ગર્ગસંહિતા · અધ્યાય 4.11

માધુર્યખણ્ડઃ - એકાદશોઽધ્યાયઃ
કૃષ્ણ-સખીગણોપાખ્યાનમ્ -
શ્રીનારદ ઉવાચ -
અન્યાસાં ચૈવ ગોપીનાં વર્ણનં શૃણુ મૈથિલ ।
સર્વપાપહરં પુણ્યં હરિભક્તિવિવર્દ્ધનમ્

નીતિવિન્માર્ગદઃ શુક્લઃ પતંગો દિવ્યવાહનઃ ।
ગોપેષ્ટશ્ચ વ્રજે રાજન્ જાતા ષડ્‍વૃષભાનવઃ

તેષાં ગૃહેષુ સંજાતા લક્ષ્મીપતિવરાત્પ્રજાઃ ।
રમાવૈકુણ્ઠવાસિન્યઃ શ્રીસખ્યોઽપિ સમુદ્રજાઃ

ઊર્ધ્વં વૈકુણ્ઠવાસિન્યઃ તથાઽજિતપદાશ્રિતાઃ ।
શ્રીલોકાચલવાસિન્યઃ શ્રીસખ્યોઽપિ સમુદ્રજાઃ

ચિન્તયન્ત્યઃ સદા શ્રીમદ્‌‌ગોવિન્દચરણાંબુજમ્ ।
શ્રીકૃષ્ણસ્ય પ્રસાદાર્થં તાભિર્માઘવ્રતં કૃતમ્

માઘસ્ય શુક્લપંચમ્યાં વસન્તાદૌ હરિઃ સ્વયમ્ ।
તાસાં પ્રેમપરીક્ષાર્થં કૃષ્ણો વૈ તદ્‍ગૃહાન્ગતઃ

વ્યાઘ્રચર્માંબરં બિભ્રન્ જટામુકુટમંડિતઃ ।
વિભૂતિધૂસરો વેણું વાદયન્ મોહયન્ જગત્

તાસાં વીથીષુ સંપ્રાપ્તિં વીક્ષ્ય ગોપ્યોઽપિ સર્વતઃ ।
આયયુર્દર્શનં કર્તું મોહિતાઃ પ્રેમવિહ્વલાઃ

અતીવ સુન્દરં દૃષ્ટ્વા યોગિનં ગોપકન્યકાઃ ।
ઊચુઃ પરસ્પરં સર્વાઃ પ્રેમાનન્દસમાકુલાઃ

ગોપ્ય ઊચુઃ -
કોઽયં શિશુર્નન્દસુતાકૃતિર્વા
કસ્યાપિ પુત્રો ધનિનો નૃપસ્ય ।
નારીકુવાગ્બાણવિભિન્નમર્મા
જાતો વિરક્તો ગતકૃત્યકર્મા

અતીવ રમ્યઃ સુકુમારદેહો
મનોજવદ્વિશ્વમનોહરોઽયમ્ ।
અહો કથં જીવતિ ચાસ્ય માતા
પિતા ચ ભાર્યા ભગિની વિનૈનમ્

એવં તાઃ સર્વતો યૂથીભૂત્વા સર્વા વ્રજાંગનાઃ ।
પપ્રચ્છુસ્તં યોગિવરં વિસ્મિતાઃ પ્રેમવિહ્વલાઃ

ગોપ્ય ઊચુઃ -
કસ્ત્વં યોગિન્નામ કિં તે કુત્ર વાસસ્તુ તે મુને ।
કા વૃત્તિસ્તવ કા સિદ્ધિર્વદ નો વદતાં વર

સિદ્ધ ઉવાચ -
યોગેશ્વરોઽહં મે વાસઃ સદા માનસરોવરે ।
નામ્ના સ્વયંપ્રકાશોઽહં નિરન્નઃ સ્વબલાત્સદા

સાર્થે પરમહંસાનાં યામ્યહં હે વ્રજાંગનાઃ ।
ભૂતં ભવ્યં વર્તમાનં વેદ્મ્યહં દિવ્યદર્શનઃ

ઉચ્ચાટનં મારણં ચ મોહનં સ્તંબનં તથા ।
જાનામિ મંત્રવિદ્યાભિઃ વશીકરણમેવ ચ

ગોપ્ય ઊચુઃ -
યદિ જાનાસિ યોગિંસ્ત્વં વાર્તાં કાલત્રયોદ્‌ભવામ્ ।
કિં વર્તતે નો મનસિ વદ તર્હિ મહામતે

સિદ્ધ ઉવાચ -
ભવતીનાં ચ કર્ણાંતે કથનીયમિદં વચઃ ।
યુષ્મદાજ્ઞયા વા વક્ષ્યે સર્વેષાં શૃણ્વતામિહ

ગોપ્ય ઊચુઃ -
સત્યં યોગેશ્વરોઽસિ ત્વં ત્રિકાલજ્ઞો ન સંશયઃ ।
વશીકરણમંત્રેણ સદ્યઃ પઠનમાત્રતઃ

યદિ સોઽત્રૈવ ચાયાતિ ચિંતિતો યોઽસ્તિ વૈ મુને ।
તદા મન્યામહે ત્વાં વૈ મંત્રિણાં પ્રવરં પરમ્

સિદ્ધ ઉવાચ -
દુર્લભો દુર્ઘટો ભાવો યુષ્માભિર્ગદિતઃ સ્ત્રિયઃ ।
તથાપ્યહં કરિષ્યામિ વાક્યં ન ચલતે સતામ્

નિમીલયત નેત્રાણિ મા શોચં કુરુત સ્ત્રિયઃ ।
ભવિષ્યતિ ન સંદેહો યુષ્માકં કાર્યમેવ ચ

શ્રીનારદ ઉવાચ -
તથેતિ મીલિતાક્ષીષુ ગોપીષુ ભગવાન્હરિઃ ।
વિહાય તદ્યોગિરૂપં બભૌ શ્રીનન્દનન્દનઃ

નેત્રાણ્યુન્મીલ્ય દદૃશુઃ સાનન્દં નન્દનન્દનમ્ ।
વિસ્મિતાસ્તત્પ્રભાવજ્ઞા હર્ષિતા મોહમાગતાઃ

માઘમાસે મહારાસે પુણ્યે વૃન્દાવને વને ।
તાભિઃ સાર્દ્ધં હરી રેમે સુરીભિઃ સુરરાડિવ

ઇતિ શ્રીગર્ગસંહિતાયાં માધુર્યખણ્ડે શ્રીનારદબહુલાશ્વસંવાદે
રમાવૈકુણ્ઠ શ્વેતદ્વીપોર્ધ્વવૈકુણ્ઠાજિતપદ શ્રીલોકાચલવાસિની
શ્રીસખીનામુપાખ્યાનં નામ એકાદશોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા