ગર્ગસંહિતા · અધ્યાય 7.49

રાજસૂયયજ્ઞે ઉગ્રસેનકૃતં સ્વજનનિમન્ત્રણમ્
બહુલાશ્વ ઉવાચ -
કથં ચકાર વિધિવદ્‌રાજસૂયાધ્વરં નૃપઃ ॥
એતન્મે બ્રૂહી વિપ્રેન્દ્ર ત્વં પરાવરવિત્તમઃ

શ્રીનારદ ઉવાચ -
અથોગ્રસેનો નૃપતિઃ સર્વધર્મભૃતાં વરઃ ॥
શ્રીકૃષ્ણેન સહાયેન ક્રતુરાજં ચકાર હ

ગર્ગાદ્યદુકુલાચાર્યાન્મુહૂર્તં બોધ્ય યત્‍નતઃ ॥
બંધુભ્યઃ પ્રદદૌ રાજન્સુહૃદ્‌ભ્યોઽપિ નિમંત્રણમ્

ભક્ત્યા પરમયાઽઽહૂતા ઋષયો મુનયો દ્વિજાઃ ॥
આજગ્મુર્દ્વારકાં સર્વે પુત્રશિષ્યૈઃ સમાવૃતાઃ

વેદવ્યાસઃ શુકઃ સાક્ષાન્મૈત્રેયોઽથ પરાશરઃ ॥
પૈલઃ સુમંતુર્દુર્વાસા વૈશંપાયન ઇત્યપિ

જૈમિનિર્ભાર્ગવો રામો દત્તાત્રેયોઽસિતો મુનિઃ ॥
અંગિરા વામદેવોઽત્રિર્વસિષ્ઠઃ કણ્વ એવ ચ

વિશ્વામિત્રઃ શતાનન્દો ભારદ્વાજોઽથ ગૌતમઃ ॥
કપિલઃ સનકાદ્યાશ્ચ વિભાંડશ્ચ પતઞ્જલિઃ

દ્રોણઃ કૃપઃ પ્રાડ્‌વિપાકઃ શાંડિલ્યો મુનિસત્તમઃ ॥
અન્યે ચ મુનયો રાજન્સશિષ્યાશ્ચ સમાગતાઃ

બ્રહ્મા શિવો જંભભેદી દેવા રુદ્રગણાસ્તથા ॥
આદિત્યા મરુતઃ સર્વે વસવો હ્યગ્નયોઽશ્વિનૌ

યમોઽથ વરુણઃ સોમો ધનદો ગણનાયકઃ ॥
સિદ્ધા વિદ્યાધરાશ્ચૈવ ગંધર્વાઃ કિન્નરાદયઃ

ગંધર્વાપ્સરસઃ સર્વા વિદ્યાધર્ય્યઃ સમાગતાઃ ॥
વેતાલા દાનવા દૈત્યાઃ પ્રલ્હાદો બલિના સહ

રક્ષોભિર્ભીષણૈઃ સાર્દ્ધં લંકાધીશો વિભીષણઃ ॥
સર્વૈશ્ચ વાનરૈઃ સાર્દ્ધં હનુમાન્ વાયુનન્દનઃ

ઋક્ષૈશ્ચ દંષ્ટ્રિભિઃ સાર્દ્ધં જાંબવાનૃક્ષરાડ્બલી ॥
સર્વૈશ્ચ પક્ષિભિઃ સાર્દ્ધં ગરુડઃ પક્ષિરાડ્બલી

સર્વૈઃ સરીસૃપૈઃ સાર્દ્ધં વાસુકિર્નાગરાડ્બલી ॥
ગોરૂપધારિણી પૃથ્વી સર્વાભિઃ કામધેનુભિઃ

સર્વૈઃ શૈલૈર્મૂર્તિમદ્‌ભિઃ સુમેરુશ્ચ હિમાચલઃ ॥
ગુલ્મવૃક્ષલતાભિશ્ચ વટઃ સાક્ષાત્પ્રયાગરાટ્

મહાનદીભિઃ સહિતા શ્રીગંગા યમુનાનદી ॥
પારાવારાઃ સપ્ત તથા રત્‍નોપાયનસંયુતાઃ

આજગ્મુરુગ્રસેનસ્ય રાજસૂયસ્ય ચાધ્વરે ॥
સપ્તસ્વરાસ્ત્રયો ગ્રામા નવારણ્યા નવોષરાઃ

ચતુર્દશૈવ ગુહ્યાનિ વિખ્યાતાનિ મહીતલે ॥
તીર્થરાજઃ પ્રયાગશ્ચ પુષ્કરં બદ્રિકાશ્રમઃ

સિદ્ધાશ્રમો વિનશનં કુણ્ડૈઃ સર્વૈઃ સરોવરૈઃ ॥
વનાનિ દણ્ડકાદીનિ સર્વૈશ્ચોપવનૈઃ સહ

ક્ષેત્રૈઃ સમગ્રૈર્વિમલૈરેતે તત્ર સમાયયુઃ ॥
શ્રીમદ્‌ગોવર્ધનો નામ ગિરિરાજો વ્રજાદ્ધરિમ્

વૃન્દાવનવ્રજવનૈઃ સરઃ કુણ્ડૈઃ સમાયયૌ ॥
કીર્તિર્યશોમતિઃ સાક્ષાદ્‌ગોપીભિર્ગોપિકેશ્વરી

શ્રીરાધા શિબિકારૂઢા સખીસંઘૈશ્ચ કોટિભિઃ ॥
શતયૂથશ્ચ ગોપીનાં દ્વારકાં પ્રયયૌ મુદા

તાસાં વાસો યત્ર યત્ર ગોપીભૂમિશ્ચ સાભવત્ ॥
તદંગરાજ સંજાતં ગોપીચન્દનમેવ હિ

ગોપીચંદનલિપ્તાંગો નરો નારાયણો ભવેત્ ॥
ચતુર્વર્ણાસ્તથા સર્વે આજગ્મુસ્તસ્ય ચાધ્વરે

ધૃતરાષ્ટ્રો બુદ્ધિચક્ષુઃ સાક્ષદ્‍દુર્યોધનઃ કલિઃ ॥
શાલ્વો ભીષ્મશ્ચ કર્ણશ્ચ કુન્તીપુત્રો યુધિષ્ઠિરઃ

ભીમોઽર્જુનોઽથ નકુલઃ સહદેવસ્તથાપરે ॥
દમઘોષો વૃદ્ધશર્મા જયસેનો મહાનૃપઃ

ધૃષ્ટકેતુર્ભીષ્મકશ્ચ નાગ્નજિત્કૌશલેશ્વરઃ ॥
બૃહત્સેનો ધૃતિઃ સાક્ષાન્મૈથિલેશઃ પિતામહઃ

અન્યેઽપિ તત્ર રાજાનઃ સુહૃત્સંબંધિબાંધવાઃ ॥
સહસ્ત્રીભિસ્તથા પૌત્રેઃ પુત્રૈરાજગ્મુરધ્વરમ્

ઇતિ શ્રીગર્ગસંહિતાયાં શ્રીવિશ્વજિત્ખણ્ડે શ્રીનારદબહુલાશ્વસંવાદે
સ્વજનનિમંત્રણં નામૈકોનપંચાશત્તમોઽધ્યાયઃ