચ્છાયાઃ પદ્મકદ્રુમરાજયઃ ।
યતીન્ આશ્વાસયન્તીવ સંસારોદ્વિગ્નમાનસાન્

ક્લાન્તાનાં વ્રતિનામ્ એષ સ્વેદબિન્દૂન્ અપોહતે ।
પ્રાલેયકણસંપર્કશિશિરો વનમારુતઃ

ઉપત્યકાઃ પદ્મકપુષ્પપાટલાઃ શિલીન્ધ્રકાપાદપવારિતાતપાઃ ।
ઇમા હિમાદ્રે રમયન્તિ માનસં નિવૃત્તસંરાગવિષં વિપશ્ચિતાં

હિમાચલસ્યોપનિતમ્બરોહિણાં નિરીક્ષમાણાઃ સરલાશિખાવતાં ।
વનાનિ ચેતઃસ્થિતિમ્ આપ્નુવન્ત્ય્ અમી સુમેધસઃ કામવિવેકપેશલાં

બોધિસત્ત્વઃ પ્રોવાચ ॥
તિમિરદ્રુમસંછન્ના વિવિક્તાભોગકન્દરાઃ ।
તત્રાપ્ય્ અનુગુણા સન્તિ વેલાશૈલઃ પ્રહાણિનાં

તાલહિન્તાલમાલિન્યઃ સરિતો હરિતોપલાઃ ।
સન્તિ તત્રાપિ હારીતપક્ષવિક્ષોભિતોર્મયઃ

તરઙ્ગિનીનામ્ ઉપકણ્ઠરોહિણાં પલાશિનામ્ પુષ્પભરાતુરાઃ શિખાઃ ।
વિધૂય તત્રાપિ યતીન્ નિષેવતે સમુદ્રવેલાજલશીતલો ઽનિલઃ

સરસમરિચવલ્લીશ્યામરોધો વનસ્ય ધ્વનિર્ અચલસુરુઙ્ગામુર્ચ્છિતો ઽપ્ય્ અમ્બુરાશેઃ ।
અવિરલપરિપાતો ઽભ્યાસયોગાનુપાતી સ્થિરયતિ કિલ ભિક્ષોસ્ તત્ર ચેતઃસમાધિં

નિર્ધૌતોપલસાનુર્ અઞ્જનશિલાનીલૈઃ પયોધેર્ જલૈર્
વાતાયાસિતચન્દનદ્રુમલતાવિક્ષિપ્તસૂર્યાતપઃ ।
શૈલેન્દ્રો મલયો ઽસ્તિ નામ જલદચ્છેદાવલીશેખરશ્
ચેતઃ સંયમિનામ્ અલં રમયિતું શાન્તપ્રપઞ્ચજ્વરં

ચિત્રોત્સઙ્ગો વિષમનિચિતૈર્ ધાતુપાષાણખણ્ડૈઃ
શષ્પોદ્ભેદૈસ્ તરુણતરુણૈઃ શ્યામપર્યન્તલેખઃ ।
બદ્ધામોદો મદજલમુચાં દન્તિનાં દાનગન્ધૈર્
વિન્ધ્યો ઽપ્ય્ અદ્રિઃ પ્રશમમહતાં યોગિનાં સંનિવાસઃ

સહ્યાદ્રેર્ વિલસત્તમાલહરિતાઃ પ્રસ્થાઃ પ્રહાણક્ષમા
નિઃશબ્દાક્ષરદચ્છનિર્ઝરજલપ્રક્ષાલિતપ્રસ્તરાઃ ।
સંન્યસ્તવ્યવહારશાન્તમનસાં જન્મપ્રબન્ધદ્વિષામ્
આર્યાણામ્ અનપાયિનીં વિદધતિ પ્રત્યાત્મવેશાં રતિં

તીરાન્તાનતબાલવેતસતરુશ્રેણીનિરુદ્ધાતપા
નદ્યઃ સ્વચ્છજલાન્તરાલ વિલ સન્મીનાવલીમેખલાઃ ।
સખ્યઃ પ્રેમનિરત્યયા ઇવ સખે તત્રાપ્ય્ અલં યોગિનામ્
આક્ષેપ્તું વિષયાભિલાષવિમુખં પ્રધ્યાનધીરં મનઃ