ગરુડ પુરાણ · અધ્યાય 1.9

ઇતિ શ્રીગારુડે મહાપુરાણે પૂર્વખણ્ડે પ્રથમાંશાખ્યે આચારકાણ્ડે વિષ્ણુપૂજોપયોગિવજ્રનાભમણ્ડલનિરૂપણં નામાષ્ટમો ઽધ્યાયઃ
શ્રીગરુડમહાપુરાણમ્- 9
હરિરુવાચ ।
સમયે (યા) દીક્ષિતઃ શિષ્યો બદ્ધનેત્રસ્તુ વાસસા ।
અષ્ટાહુતિશતં તસ્ય મૂલમન્ત્રેણ હોમયેત્

દ્વિગુણં પુત્રકે હોમં ત્રિગુણં સાધકે મતમ્ ।
નિર્વાણદેશિકે રુદ્ર ! ચતુર્ગુણમુદાહૃતમ્

ગુરુવિષ્ણુદ્વિજસ્ત્રીણાં હન્તા બધ્યસ્ત્વ(શ્ચ)દીક્ષિતૈઃ ।
અથ દીક્ષાં પ્રવક્ષ્યામિ ધર્માધર્મક્ષયઙ્કરીમ્

ઉપવેશ્ય બહિઃ શિષ્યાન્ધારણં તેષુ કારયેત્ ।
વાયવ્યા કલયા રુદ્ર શોષ્યમાણાન્વિચિન્તયેત્

આગ્રેય્યા દહ્યમાનાંશ્ચ પ્લાવિતાનમ્ભસા પુનઃ ।
તેજસ્તેજાસિ તં જીવમેકીકૃત્ય સમાક્ષિપેત્

પ્રાણવં ચિન્તયેવ્દ્યોમ્નિ શરીરે ઽન્યત્તુ કારણમ્ ।
એકૈકં યો જયેત્તત્ર ક્ષેત્રજ્ઞં દેહકારણાત્

ઉત્પાદ્ય યોજયેત્પશ્ચાદેકૈકં વૃષભધ્વજ ।
મણ્ડલાદિષ્વશક્તસ્તુ કલ્પયિત્વાર્ઽચયેદ્ધરિમ્

ચતુર્દ્વારં ભવેત્તચ્ચ બ્રહ્મતીર્થાદનુક્રમાત્ ।
હસ્તં પદ્મં સમાખ્યાતં પત્રાણ્યઙ્ગુલયઃ સ્મૃતાઃ

કર્ણિકા તલહસ્તન્તુ નખાન્યસ્ય તુ કેસરાઃ ।
તત્રાર્ચયેદ્ધરિં ધ્યાત્વા સૂર્યન્દ્વગ્નયન્તરેવ ચ

તં હસ્તં પાતયેન્મૂર્ધ્નિ શિષ્યસ્ય તુ સમાહિતઃ ।
હસ્તે વિષ્ણુઃ સ્થિતો યસ્માદ્વિષ્ણુહસ્તસ્તતસ્ત્વયમ્ ।
નશ્યન્તિ સ્પર્શનાત્તસ્ય પાતકાન્યખિલાનિ ચ

ગુરુઃ શિષ્યં સમભ્યર્ચ્ય નેત્રે બદ્ધે તુ વાસસા ।
દેવસ્ય પ્રમુખં કૃત્વા પુષ્પમેવાર્પયેત્તતઃ ।
પુષ્પં નિપતિતં યત્ર મૂર્ધ્નો દેવસ્ય શાર્ઙ્ગિણઃ

તન્નામ કારયેત્તસ્ય સ્ત્રીણાં નામાઙ્કિતં સ્વયમ્ ।
શૂદ્રાણાં દાસસંયુક્તં કારયેત્તુ વિચક્ષણઃ