ઈશ્વરપ્રત્યભિજ્ઞાકારિકા · અધ્યાય 1.4

સ હિ પૂર્વાનુભૂતાર્થો -પલબ્ધા પરતો ઽપિ સન્
વિમૃશન્ સ ઇતિ સ્વૈરી સ્મરતીત્ય્ અપદિશ્યતે ॥

ભાસયેચ્ ચ સ્વકાલે ઽર્થાત્ પૂર્વાભાસિતમ્ આમૃશન્
સ્વલક્ષણં ઘટાભાસ માત્રેણાથાખિલાત્મના ॥

ન ચ યુક્તં સ્મૃતેર્ ભેદે સ્મર્યમાણસ્ય ભાસનમ્
તેનૈક્યં ભિન્નકાલાનાં સંવિદાં વેદિતૈષ સઃ ॥

નૈવ હ્ય્ અનુભવો ભાતિ સ્મૃતૌ પૂર્વો ઽર્થવત્ પૃથક્
પ્રાગ્ અન્વભૂવમ્ અહમ્ ઇત્ય્ આત્મારોહણભાસનાત્ ॥

યોગિનામ્ અપિ ભાસન્તે ન દૃશો દર્શનાન્તરે
સ્વસંવિદેકમાનાસ્ તા ભાન્તિ મેયપદે ઽપિ વા ॥

સ્મર્યતે યદ્ દૃગ્ આસીન્ મે સૈવમ્ ઇત્ય્ અપિ ભેદતઃ
તદ્ વ્યાકરણમ્ એવાસ્યા મયા દૃષ્ટમ્ ઇતિ સ્મૃતેઃ ॥

યા ચ પશ્યામ્ય્ અહમ્ ઇમં ઘટો ઽયમ્ ઇતિ વાવસા
મન્યતે સમવેતં સાપ્ય્ અવસાતરિ દર્શનમ્ ॥

તન્ મયા દૃશ્યતે દૃષ્ટો ઽયં સ ઇત્ય્ આમૃશત્ય્ અપિ
ગ્રાહ્યગ્રાહકતાભિન્નાવ્ અર્થૌ ભાતઃ પમાતરિ ॥