ગર્ગસંહિતા · અધ્યાય 8.12

બલભદ્રખણ્ડઃ - દ્વાદશોઽધ્યાયઃ
બલરામ કવચમ્ -
દુર્યોધન ઉવાચ -
ગોપીભ્યઃ કવચં દત્તં ગર્ગાચાર્યેણ ધીમતા ॥
સર્વરક્ષાકરં દિવ્યં દેહિ મહ્યં મહામુને

પ્રાડ્‌વિપાક ઉવાચ -
સ્નાત્વા જલે ક્ષૌમધરઃ કુશાસનઃ
પવિત્રપાણિઃ કૃતમન્ત્રમાર્જનઃ ॥
સ્મૃત્વાથ નત્વા બલમચ્યુતાગ્રજં
સંધારયેદ્ધર્મસમાહિતો ભવેત્

ગોલોકધામાધિપતિઃ પરેશ્વરઃ
પરેષુ માં પાતુ પવિત્રકીર્તનઃ ॥
ભૂમણ્ડલં સર્ષપવદ્વિલક્ષ્યતે
યન્મૂર્ધ્નિ માં પાતુ સ ભૂમિમણ્ડલે

સેનાસુ માં રક્ષતુ સીરપાણિ-
ર્યુદ્ધે સદા રક્ષતુ માં હલી ચ ॥
દુર્ગેષુ ચાવ્યાન્મુસલી સદા માં
વનેષુ સંકર્ષણ આદિદેવઃ

કલિંદજાવેગહરો જલેષુ
નીલાંબરો રક્ષતુ માં સદાગ્નૌ ॥
વાયૌ ચ રામોઽવતુ ખે બલશ્ચ
મહાર્ણવેઽનન્તવપુઃ સદા મામ્

શ્રીવાસુદેવોઽવતુ પર્વતેષુ
સહસ્રશીર્ષા ચ મહાવિવાદે ॥
રોગેષુ માં રક્ષતુ રૌહિણેયો
માં કામપાલોઽવતુ વા વિપત્સુ

કામાત્સદા રક્ષતુ ધેનુકારિઃ
ક્રોધત્સદા માં દ્વિવિદપ્રહારી ॥
લોભાત્સદા રક્ષતુ બલ્વલારિ-
ર્મોહાત્સદા માં કિલ માગધારિઃ

પ્રાતઃ સદા રક્ષતુ વૃષ્ણિધુર્યઃ
પ્રાહ્ણે સદા માં મથુરાપુરેન્દ્રઃ ॥
મધ્યન્દિને ગોપસખઃ પ્રપાતુ
સ્વરાટ્ પરાહ્ણેઽવતુ માં સદૈવ

સાયં ફણીંદ્રોઽવતુ માં સદૈવ
પરાત્પરો રક્ષતુ માં પ્રદોષે ॥
પૂર્ણે નિશીથે ચ દુરન્તવીર્યઃ
પ્રત્યૂષકાલેઽવતુ માં સદૈવ

વિદિક્ષુ માં રક્ષતુ રેવતીપતિ-
ર્દિક્ષુ પ્રલંબારિરધો યદૂદ્વહઃ ॥
ઊર્ધ્વં સદા માં બલભદ્ર આરા-
ત્તથા સમન્તાદ્‌બલદેવ એવ હિ

અન્તઃ સદાવ્યાત્પુરુષોત્તમો બહિ-
ર્નાગેન્દ્રલીલોઽવતુ માં મહાબલઃ ॥
સદાંતરાત્મા ચ વસન્ હરિઃ સ્વયં
પ્રપાતુ પૂર્ણઃ પરમેશ્વરો મહાન્

દેવાસુરાણાં ભયનાશનં ચ
હુતાશનં પાપચયેન્ધનાનામ્ ॥
વિનાશનં વિઘ્નઘટસ્ય વિદ્ધિ
સિદ્ધાસનં વર્મવરં બલસ્ય

ઇતિ શ્રીગર્ગસંહિતાયાં બલભદ્રખણ્ડે
સ્તોત્રકવચવર્ણનં નામ દ્વાદશોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા