ગર્ગસંહિતા · અધ્યાય 6.8

શ્રીનારદ ઉવાચ ॥
અન્યાસાં કૃષ્ણપત્નીનાં મંગલં શૃણુ મૈથિલ ॥
સર્વપાપહરં પુણ્યમાયુર્વર્દ્ધનમુત્તમમ્

સત્રાજિતાય સૂર્યેણ દત્તઃ સાક્ષાત્સ્યમંતકઃ ॥
ઉગ્રસેનાય સ મણિઃ શ્રીકૃષ્ણેનાભિયાચિતઃ

સત્રાજિતસ્તં ન દદૌ દ્રવ્યલોભેન મૈથિલ ॥
દિનેદિને સ્વર્ણભારાનષ્ટૌ યઃ સૃજતિ સ્વતઃ

અથ પ્રસેનસ્તદ્ભ્રાતા મણિં કણ્ઠે નિધાય સઃ ॥
સૈંધવં હયમારુહ્ય મૃગયાં વ્યચરદ્વને

સિંહેન મારિતઃ સોપિ સિંહો જાંબવતા હતઃ ॥
ગૃહીત્વા તં મણિં સદ્યો જાંબવાન્સ્વગુહાં ગતઃ

કૃષ્ણેન નિહતો ભ્રાતા મણિગ્રીવો વનં ગતઃ ॥
નાયાતઃ સ્વસભા મધ્યે ઇતિ સત્રા- જિતોઽબ્રવીત્

ભગવાન્દુર્યશો લિપ્તો નાગરૈસ્તુ વનં ગતઃ ॥
પ્રસેનમશ્વં સિંહં ચ હંત પ્રેક્ષ્ય મહામતે

ઋક્ષરાજબિલં ગત્વા મણિં હર્તું સ્વયં હરિઃ ॥
યુદ્ધં કૃત્વાષ્ટવિંશાહમજયદૃક્ષનાયકમ્

તેન દત્તા જાંબવતી હરયે કન્યકા શુભા ॥
મણિના સહ રાજેંદ્ર દ્વારકામાયયૌ હરિઃ

સત્રાજિતાય પ્રદદૌ મણિં નિર્લાંછનઃ પ્રભુઃ॥
વ્રીડિતોવાઙ્મુખો ભીતો રાજા સત્રાજિતો મણિમ્

ગૃહીત્વાપિ પુનસ્તસ્મૈ શ્રીકૃષ્ણાય મહાત્મને॥
સત્યભામાં સુતાં પ્રાદાચ્છાંત્યર્થં મૈથિલેશ્વર

પાંડવાનાં સહાયાર્થમિંદ્રપ્રસ્થં ગતો હરિઃ॥
તત્ર વૈ વાર્ષિકાન્માસાન્ન્યવાત્સીદ્બંધુવત્સલઃ

એકદા રથમારુહ્ય હરિર્ગાંડીવિના સહ॥
સુનીરે યમુનાતીરે મૃગયાર્થી વિનિર્યયૌ

તપશ્ચરંતી કાલિંદી શ્રીકૃષ્ણં વરમિચ્છતી।
દર્શિતા પાંડવેનાપિ તાં ગૃહીત્વા જગામ હ

દ્વારકામેત્ય કાલિંદીં સૂર્યકન્યાં મનોહરામ્॥
ઉપયેમે વિધાનેન વિતન્વન્મંગલં પરમ્॥૧૫
આવંત્યરાજતનુજાં મિત્રવિન્દાં મનોહરામ્ ॥
સ્વયંવરે તાં જહાર ભગવાન્રુક્મિણીં યથા

નગ્નજિત્કન્યકાં સત્યાં દમિત્વા સપ્ત ગોવૃષાન્ ॥
પશ્ય તાં સર્વલોકાનામુપયેમે હરિઃ સ્વયમ્

કૈકેયરાજતનુજાં ભદ્રાં તુ ભગવાન્હરિઃ ॥
કાલિંદીમિવ તાં શશ્વદુપયેમે વિધાનતઃ

બૃહત્સેન સુતા રાજન્લક્ષ્મણાં લક્ષણૈર્યુતામ્ ॥
છિત્ત્વા મત્સ્યમરીઞ્જિત્વા જગ્રાહ ભગવન્હરિઃ।

તથા ષોડશસાહસ્રં શતં ચ નૃપકન્યકાઃ ॥
ભૌમં હત્વા તન્નિરોધાદાહૃતાશ્ચારુદર્શનાઃ

તાસાં મુહૂર્ત એકસ્મિનાના ગારેષુ યોષિતામ્ ॥
સવિધં જગૃહે પાણીન્નાનારૂપઃ સ્વમાયયા

એકૈકશસ્તાઃ કૃષ્ણસ્ય પુત્રાન્દશદશા બલાઃ ॥
અજીજનન્ન નવમાન્પિતુઃ સર્વાત્મસંપદા

રુક્મિણ્યાં ભીમકન્યાયાં પ્રદ્યુમ્નઃ પ્રથમોભવત્ ॥
કામદેવાવતારોયં પિતૃવત્સર્વલક્ષણઃ

શબરો નિર્દયસ્તોકં હત્વાબ્ધૌ તં સમાક્ષિપત્ ॥
મત્સ્યોદરેગતઃ સોપિ ન મમાર હરેઃ સુતઃ

મત્સ્યોદરાન્નિર્ગતોસૌ ભાર્યયા પરિપાલિતઃ ॥
જ્ઞાત્વા શત્રુકૃતાં વાર્તાં સ કાર્ષ્ણીં રૂઢયૌવનઃ

હત્વા તં શંબરં શત્રું ભાર્યયા વરયાયુતઃ ॥
દ્વારકામાયયૌ રાજંશ્ચિત્રં કર્મ ચ તસ્ય તત્

સરુક્મિણો દુહિતરં હૃત્વા ભોજકટાત્પુરાત્ ॥
સ્વયંવરસ્થલાદ્રાજન્નુપયેમે મહારથઃ

તસ્માત્સુતો નિરુદ્ધોભૂન્નાગાયુતબલાન્વિતઃ ॥
સુરજ્યેષ્ઠાવતારોયં શારદેંદીવરપ્રભઃ

ચતુર્વ્યૂહાવતારસ્ય પરિપૂર્ણતમસ્ય હિ ॥
એવં વિચિત્રં ચરિતં વિવાહાનાં સુમંગલમ્

સર્વપાપહરં પુણ્યમાયુર્વર્દ્ધનમુત્તમમ્ ॥
મયા તે કથિતં રાજન્કિં ભૂયઃ શ્રોતુમિચ્છસિ

ઇતિ શ્રીમદ્ગર્ગસંહિતાયાં શ્રીદ્વારકાખણ્ડે નારદબહુલાશ્વસંવાદે સર્વમહિષ્યુદ્વાહોનામાષ્ટમોધ્યાયઃ