ગર્ગસંહિતા · અધ્યાય 7.45

રાગરાગિણીકૃતં કૃષ્ણધ્યાનમ્
શ્રીનારદ ઉવાચ -
ભૈરવાદ્યા રાગગણાઃ પુરઃ પ્રાપ્તા હરેઃ પ્રભોઃ ॥
રૂપાનુરૂપાવયવાં તનું દૃષ્ટ્વાતિહર્ષિતાઃ

યત્ર યત્ર ચ તેષાં વૈ દૃષ્ટિઃ પ્રાપ્તા હરેસ્તનૌ ॥
તત્ર સ્થિતા ચ નિર્ગન્તું લાવણ્યાન્ન શશાક હ

અહો શ્રીકૃષ્ણચન્દ્રસ્ય રૂપમત્યદ્‌ભુતં હરેઃ ॥
દૃષ્ટોપવર્ણનં તસ્ય ચક્રુસ્તેઽપિ પૃથક્ પૃથક્

ભૈરવ ઉવાચ -
ભજ હરિજાનુદ્વયમિતિ લક્ષ્મીઃ ॥
ભજતિ સદાંકે કમલકરાભ્યામ્

મેઘમલ્લાર ઉવાચ -
ઊરૂ વિષ્ણો રમ્ભાખંડૌ હેમસ્તંભૌ ધ્યાયે વંદ્યૌ ॥
ઓજઃ પૂર્ણૌ શોભાયુક્તૌ વસ્ત્રપીતૌ કૃષ્ણસ્યોભૌ

દીપક ઉવાચ -
સકલસુખકરં કનકરુચિધરમ્ ॥
પ્રથિતહરિપદં ભજત કટિતલે

માલકોશ ઉવાચ -
કટી કેશવાદ્યા હરેરસ્તિ તત્ર
નૃણાં નેત્રયોર્દૃષ્ટિમાનં હરંતિ ॥
પરં કંપિતા મંદગચ્છત્સમીરૈઃ
સુનમ્રેણ સા સર્વચેતોહરેત્થમ્

શ્રીરાગ ઉવાચ -
નાભેઃ સરઃ પુષ્કરકુણ્ડવચ્ચ
તલ્લસત્ત્રિવલ્લ્યૂર્મિમનોહરં પદમ્ ॥
રોમાવલિપ્રોજ્ઝિતકામકાનનં
ભજામિ નિત્યં હૃદિ રાધિકાપતેઃ

હિંડોલ ઉવાચ -
અક્ષરપંક્તિઃ કિંન્વલિપંક્તિઃ પિપ્પલપત્રે મોહનમાલા ॥
કિં કમલે યચ્છ્યામલરેખા કિં હ્યુદરે રોમાવલિરેખા

ભૈરવરાગિણ્ય ઊચુઃ
પીતપટં યત્કૃષ્ણહરેરિંદ્રધનુર્વદ્દીપ્તિયુતમ્ ॥
કાઞ્ચનશિલ્પૈશ્ચારુચિતદ્‌ભજન્નૄણાં દુઃખહરમ્

ભૈરવપુત્રા ઊચુઃ
ચતુઃસમુદ્રા ઇવ વિશ્વપૂરકા આનન્દદા એવ ચતુષ્પદાર્થવત્ ॥
તે બાહવો લોકવિતાનદણ્ડવજ્જયન્તિ ભૂધારણદિગ્ગજા ઇવ

મેઘમલ્લારરાગિણ્ય ઊચુઃ
અરુણબિંબફલદ્યુતિમણ્ડિતં
ભજ હરેરધરં મધુરં મનઃ ॥
નવજપાદલમલ્લસુવિગ્રહં
સકલવલ્લભભૂમિપતેઃ પ્રભોઃ

મેઘમલ્લારપુત્રા ઊચુઃ
કર્પૂરકેતકસુમૌક્તિકહીરકાણાં
શ્રીખંડચંદ્રચપલામૃતમલ્લિકાનમ્ ॥
તેષાં રુચેશ્ચ પરિભાવમકારિ પૂર્વં
યા દંતપંક્તિરમલા સ્મરતાં પરસ્ય

દીપકરાગિણ્ય ઊચુઃ
નયનયુગલજાતં પાતુ નોઽહર્નિશં તે
મદનશરપરોક્ષં સર્વલાવણ્યદીક્ષમ્ ॥
પરિહૃતસુરવૃક્ષં કોટિશો લક્ષલક્ષં
નિજજનકૃતરક્ષં દાનદક્ષં કટાક્ષમ્

