ગૌરગઓવિન્દાર્ચનસ્મરણપદ્ધતિ · શ્લોક 1-20

શ્રીપાદ ધ્યાન-ચન્દ્ર ગોસ્વામી
સાધકો બ્રાહ્મ-મુહૂર્તે ચોત્થાય નિજેષ્ટ-નામાનિ સ્મરેત્ કીર્તયેદ્ વા--
સ જયતિ વિશુદ્ધ-વિક્રમઃ
કનકાભઃ કમલાયતેક્ષણઃ ।
વર-જાનુ-લમ્બિ-સદ્-ભુજો
બહુધા ભક્તિ-રસાભિનર્તકઃ

શ્રી-રામેતિ જનાર્દનેતિ જગતાં નાથેતિ નારાયણે-*
ત્યાનન્દેતિ દયાપરેતિ કમલાકાન્તેતિ કૃષ્ણેતિ ચ ।
શ્રીમન્ નામ-મહામૃતાબ્ધિ-લહરી-કલ્લોલ-મગ્નં મુહુર્
મુહ્યન્તં ગલદ્-અશ્રુ-નેત્રમ્ અવશં માં નાથ નિત્યં કુરુ

શ્રી-કાન્ત કૃષ્ણ કરુણામય કઞ્જનાભ
કૈવલ્ય-વલ્લભ મુકુન્દ મુરાન્તકેતિ ।
નામાવલીં વિમલ-મૌક્તિક-હાર-લક્ષ્મી-
લાવણ્ય-વઞ્ચન-કરીં કરવાણિ કણ્ઠે

કૃષ્ણ રામ મુકુન્દ વામન વાસુદેવ જગદ્ગુરો
મત્સ્ય કચ્છપ નરસિંહ વરાહ રાઘવ પાહિ મામ્ ।
દેવ-દાનવ-નારદાદિ મુનીન્દ્ર-વન્દ્ય દયાનિધે
દેવકી-સુત દેહિ મે તવ પાદ-ભક્તિમ્ અચઞ્ચલામ્

હે ગોપાલક હે કૃપા-જલ-નિધે હે સિન્ધુ-કન્યા-પતે
હે કંસાન્તક હે ગજેન્દ્ર-કરુણા-પારીણ હે માધવ ।
હે રામાનુજ હે જગત્ત્રય-ગુરો હે પુણ્ડરીકાક્ષ માં
હે ગોપી-જન-નાથ પાલય પરં જાનામિ ન ત્વાં વિના

શ્રી-નારાયણ પુણ્ડરીક-નયન શ્રી-રામ સીતા-પતે
ગોવિન્દાચ્યુત નન્દ-નન્દન મુકુન્દાનન્દ દામોદર ।
વિષ્ણો રાઘવ વાસુદેવ નૃહરે દેવેન્દ્ર-ચૂડામણે
સંસારાર્ણવ-કર્ણ-ધારક હરે શ્રી-કૃષ્ણ તુભ્યં નમઃ

ભાણ્ડીરેણ શિખણ્ડ-મણ્ડન વર શ્રીખણ્ડ-લિપ્તાઙ્ગ હે
વૃન્દારણ્ય-પુરન્દર સ્ફુરદ્-અમન્દેન્દીવર શ્યામલ ।
કાલિન્દી-પ્રિય નન્દ-નન્દન પરાનન્દારવિન્દેક્ષણ
શ્રી-ગોવિન્દ મુકુન્દ સુન્દર-તનો માં દીનમ્ આનન્દય

(પદ્યાવલી 33-38)
સમુદ્ર-મેખલે દેવિ પર્વત-સ્તન-મણ્ડલે ।
વિષ્ણુ-પત્નિ નમસ્ તુભ્યં પાદ-સ્પર્શં ક્ષમસ્વ મે

તતો બહિર્ ગત્વા મૈત્ર-કૃત્યાદિ-વિધિં કુર્યાત્, દન્ત-ધાવનાદિમ્ આચરેત્, શુદ્ધઆસને પૂર્વાભિમુખી ઉપવિશ્ય નિશ્ચલ-મનાઃ -
સ્મરેત્ શ્રીમદ્ ગૌર-ચન્દ્રં સ્વર્ધુન્યા દક્ષિણે તટે ।
ચિન્તામણિ-ચિત્ત-ધામ્નિ શ્રી-નવદ્વીપ-નામકે

