ગર્ગસંહિતા · અધ્યાય 4.23

માધુર્યખણ્ડઃ - ત્રયોવિંશોઽધ્યાયઃ
સુદર્શનોપાખ્યાનમ્ -
શ્રીનારદ ઉવાચ -
એકદા નૃપ ગોપાલાઃ શકટૈ રત્‍નપૂરિતૈઃ ।
વૃષભાનૂપનન્દાદ્યા આજગ્મુશ્ચાંબિકાવનમ્

ભદ્રકાલીં પશુપતિં પૂજયિત્વા વિધાનતઃ ।
દદુર્દાનં દ્વિજાતિભ્યઃ સુપ્તાસ્તત્ર સરિત્તટે

તત્રૈકો નિર્ગતો રાત્રૌ સર્પો નન્દં પદેઽગ્રહીત્ ।
કૃષ્ણ કૃષ્ણેતિ ચુક્રોશ નન્દોઽતિભયવિહ્વલઃ

તદોલ્મુકૈર્ગોપબાલાસ્તોદુરાજગરં નૃપ ।
પદં સોઽપિ ન તત્યાજ સર્પોઽથ સ્વમણિં યથા

તતાડ સ્વપદા સર્પં ભગવાન્ લોકપાવનઃ ।
ત્યક્ત્ત્વા તદૈવ સર્પત્વં ભૂત્વા વિદ્યાધરઃ કૃતી ।
નત્વા કૃષ્ણં પરિક્રમ્ય કૃતાંજલિપુટોઽવદત્

સુદર્શન ઉવાચ -
અહં સુદર્શનો નામ વિદ્યાધરવરઃ પ્રભો ।
અષ્ટાવક્રં મુનિં દૃષ્ટ્વા હસિતોઽસ્મિ મહાબલઃ

મહ્યં શાપં દદૌ સોઽપિ ત્વં સર્પો ભવ દુર્મતે ।
તચ્છાપાદદ્ય મુક્તોઽહમ્ કૃપયા તવ માધવ

ત્વત્પાદપદ્મમકરંદરજઃકણાનાં
સ્પર્શેન દિવ્યપદવીં સહસાગતોઽસ્મિ ।
તસ્મૈ નમો ભગવતે ભુવનેશ્વરાય
યો ભૂરિભારહરણાય ભૂવોઽવતારઃ

શ્રીનારદ ઉવાચ -
ઇતિ નત્વા હરિં કૃષ્ણં રાજન્ વિદ્યાધરસ્તુ સઃ ।
જગામ વૈષ્ણવં લોકં સર્વોપદ્રવ વર્જિતમ્

નંદાદ્યા વિસ્મિતાઃ સર્વે જ્ઞાત્વા કૃષ્ણં પરેશ્વરમ્ ।
અંબિકાવનતઃ શીઘ્રમાયયુર્વ્રજમંડલમ્

ઇદં મયા તે કથિતં શ્રીકૃષ્ણચરિતં શુભમ્ ।
સર્વપાપહરં પુણ્યં કિં ભૂયઃ શ્રોતુમિચ્છસિ

બહુલાશ્વ ઉવાચ -
અહો શ્રીકૃષ્ણચન્દ્રસ્ય ચરિતં પરમાદ્‌ભુતમ્ ।
શ્રુત્વા મનો મે તચ્છ્રોતુમતૃપ્તં પુનરિચ્છતિ

અગ્રે ચકાર કાં લીલાં લીલયા વ્રજમંડલે ।
હરિર્વ્રજેશઃ પરમો વદ દેવર્ષિસત્તમ

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
સુદર્શનોપાખ્યાનં નામ ત્રયોવિંશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા