ગર્ગસંહિતા · અધ્યાય 4.9

માધુર્યખણ્ડઃ - નવમોઽધ્યાયઃ
એકાદશીમાહાત્મ્યમ્ -
ગોપ્ય ઊચુઃ -
વૃષભાનુસુતે સુભ્રુ સર્વશાસ્ત્રાર્થપારગે ।
વિડંબયંતી ત્વં વાચા વાચં વાચસ્પતેર્મુને

એકાદશીવ્રતં રાધે કેન કેન પુરા કૃતમ્ ।
તદ્‌બ્રૂહિ નો વિશેષેણ ત્વં સાક્ષાત્ જ્ઞાનશેવધિઃ

શ્રીરાધોવાચ -
આદૌ દેવૈઃ કૃતં ગોપ્યો વરમેકાદશીવ્રતમ્ ।
ભ્રષ્ટરાજ્યસ્ય લાભાર્થં દૈત્યાનાં નાશનાય ચ

વૈશંતેન પુરા રાજ્ઞા કૃતમેકાદશીવ્રતમ્ ।
સ્વપિતુસ્તારણાર્થાય યમલોકગતસ્ય ચ

અક્સ્માલ્લુંપકેનાપિ જ્ઞાતિત્યક્તેન પાપિના ।
એકાદશી કૃતા યેન રાજ્યં લેભે સ લુંપકઃ

ભદ્રાવત્યાં કેતુમતા કૃતમેકાદશીવ્રતમ્ ।
પુત્રહીનેન સદ્વાક્યાત્પુત્રં લેભે સ માનવઃ

બ્રાહ્મણ્યૈ દેવપત્‍નીભિર્દત્તમેકાદશીવ્રતમ્ ।
તેન લેભે સ્વર્ગસૌખ્યં ધનધાન્યં ચ માનુષી

પુષ્પદંતીમાલ્યવંતૌ શક્રશાપાત્પિશાચતામ્ ।
પ્રાપ્તૌ કૃતં વ્રતં તાભ્યાં પુનર્ગન્ધર્વતાં ગતૌ

પુરા શ્રીરામચન્દ્રેણ કૃતમેકાદશીવ્રતમ્ ।
સમુદ્રે સેતુબંધાર્થં રાવણસ્ય વધાય ચ

લયાંતે ચ સમુત્પન્ના ધાતૃવૃક્ષતલે સુરાઃ ।
એકાદશીવ્રતં ચક્રુઃ સર્વકલ્યાણહેતવે

વ્રતં ચકાર મેધાવી દ્વાદશ્યાઃ પિતૃવાક્યતઃ ।
અપ્સરઃસ્પર્શદોષેણ મુક્તોઽભૂન્નિર્મલદ્યુતિઃ

ગંધર્વો લલિતઃ પત્‍ન્યા ગતઃ શાપાત્સ રક્ષતામ્ ।
એકાદશીવ્રતેનાપિ પુનર્ગંધર્વતાં ગતઃ

એકાદશીવ્રતેનાપિ માંધાતા સ્વર્ગતિં ગતઃ ।
સગરસ્ય કકુત્સ્થશ્ચ મુચકુન્દો મહામતિઃ

ધુંધુમારાદયશ્ચાન્યે રાજાનો બહવસ્તથા ।
બ્રહ્મકપાલનિર્મુક્તો બભૂવ ભગવાન્ભવઃ

ધૃષ્ટબુદ્ધિર્વૈશ્યપુત્રો જ્ઞાતિત્યક્તો મહાખલઃ ।
એકાદશીવ્રતં કૃત્વા વૈકુણ્ઠં સ જગામ હ

રાજ્ઞા રુક્માંગદેનાપિ કૃતમેકાદશીવ્રતમ્ ।
તેન ભૂમણ્ડલં ભુક્ત્વા વૈકુણ્ઠં સપુરો યયૌ

અંબરીષેણ રાજ્ઞાઽપિ કૃતમેકાદશીવ્રતમ્ ।
નાસ્પૃશદ્‌‌બ્રહ્મશાપોઽપિ યો ન પ્રતિહતઃ ક્વચિત્

હેમમાલી નામ યક્ષઃ કુષ્ઠી ધનદશાપતઃ ।
એકાદશીવ્રતં કૃત્વા ચન્દ્રતુલ્યો બભૂવ હ

મહીજિતા નૃપેણાપિ કૃતમેકાદશીવ્રતમ્ ।
તેન પુત્રં શુભં લબ્ધ્વા વૈકુણ્ઠં સ જગામ હ

હરિશ્ચન્દ્રેણ રાજ્ઞાઽપિ કૃતમેકાદશીવ્રતમ્ ।
તેન લબ્ધ્વા મહીરાજ્યં વૈકુણ્ઠં સપુરો યયૌ

શ્રીશોભનો નામ પુરા કૃતે યુગે
જામાતૃકોઽભૂન્મુચુકુન્દભૂભૃતઃ ।
એકાદશીં યઃ સમુપોષ્ય ભારતે
પ્રાપ્તઃ સ દૈવૈઃ કિલ મંદરાચલે

અદ્યાપિ રાજ્યં કુરુતે કુબેરવ-
દ્‌રાજ્ઞા યુતોઽસૌ કિલ ચન્દ્રભાગયા ।
એકાદશી સર્વતિથીશ્વરીં પરાં
જાનીથ ગોપ્યો ન હિ તત્સમાઽન્યા

શ્રીનારદ ઉવાચ -
ઇતિ રાધામુખાચ્છ્રુત્વા યજ્ઞસીતાશ્ચ ગોપિકાઃ ।
એકાદશીવ્રતં ચક્રુર્વિધિવત્કૃષ્ણલાલસાઃ

એકાદશીવ્રતેનાપિ પ્રસન્નઃ શ્રીહરિઃ સ્વયમ્ ।
માર્ગશીર્ષે પૂર્ણિમાયાં રાસં તાભિશ્ચકાર હ

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
એકાદશીમાહાત્મ્યં નામ નવમોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા