ગોરક્ષશતક (અન્ય આવૃત્તિ) · શ્લોક 1-20

શ્રી-ગુરું પરમાનન્દં વન્દે સ્વાનન્દ-વિગ્રહમ્
યસ્ય સંનિધ્ય-માત્રેણ ચિદાનન્દાયતે તનુઃ ॥

અન્તર્-નિશ્ચલિતાત્મ-દીપ-કલિકા-સ્વાધાર-બન્ધાદિભિઃ યો યોગી યુગ-કલ્પ-કાલ-કલનાત્ ત્વં જજેગીયતે
જ્ઞાનામોદ-મહોદધિઃ સમભવદ્ યત્રાદિનાથઃ સ્વયં વ્યક્તાવ્યક્ત-ગુણાધિકં તમ્ અનિશં શ્રી-મીનનાથં ભજે ॥

નમસ્કૃત્ય ગુરું ભક્ત્યા ગોરક્ષો જ્ઞાનમ્ ઉત્તમમ્
અભીષ્ટં યોગિનાં બ્રૂતે પરમાનન્દ-કારકમ્ ॥

ગોરક્ષઃ શતકં વક્તિ યોગિનાં હિત-કામ્યયા
ધ્રુવં યસ્યાવબોધેન જાયતે પરમં પદમ્ ॥

એતદ્ વિમુક્તિ-સોપાનમ્ એતત્ કાલસ્ય વઞ્ચનમ્
યદ્ વ્યાવૃત્તં મનો મોહાદ્ આસક્તં પરમાત્મનિ ॥

દ્વિજ-સેવિત-શાખસ્ય શ્રુતિ-કલ્પ-તરોઃ ફલમ્
શમનં ભવ-તાપસ્ય યોગં ભજતિ સજ્જનઃ ॥

આસનં પ્રાણ-સંયામઃ પ્રત્યાહારોઽથ ધારણા
ધ્યાનં સમાધિર્ એતાનિ યોગાઙ્ગાનિ ભવન્તિ ષટ્ ॥

આસનાનિ તુ તાવન્તિ યાવત્યો જીવ-જાતયઃ
એતેષામ્ અખિલાન્ ભેદાન્ વિજાનાતિ મહેશ્વરઃ ॥

ચતુરાશીતિ-લક્ષાણાં એકમ્ એકમ્ ઉદાહૃતમ્
તતઃ શિવેન પીઠાનાં ષોડેશાનં શતં કૃતમ્ ॥

આસનેભ્યઃ સમસ્તેભ્યો દ્વયમ્ એવ વિશિષ્યતે
એકં સિદ્ધાસનં પ્રોક્તં દ્વિતીયં કમલાસનમ્ ॥

યોનિ-સ્થાનકમ્ અઙ્ઘ્રિ-મૂલ-ઘટિતં કૃત્વા દૃઢં વિન્યસેન્ મેઢ્રે પાદમ્ અથૈકમ્ એવ નિયતં કૃત્વા સમં વિગ્રહમ્
સ્થાણુઃ સંયમિતેન્દ્રિયોઽચલ-દૃશા પશ્યન્ ભ્રુવોર્ અન્તરમ્ એતન્ મોક્ષ-કવાટ-ભેદ-જનકં સિદ્ધાસનં પ્રોચ્યતે ॥

વામોરૂપરિ દક્ષિણં હિ ચરણં સંસ્થાપ્ય વામં તથા દક્ષોરૂપરિ પશ્ચિમેન વિધિના ધૃત્વા કરાભ્યાં દૃઢમ્
અઙ્ગુષ્ઠૌ હૃદયે નિધાય ચિબુકં નાસાગ્રમ્ આલોકયેદ્ એતદ્-વ્યાધિ-વિકાર-હારિ યમિનાં પદ્માસનં પ્રોચ્યતે ॥

ષટ્-ચક્રં ષોડશાધારં ત્રિલક્ષં વ્યોમ-પઞ્ચકમ્
સ્વ-દેહે યે ન જાનન્તિ કથં સિધ્યન્તિ યોગિનઃ ॥

એક-સ્તમ્ભં નવ-દ્વારં ગૃહં પઞ્ચાધિદૈવતમ્
સ્વ-દેહં યે ન જાનન્તિ કથં સિધ્યન્તિ યોગિનઃ ॥

ચતુર્દલં સ્યાદ્ આધારઃ સ્વાધિષ્ઠાનં ચ ષટ્-દલમ્
નાભૌ દશ-દલં પદ્મં સૂર્ય-સઙ્ખ્ય-દલં હૃદિ ॥

કણ્ઠે સ્યાત્ ષોડશ-દલં ભ્રૂ-મધ્યે દ્વિદલં તથા
સહસ્ર-દલમ્ આખ્યાતં બ્રહ્મ-રન્ધ્રે મહા-પથે ॥

આધારઃ પ્રથમં ચક્રં સ્વાધિષ્ઠાનં દ્વિતીયકમ્
યોનિ-સ્થાનં દ્વયોર્ મધ્યે કામ-રૂપં નિગદ્યતે ॥

આધારાખ્યં ગુદ-સ્થાનં પઙ્કજં ચ ચતુર્-દલમ્
તન્-મધ્યે પ્રોચ્યતે યોનિઃ કામાક્ષા સિદ્ધ-વન્દિતા ॥

યોનિ-મધ્યે મહા-લિઙ્ગં પશ્ચિમાભિમુખં સ્થિતમ્
મસ્તકે મણિવદ્ બિમ્બં યો જાનાતિ સ યોગવિત્ ॥

તપ્ત-ચામીકરાભાસં તડિલ્-લેખેવ વિસ્ફુરત્
ત્રિકોણં તત્-પુરં વહ્નેર્ અધો-મેઢ્રાત્ પ્રતિષ્ઠિતમ્ ॥