ગર્ગસંહિતા · અધ્યાય 4.10

માધુર્યખણ્ડઃ - દશમોઽધ્યાયઃ
પૌલિન્દ-ગોપી-કથા -
શ્રીનારદ ઉવાચ -
પુલિંદકાનાં ગોપીનાં કરિષ્યે વર્ણનં હ્યતઃ ।
સર્વપાપહરં પુણ્યમદ્‌ભુતં ભક્તિવર્દ્ધનમ્

પુલિન્દા ઊદ્‌ભટાઃ કેચિદ્‌વિંધ્યાદ્રિ વનવાસિનઃ ।
વિલુંપંતો રાજવસુ દીનાનાં ન કદાચન

કુપિતસ્તેષુ બલવાન્ વિન્ધ્યદેશાધિપો બલી ।
અક્ષૌહિણીભ્યાં તાન્સર્વાન્ પુલિંદાન્સ રુરોધ હ

યુયુધુસ્તેઽપિ ખડ્ગૈશ્ચ કુન્તૈઃ શૂલૈઃ પરશ્વધૈઃ ।
શક્ત્યર્ષ્ટિભિર્ભૃશુણ્ડીભિઃ શરૈઃ કતિ દિનાનિ ચ

પત્રં તે પ્રેષયામાસુઃ કંસાય યદુભૂભૃતે ।
કંસપ્રણોદિતો દૈત્યઃ પ્રલંબો બલવાંસ્તદા

યોજનદ્વયમુચ્ચાંગં કાલમેઘસમદ્યુતિમ્ ।
કિરીટકુંડલધરં સર્પહારવિભૂષિતમ્

પાદયોઃ શૃઙ્ખલાયુક્તં ગદાપાણિં કૃતાંતવત્ ।
લલજ્જિહ્વં ઘોરરૂપં પાતયન્તં ગિરીન્દ્રુમાન્

કંપયંતં ભુવં વેગાત્પ્રલમ્બં યુદ્ધદુર્મદમ્ ।
દૃષ્ટ્વા પ્રધર્ષિતો રાજા સસૈન્યો રણમંડલમ્

ત્યક્ત્વા દુદ્રાવ સહસા સિંહં વીક્ષ્ય ગજો યથા ।
પ્રલંબસ્તાન્ સમાનીય મથુરામાયયૌ પુનઃ

પુલિન્દાસ્તેઽપિ કંસસ્ય ભૃત્યત્વં સમુપાગતાઃ ।
સકુટુંબાઃ કામગિરૌ વાસં ચક્રુર્નૃપેશ્વર

તેષાં ગૃહેષુ સંજાતાઃ શ્રીરામસ્ય વરાત્પરાત્ ।
પુલિંદ્યઃ કન્યકા દિવ્યા રૂપિણ્યઃ શ્રીરિવાર્ચિતાઃ

તદ્દર્શનસ્મરરુજઃ પુલિંદ્યઃ પ્રેમવિહ્વલાઃ ।
શ્રીમત્પાદરજો ધૃત્વા ધ્યાયંત્યસ્તમહર્નિશમ્

તાશ્ચાપિ રાસે સંપ્રાપ્તાઃ શ્રીકૃષ્ણં પરમેશ્વરમ્ ।
પરિપૂર્ણતમં સાક્ષાદ્‌‌ગોલોકાધિપતિં પ્રભુમ્

શ્રીકૃષ્ણચરણામ્ભોજરજો દેવૈઃ સુદુર્લભમ્ ।
અહો ભાગ્યં પુલિંદીનાં તાસાં પ્રાપ્તં વિશેષતઃ

યઃ પારમેષ્ઠ્યમખિલં ન મહેન્દ્રધિષ્ણ્યં
નો સાર્વભૌમમનિશં ન રસાધિપત્યમ્ ।
નો યોગસિદ્ધિમભિતો ન પુનર્ભવં વા
વાઞ્છત્યલં પરમપાદરજઃ સ ભક્તઃ

નિષ્કિંચનાઃ સ્વકૃતકર્મફલૈર્વિરાગા
યત્તત્પદં હરિજના મુનયો મહાંતઃ ।
ભક્તા જુષન્તિ હરિપાદરજઃપ્રસક્તા
અન્યે વદન્તિ ન સુખં કિલ નૈરપેક્ષ્યમ્

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
પુલિન્દકોપાખ્યાનં નામ દશમોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા