ગર્ગસંહિતા · અધ્યાય 3.8

ગિરિરાજખણ્ડ - અષ્ટમોઽધ્યાયઃ
ગિરિરાજવિભૂતિવર્ણનમ્ -
શ્રીબહુલાશ્વ ઉવાચ -
કેષુ કેષુ તદઙ્ગેષુ કિં કિં તીર્થં સમાશ્રિતમ્ ॥
વદ દેવ મહાદેવ ત્વં પરાવરવિત્તમઃ

શ્રીનારદ ઉવાચ -
યત્ર યસ્ય પ્રસિદ્ધિઃ સ્યાત્તદંગં પરમં વિદુઃ ॥
ક્રમતો નાસ્ત્યંગચયો ગિરિરાજસ્ય મૈથિલ

યથા સર્વગતં બ્રહ્મ સર્વાંગાનિ ચ તસ્ય વૈ ॥
વિભૂતેર્ભાવતઃ શશ્વત્તથા વક્ષ્યામિ માનદ

શૃઙ્ગારમણ્ડલસ્યાધો મુખં ગોવર્ધનસ્ય ચ ॥
યત્રાન્નકૂટં કૃતવાન્ ભગવાન્ વ્રજવાસિભિઃ

નેત્રે વૈ માનસી ગંગા નાસા ચન્દ્રસરોવરઃ ॥
ગોવિન્દકુણ્ડો હ્યધરશ્ચિબુકં કૃષ્ણકુણ્ડકઃ

રાધાકુણ્ડં તસ્ય જિહ્વા કપોલૌ લલિતાસરઃ ॥
ગોપાલકુણ્ડઃ કર્ણશ્ચ કર્ણાન્તઃ કુસુમાકરઃ

મૌલિચિહ્ના શીલા તસ્ય લલાટં વિદ્ધિ મૈથિલ ॥
શિરશ્ચિત્રશિલા તસ્ય ગ્રીવા વૈ વાદની શિલા

કાંદુકં પાર્શ્વદેશઞ્ચ ઔષ્ણિષં કટિરુચ્યતે ॥
દ્રોણતીર્થં પૃષ્ઠદેશે લૌકિકં ચોદરે સ્મૃતમ્

કદમ્બખણ્ડમુરસિ જીવઃ શૃઙ્ગારમણ્ડલમ્ ॥
શ્રીકૃષ્ણપાદચિહ્નં તુ મનસ્તસ્ય મહાત્મનઃ

હસ્તચિહ્નં તથા બુદ્ધિરૈરાવતપદં પદમ્ ॥
સુરભેઃ પાદચિહ્નેષુ પક્ષૌ તસ્ય મહાત્મનઃ

પુચ્છકુણ્ડે તથા પુચ્છં વત્સકુંડે બલં સ્મૃતમ્ ॥
રુદ્રકુણ્ડે તથા ક્રોધં કામં શક્રસરોવરે

કુબેરતીર્થે ચોદ્યોગં બ્રહ્મતીર્થે પ્રસન્નતામ્ ॥
યમતીર્થે હ્યહંકારં વદન્તીત્થં પુરાવિદઃ

એવમંગાનિ સર્વત્ર ગિરિરાજસ્ય મૈથિલ ॥
કથિતાનિ મયા તુભ્યં સર્વપાપહરાણિ ચ

ગિરિરાજવિભૂતિં ચ યઃ શૃણોતિ નરોત્તમઃ ॥
સ ગચ્છેદ્ધામ પરમં ગોલોકં યોગિદુર્લભમ્

સમુત્થિતોઽસૌ હરિવક્ષસો ગિરિ-
ર્ગોવર્ધનો નામ ગિરીન્દ્રરાજરાટ્ ॥
સમાગતો હ્યત્ર પુલસ્ત્યતેજસા
યદ્દર્શનાજ્જન્મ પુનર્ન વિદ્યતે

ઇતિ શ્રીગર્ગસંહિતાયાં ગિરિરાજખણ્ડે શ્રીનારદબહુલાશ્વસંવાદે
ગિરિરાજવિભૂતીવર્ણનં નામાષ્ટમોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા