ગર્ગસંહિતા · અધ્યાય 9.5

ભક્ત્યુત્કર્ષમ્
શ્રીવેદવ્યાસ ઉવાચ -
વત્સાઘધેનુકબકીબકકેશિકાલા-
રિષ્ટપ્રલંબ-કપિબલ્વલ-શઙ્ખશાલ્વાઃ ॥
વૈરેણ યં કિમુત ભક્તિયુતા નરેન્દ્ર
પ્રાપુઃ પરં પ્રકૃતિપૂરુષયોઃ પુમાંસમ્

પૂર્વાસુરાવતિબલૌ મધુકૈટભાખ્યૌ
સ્વર્ણાક્ષહેમકશિપૂ ચ તથાપરૌ ચ ॥
વૈરં વિધાય નૃપ રાવણકુંભકર્ણૌ
વિષ્ણોઃ કિલાપતુરલં પરમં પદં હિ

કે કે ન વિષ્ણૂપદમાગતવંત આદૌ
પ્રહ્લાદ-બાણ-બલિ-યક્ષવિભીષણાદ્યાઃ ॥
સત્સંગસંગનિરતા બહુમાનપાત્ર-
શ્રીમત્પદાબ્જ-મકરંદરજોવિલુબ્ધાઃ

દેવર્ષિગીષ્પતિવસિષ્ઠ-પરાશરાદ્યાઃ
સાંખ્યાયનાસિતશુકાઃ સનકાદયશ્ચ ॥
નિષ્કારણા ભુવિ ચરંત્યરવિંદનેત્ર-
પાદારવિંદમકરંદ-મિલિન્દમુખ્યાઃ

યત્યુત્કાલાંગ-ભરતાર્જુનમૈથિલાશ્ચ
ગાધિપ્રિયવ્રત-યદુપ્રમુખાંબરીષા ॥
નિષ્કારણાઃ પરમહંસવરાશ્ચારન્તિ
શ્રીકૃષ્ણચન્દ્રચરિતામૃતપાનમત્તાઃ

મંદોદરી ચ શબરી ચ મતંગશિષ્યા-
સ્તારા તથાત્રિવનિતા નિપુણા ત્વહલ્યા ॥
કુન્તી તથા દ્રુપદરાજસુતા સુભક્તા
એતાઃ પરં પરમહંસસમાઃ પ્રસિદ્ધાઃ

સુગ્રીવવાલિસુતવાતસુતર્ક્ષરાજ-
નાગારિગૃધ્રવરકાકભુશુણ્ડિમુખ્યાઃ ॥
કુબ્જાદિવાયક-સુદામગુહાદાયોઽન્યે
તત્સંગમેત્ય હરિભક્તવરા બભૂવુઃ

કૃષ્ણં ન રોધયતિ ધર્મ તપો ન યોગઃ
સાંખ્યં ન યજ્ઞ ઉત તીર્થયમવ્રતાનિ ॥
છન્દાંસિ પૂર્તનિયમાવથ દક્ષિણા ચ
નેષ્ટં ન દાનમથ ભક્તિમૃતે ન કશ્ચિત્

યજ્ઞવ્રતાધ્યયન-તીર્થતપોનિયોગૈ-
રિષ્ટસ્વધર્મનિયમાદિક-સાંખ્યયોગૈઃ ॥
યત્પ્રાપ્યતે તદખિલં ભવતીહ ભક્ત્યા
ભક્તેઃપદં હિ કર્હિચિન્ન ભવેત્કિલૈભિઃ

ઉદ્ધારિણી યમપુરસ્ય ચ વિશ્વરૂપા-
દુત્તારિણી ભવમહાર્ણવવારિવેગાત્ ॥
સંહારિણી વિષયસંચિતકર્મણા ચ
સત્કારિણી હરિપદસ્ય પરાત્પરસ્ય

શ્રીકૃષ્ણદર્શન-રસોત્સુકભાવરાજ-
દુદ્યદ્‌વસંતપરમોત્સવપંચમીયમ્ ॥
દિવ્યા લતાતિફલ-પલ્લવભારનમ્રા
સંરાજતે હિ સતતં કુસુમાકરસ્ય

સંમોહકાલઘનમધ્ય-તડિત્સ્ફુરન્તી
શાસ્ત્રાર્થદર્શવચસાં પદદીપિકેયમ્ ॥
દીપાવલિર્વિજયતે જયકાર્તિકસ્ય
જેતું ગુણાન્ વિજયિનો દશમી જયસ્ય

સાંખ્યં ચ યોગ ઇતિ પાર્શ્વગતે હિ દંડે
કીલાનિ ચાત્ર શતશો ગુણભાવભેદાઃ ॥
અસ્યા ક્રમાન્નવકથાશ્રવણાદયશ્ચ
શ્રેણીયમસ્તિ સરલા ભગવત્પદસ્ય

ઇતિ શ્રીગર્ગસંહિતાયાં વિજ્ઞાનખંડે શ્રીવ્યાસોગ્રસેનસંવાદે
ભક્ત્યુત્કર્ષવર્ણનં નામ પંચમોઽધ્યાયઃ