સ્વર્ધુન્યાં ચારુ-તીરે સ્ફુરિતમ્ અતિબૃહત્-કુર્મ-પૃષ્ઠાભ-ગાત્રં
રમ્યારામાવૃતં સન્મણિ-કનક-મહા-સદ્મ-ષણ્ડૈઃ પરીતમ્ ।
નિત્યં પ્રત્યાલયોદ્યત્-પ્રણય-ભર-લસત્-કૃષ્ણ-સંકીર્તનાટ્યં
શ્રી-વૃન્દાટવ્ય્ અભિન્નં ત્રિ-જગદ્ અનુપમં શ્રી-નવદ્વીપમ્ ઈડે

ફુલ્લચ્-છ્રીમદ્ દ્રુમ-વલ્લી-તલ્લજ-લસત્-તીરા તરઙ્ગાવલી-
રમ્યા મન્દ-મરુમ્-મરાલ-જલજ-શ્રેણિષુ ભૃઙ્ગાસ્પદમ્ ।
સદ્-રત્નાચિત-દિવ્ય-તીર્થ-નિવહા શ્રી-ગૌર-પાદામ્બુજ-
ધૂલિ-ધૂસરિતાઙ્ગ-ભાવ-નિચિતા ગઙ્ગાસ્તિ સમ્પાવની

તસ્યાસ્ તીર-સુરમ્ય-હેમ-સુરસા-મધ્યે લસચ્ છ્રી-નવ-
દ્વીપો ભાતિ સુમઙ્ગલો મધુ-રિપોર્ આનન્દ-વન્યો મહાન્ ।
નાના-પુષ્પ-ફલાઢ્ય-વૃક્ષ-લતિકારમ્યો મહત્ સેવિતો
નાના-વર્ણ-વિહઙ્ગમાલિ-નિનદૈર્ હૃત્-કર્ણ-હારી હિ યઃ

કાણ્ડં મારકતં પ્રભૂત-વિટપી-શાખા સુવર્ણાત્મિકા
પત્રાલિઃ કુરુવિન્દ-કોમલ-મયી પ્રાવાલિકાઃ કોરકાઃ ।
પુષ્પાણાં નિકરઃ સુહીરક-મયો વૈદૂર્યકીયા ફલ-
શ્રેણી યસ્ય સ કો ઽપિ શાખિ-નિકરો યત્રાતિમાત્રોજ્જ્વલઃ

તન્ મધ્યે દ્વિજ-ભવ્ય-લોક-નિકરાગારાલિ-રમ્યાઙ્ગનમ્
આરામોપવનાલિ-વિલસદ્ વેદી-વિહારાસ્પદમ્ ।
સદ્-ભક્તિ-પ્રભયા વિરાજિત-મહા-ભક્તાલિ-નિત્યોત્સવં
પ્રત્ય્ આગારમ્ અઘારિ-મૂર્તિ-સુમહદ્-ભાતીહ યત્ પત્તનમ્

એવંભૂતે શ્રી-નવદ્વીપ-મધ્યે મનસિ નિવાસં કૃત્વા તત્ર શ્રી-ગુરુદેવસ્ય શય્યોત્થાન-મુખ-પ્રક્ષાલન-દન્ત-ધાવનાદિ-ક્રમેણ યથા-યોગ્યં સેવાં કુર્યાત્ સેવાનન્તરં ધ્યાયેત્ યથા યામલે--
તત્ર શ્રી-ગુરુ-ધ્યાનમ્--
કૃપા-મરન્દાન્વિત-પાદ-પઙ્કજં
શ્વેતામ્બરં ગૌર-રુચિં સનાતનમ્ ।
શન્દં સુમાલ્યાભરણં ગુણાલયં
સ્મરામિ સદ્-ભક્તમ્ અહં ગુરું હરિમ્

