ગર્ગસંહિતા · અધ્યાય 7.35

કાલનાભદૈત્યવધમ્
બહુલાશ્વ ઉવાચ -
અહો અત્યદ્‌ભુતં યુદ્ધં મુને પ્રાદ્યુમ્નિના કૃતમ્ ॥
વૃકે હતે મહાદૈત્યે કિં બભૂવ રણે પુનઃ

શ્રીનારદ ઉવાચ -
વૃકદૈત્યં હતં વીક્ષ્ય કાલનાભો મહાસુરઃ ॥
ક્રોડારૂઢો રણં પ્રાગદ્ધનુષ્ટંકારયન્મુહુઃ

અક્રૂરં બાણવિંશત્યા ગદં ચ દશભિઃ શરૈઃ ॥
અર્જુનં દશભિર્બાણૈર્યુયુધાનં ચ પઞ્ચભિઃ

દશભિઃ કૃતવર્માણં કાર્ષ્ણિં બાણશતેન વૈ ॥
અનિરુદ્ધં ચ વિંશત્યા દીપ્તિમંતં ચ પઞ્ચભિઃ

સાંબં ચ શતબાણૈશ્ચ વિવ્યાધ સમરેઽસુરઃ ॥
તદ્‌બાણૈર્વ્યાકુલા વીરા બભૂવુર્ઘટિકાદ્વયમ્

હયાશ્ચ પઞ્ચતાં પ્રાપ્તાશ્ચૂર્ણીભૂતા રણાંગણે ॥
તદ્ધસ્તલાઘવં દૃષ્ટ્વા પ્રસન્નો રુક્મિણીસુતઃ

કાલનાભં સાધુપદૈઃ પૂજયામાસ સંગરે ॥
પ્રદ્યુમ્નઃ સ્વં ધનુર્નીત્વા બાણમેકં સમાદધે

કોદણ્ડમુક્તો વિશિખસ્તત્ક્રોડં દીર્ઘરૂપિણમ્ ॥
સમુન્નીય ભ્રામયિત્વા સ્વર્લોકે લક્ષયોજનમ્

આકાશાત્પાતયામાસ સમુદ્રે ભીમનાદિનિ ॥
પ્રદ્યુમ્નો ભગવાન્સાક્ષાદ્‌દ્વિતીયં બાણમાદધે

સોઽપિ બાણઃ સમુન્નીય કાલનાભં મહાબલમ્ ॥
ભ્રામયન્પાતયામાસ ચંદ્રાવત્યાં બલાત્પુરિ

કાલનાભઃ પ્રપતિતઃ કિંચિદ્‍વ્યાકુલમાનસઃ ॥
ગૃહીત્વાઽથ ગદાં ગુર્વીં લક્ષભારવિનિર્મિતામ્

રણં પ્રાપ્તો યદુબલં પોથયામાસ દૈત્યરાટ્ ॥
ગજાન્ રથાન્હયાન્ વીરાન્ ગદયા વજ્રકલ્પયા

પાતયામાસ વેગેન મહાવાતો યથા તરૂન્ ॥
કાંશ્ચિત્કરાભ્યાં પ્રોન્નીય ચિક્ષેપ ગગને બલાત્

અંબરાત્તે નિપેતુઃ કૌ રાજન્ વર્ષોપલા ઇવ ॥
તદા ગદાં સમાદાય સાંબો જાંબવતીસુતઃ

તતાડ મૂર્ધ્નિ તં દૈત્યં કાલનાભં મહાસુરમ્ ॥
તયોર્યુદ્ધમભૂદ્ઘોરં ગદાભ્યાં રણમણ્ડલે

વિસ્ફુલિંગાન્ક્ષરંત્યૌ દ્વે ગદે ચૂર્ણીબભૂવતુઃ ॥
અન્યે ગદે સમાદાય તસ્થતુઃ સંગરે ચ તૌ

કાલનાભસ્તદા પ્રાહ સાંબં જાંબવતીસુતમ્ ॥
એકેનાપિ પ્રહારેણ હન્મિ ત્વાં નાત્ર સંશયઃ

પૂર્વં પ્રહાર કુરુ મે ઇતિ સામ્બોઽવદદ્‌રણે ॥
કાલનાભોઽથ ગદયા સાંબમૂર્ધ્નિ તતાડ હ

ગદોપરિ ગદાં નીત્વા સાંબો જાંબવતીસુતઃ ॥
જઘાન ગદયા દૈત્યં કાલનાભમુરઃસ્થલે

ગદયા ભિન્નહૃદય ઉદ્વમન્ રુધિરં મુખાત્ ॥
વ્યસુઃ પપાત ભૂપૃષ્ઠે વજ્રાહત ઇવાચલઃ

અભૂજ્જયજયારાવઃ સાધુવાદઃ સતાં નૃપ ॥
દેવદુન્દુભયો નેદુર્નરદુન્દુભયસ્તથા

સાંબસેનોપરિ સુરાઃ પુષ્પવર્ષં પ્રચક્રિરે ॥
વિદ્યાધર્યશ્ચ ગંધર્વા નનૃતુશ્ચ જગુર્મુદા

ઇતિ શ્રીગર્ગસંહિતાયાં શ્રીવિશ્વજિત્ખણ્ડે શ્રીનારદબહુલાશ્વસંવાદે
કાલનાભદૈત્યવધો નામ પંચસ્ત્રિંશોઽધ્યાયઃ