દીપકપુત્રા ઊચુઃ
કિં વા કુલિંગયુગલં નવપદ્મમધ્યે
દુઃખક્ષાયાય વસતાં નિશિતાસિયુગ્મમ્ ॥
જૈત્રં ધનુર્જયતિ કિં મકરધ્વજસ્ય
ભ્રૂમણ્ડલં કિમથ ચંદ્રમુખે પરસ્ય

માલકોશરાગિણ્ય ઊચુઃ
પરિનૃત્યતિ ઇન્દુમંડલે ફણિપત્‍ન્યાવિવ લોલકુણ્ડલે ॥
કમલે મકરન્દનિર્ભરે ભ્રમરાલીવ સુગણ્ડમણ્ડલે

માલકોશપુત્રા ઊચુઃ
રવિરેવ ખમણ્ડલે કિમુ યદુભર્તુસ્ત્વથવા ઘને તડિત્ ॥
અધિતિષ્ઠતિ ગણ્ડમણ્ડલં દ્યુતિખણ્ડં કલધૌતકુણ્ડલમ્

શ્રીરાગિણ્ય ઊચુઃ
કલિંગયોઃ ખંજનયોઃ કિલારાદાપત્યતાં યુદ્ધમભૂદલીનામ્ ॥
તેષાં ગતઃ કીર ઉષઃપ્રફુલ્લે ચકાસ્તિ પદ્મેઽરુણબિંબલિપ્સુઃ

શ્રીરાગપુત્રા ઊચુઃ
પરિકરીકૃતપીતપટં હરિં શિખિકિરીટનતીકૃતકંધરમ્ ॥
લગુડવેણુકરં ચલકુંડલં પટુતરં નતવેષધરં ભજે

હિંડોલરાગિણ્ય ઊચુઃ
અતસીકુસુમોપમેયકાંતિ-ર્યમુનાકૂલકદમ્બમધ્યવર્તી ॥
નવગોપવધૂવિહારશાલી વનમાલી વિતનોતુ મંગલાનિ

હિંડોલપુત્રા ઊચુઃ -
હરે મત્સમઃ પાતકી નાસ્તિ ભૂમૌ તથા ત્વત્સમો નાસ્તિ પાપાપહારી ॥
ઇતિ ત્વાં ચ મત્વા જગન્નાથદેવં યથેચ્છા ભવેત્તે તથા માં કુરુ ત્વમ્

શ્રીનારદ ઉવાચ -
ઇતિ રાગકૃતં ધ્યાનં યઃ શૃણોતિ પઠેત્સદા ॥
તન્નેત્રગોચરો યાતિ ભગવાન્ ભક્તવત્સલઃ

ઇત્થં સ્વં દર્શનં દત્વા વેદાદિભ્યો હરિઃ સ્વયમ્ ॥
બભૂવ પશ્યતં તેષાં શાર્ઙ્‌ગપાણિશ્ચતુર્ભુજઃ

કૃત્વા તુ દર્શનં વિષ્ણોર્ગતે દેવે ગણૈઃ સહ ॥
સૈન્યે સુતં શંબરારિં સ્થાપયિત્વા યદૂત્તમમ્

દ્વારકાં સ્વાં પુરીં ગંતું મનશ્ચક્રે પરાત્પરઃ

મઞ્જીરઘંટાકલકિંકિણીકલં
સુકાંસ્યપાત્રધ્વનિના રથેન ॥
સુગ્રીવમુખ્યૈઃ સ ચ ચઞ્ચલાશ્વૈ-
ર્નિયોજિતૈર્મૈથિલ દારુકેણ

યુતેન સદ્‌રત્‍નમતા શ્રુતિસ્વનૈઃ
પ્રભંજનૈજદ્‌ગરુડધ્વજેન ॥
વિહાય તાં વેદપુરીં પરાત્મા
યયૌ પુરીં યાદવવૃંદમંડિતામ્

ઇતિ શ્રીગર્ગસંહિતાયાં શ્રીવિશ્વજિત્ખણ્ડે શ્રીનારદબહુલાશ્વસંવાદે
શ્રીકૃષ્ણધ્યાનવર્ણનં નામ પંચચત્વારિંશોઽધ્યાયઃ