શ્રી-ગુરુ-પરમ-ગુરુ-પરાત્પર-ગુરુ-પરમેષ્ઠિ-ગુરૂણામ્ અનુગામિત્વેન શ્રીમન્ મહાપ્રભોર્ મન્દિરં ગચ્છેત્ ।
તત્ર તદ્-આજ્ઞયા શ્રી-નવદ્વીપ-ચન્દ્રસ્ય શય્યોત્થાનં સુવાસિત-જલેન શ્રી-મુખ-પ્રક્ષાલનાદિ-ક્રમેણ સેવાં કુર્યાત્ ।
તત્ર શ્રીમન્ મહાપ્રભોર્ ધ્યાનં યથા ઊર્દ્ધ્વામ્નાયે (3.15)--
દ્વિ-ભુજં સ્વર્ણ-રુચિરં વરાભય-કરં તથા ।
પ્રેમાલિઙ્ગન-સમ્બદ્ધં ગૃણન્તં હરિ-નામકમ્

અનન્તરં શ્રી-વૃન્દાવનં ધ્યાયેત્--
વૃન્દાવનં દિવ્ય-લતા-પરીતં
લતાશ્ ચ પુષ્પ-સ્ફુરિતાગ્ર-ભાજઃ ।
પુષ્પાણ્ય્ અપિ સ્ફીત-મધુ-વ્રતાનિ
મધુ-વ્રતાશ્ શ્રુતિ-હારિ-ગીતાઃ

મધ્યે વૃન્દાવને રમ્યે પઞ્ચાશત્-કુઞ્જ-મણ્ડિતે ।
કલ્પ-વૃક્ષ-નિકુઞ્જે તુ દિવ્ય-રત્ન-મયે ગૃહે

તત્ર સિદ્ધ-દેહેન શ્રી-રાધા-કૃષ્ણયોર્ નિશાન્ત-લીલાં સ્મરેદ્ યથા--
નિશાવસાને શ્રી-રાધા-કૃષ્ણૌ શ્રી-વૃન્દા-નિયુક્ત-રસમય-પરમ-વિદગ્ધ-શુક-શારિ-વૃન્દ-પદ્ય-પઠન-જનિત-પ્રબોધાવ્ અપિ ગાઢોપગૂહન-સુખ-ભઙ્ગાદ્ અસહિષ્ણુતયા ક્ષણમ્ અવકાશ્યમાન-જાગરૌ તત્-તત્-પદ્ય-પ્રપઠિત-નિશાવસાન-સાતઙ્કૌ પુષ્પમયાનન્દ-તલ્પોત્થિતૌ સ્વ-સ્વ-કુઞ્જાત્ તત્-કાલાગત-શ્રીમલ્-લલિતા-વિશાખાદિ-પ્રિય-સખી-વૃન્દ-સનર્મ-વાગ્-વિલાસેન સાન્તરાનન્દૌ કક્ખટ્ય્-ઉદિત-જટિલા-શ્રવણાત્ સ-શઙ્કૌ સઙ્ગ-ત્યાગ-ભયમ્
અસહમાનૌ તૌ ભીત્યોત્કણ્ઠાકુલૌ સ્વ-સ્વ-ગૃહં ગચ્છતઃ ।
એવં ક્રમેણ શ્રી-ગૌરચન્દ્રસ્ય શ્રી-રાધા-કૃષ્ણયોર્ લીલાં સ્મરેત્ ।
નિશાન્ત-લીલા-સ્મરણાનન્તરં ગુર્વ્-આદીન્ દણ્ડવત્ પ્રણમેત્ યથા--
અજ્ઞાન-તિમિરાન્ધસ્ય જ્ઞાનાઞ્જન-શલાકયા ।
ચક્ષુર્ ઉન્મીલિતં યેન તસ્મૈ શ્રી-ગુરવે નમઃ

ઇતિ મન્ત્રં પઠિત્વા શ્રી-ગુરું દણ્ડવત્ પ્રશમ્ય એવં પરમ-ગુરુ-પરાત્પર-ગુરુ-પરમેષ્ઠિ-ગુરુ-ગોસ્વામિ-ચરણાન્ ક્રમેણ દણ્ડવત્ પ્રણમેત્ ।
તતઃ શ્રી-ગૌરચન્દ્રં પ્રણમેત્--
વિશ્વમ્ભરાય ગૌરાય ચૈતન્યાય મહાત્મને ।
શચી-પુત્રાય મિત્રાય લક્ષ્મીશાય નમો નમઃ