ગર્ગસંહિતા · અધ્યાય 7.36

મહાનાભદૈત્યવધમ્
શ્રીનારદ ઉવાચ -
કાલનાભેઽથ પતિતે મહાન્ કોલાહલોઽભવત્ ॥
ઉષ્ટ્રારૂઢો મહાનાભો દૈત્યઃ પ્રાપ્તો રણાઙ્ગણે

મુખાદગ્નિં સમસૃજન્માયાવી દૈત્યપુંગવઃ ॥
તેનાગ્નિના ભૂમિવૃક્ષા જજ્વલુશ્ચ દિશો દશ

વીરાણાં કંચુકોષ્ણીષ-કટિબન્ધાઙ્ગરક્ષકાઃ ॥
પ્રજજ્વલુર્મહારાજ મુઞ્જપુષ્પપ્રતૂલવત્

સમુદ્રપટ્ટનભવૈઃ પીતારુણસિતાસિતૈઃ ॥
હરિતૈશ્ચિત્રવર્ણૈશ્ચ સૂક્ષ્મૈઃ કાશ્મીરજૈરપિ

હેમરત્‍નખચદ્‌ભિશ્ચ કમ્બલૈઃ સહિતા ગજાઃ ॥
પ્રજજ્વલુર્મૃધે રાજન્ વૃક્ષૈઃ શૈલા ઇવાગ્નિના

શિખા રત્‍નૈશ્ચામરૈશ્ચ હારૈર્હૈમૈઃ પરિચ્છદૈઃ ॥
ઉત્પતન્તો હયા યુદ્ધે મૃગા ઇવ દવાગ્નિના

સૈન્યં ભયાતુરં દૃષ્ટ્વા દીપ્તિમાન્ કૃષ્ણનન્દનઃ ॥
માયાવહ્નિપ્રશાંત્યર્થં પર્જન્યાસ્ત્રં સમાદધે

બાણાદ્વિનિર્ગતા મેઘાઃ સાંવર્તકગણા ઇવ ॥
વવૃષુર્જલધારાભિર્નદન્તો ભૈરવં રવમ્

આસારેણ મહારાજ પ્રાવૃટ્‍કાલોઽભવત્ક્ષિતૌ ॥
પુંસ્કોકિલાઃ કોકિલાશ્ચ મયૂરાઃ સારસાદયઃ

મંડૂકાઃ પ્રજગુર્ગીર્ભિરિદ્રગોપાશ્ચ રેજિરે ॥
ઇન્દ્રચાપેન દામિન્યા મૈથિલેન્દ્ર બભૌ નભઃ

ઇત્થં શાંતિં ગતે વહ્નૌ મહાનાભો મહાસુરઃ ॥
પ્રાહીણોન્નિશિતં શૂલં રુષા દીપ્તિમતે ત્વરમ્

શૂલં સર્પમિવાયાંતં દીપ્તિમાન્ રોહિણીસુતઃ॥
ચિચ્છેદ ત્વસિના યુદ્ધે ફણિનં ગરુડો યથા

દશંતં ચોદ્‌ભટં ચોષ્ટ્રં મહાનાભસ્ય વાહનમ્ ॥
દીપ્તિમાન્ સ્વેન ખડ્ગેન સંજઘાન રણાઙ્ગણે

દ્વિધાભૂતઃ પપાતોર્વ્યાં ખડ્ગસંછિન્નકંધરઃ ॥
જગામ પઞ્ચતામુષ્ટ્રો મહાનાભસ્ય પશ્યતઃ

મહાનાભો મહાદૈત્યો ગજમારુહ્ય વેગતઃ ॥
શૂલહસ્તઃ પુનઃ પ્રાગાન્નાદયન્વ્યોમમણ્ડલમ્

દીપ્તિમાનશ્વમારુહ્ય સૈન્ધવં ચંચલાસિતમ્ ॥
તડિત્પ્રભેણ ખડ્ગેન બભૌ શ્રીકૃષ્ણનંદનઃ

તુરંગં પાર્ષ્ણિઘાતેન પ્રોત્પતન્ ધરણીતલાત્ ॥
આરૂઢો ગજકુંભાંતં ગિરિશૃઙ્ગં યથા હરિઃ

ખડ્ગેન શિતધારેણ દીપ્તિમાન્કૃષ્ણનન્દનઃ ॥
મહાનાભસ્ય સહસા શિરઃ કાયાદપાહરત્

બાણવર્ષં પ્રકુર્વંતીં સેનાં તસ્ય દુરાત્મનઃ ॥
જઘાન દીપ્તિમાન્ સિંહો ગજયૂથં યથાસિના

કેચિત્ખડ્ગેનાભિહતાઃ શેષા દૈત્યાઃ પલાયિતાઃ ॥
દેવા દીપ્તિમતો મૂર્ધ્નિં પુષ્પવર્ષં પ્રચક્રિરે

જગુઃ કિન્નરગંધર્વા નનૃતુશ્ચાપ્સરોગણાઃ ॥
ઋષયો મુનયો દેવાસ્તુષ્ટુવુર્શ્રીહરેઃ સુતમ્

ઇતિ શ્રીગર્ગસંહિતાયાં શ્રીવિશ્વજિત્ખણ્ડે શ્રીનારદબહુલાશ્વસંવાદે
મહાનાભવધો નામ ષટ્‌ત્રિંશોઽધ્યાયઃ