ગર્ગસંહિતા · અધ્યાય 3.4

ગિરિરાજખણ્ડ - ચતુર્થોઽધ્યાયઃ
સુરભિકૃતં કૃષ્ણાભિષેકમ્ -
શ્રીનારદ ઉવાચ -
અથ દેવગણૈઃ સાર્દ્ધં શક્રસ્તત્ર સમાગતઃ ।
ગતમાનો ગિરૌ કૃષ્ણં રહસિ પ્રણનામ હ

ઇન્દ્ર ઉવાચ -
ત્વં દેવદેવઃ પરમેશ્વરઃ પ્રભુઃ
પૂર્ણઃ પુરાણઃ પુરુષોત્તમોત્તમઃ ।
પરાત્પરસ્ત્વં પ્રકૃતેઃ પરો હરિ-
ર્માં પાહિ પાહિ દ્યુપતે જગત્પતે

દશાવતારો ભગવાંસ્ત્વમેવ
રિરક્ષયા ધર્મગવાં શ્રુતેશ્ચ ।
અદ્યૈવ જાતઃ પરિપૂર્ણદેવઃ
કંસાદિ દૈત્યેન્દ્રવિનાશનાય

ત્વન્માયયા મોહિતચિત્તવૃત્તિં
મદોદ્ધતં હેલનભાજનં મામ્ ।
પિતેવ પુત્રં દ્યુપતે ક્ષમસ્વ
પ્રસીદ દેવેશ જગન્નિવાસ

ૐનમો ગોવર્ધનોદ્ધરણાય ગોવિન્દાય ગોકુલનિવાસાય
ગોપાલાય ગોપાલપતયે ગોપીજનભર્ત્રે ગિરિગજોદ્ધર્ત્રે
કરુણાનિધયે જગદ્વિધયે જગન્મઙ્ગલાય જગન્નિવાસાય
જગન્મોહનાય કોટિમન્મથમન્મથાય વૃષભાનુસુતાવરાય
શ્રીનન્દરાજકુલપ્રદીપાય શ્રીકૃષ્ણાય પરિપૂર્ણતમાય
તેઽસંખ્યબ્રહ્માણ્ડપતયે ગોલોકધામધિષણાધિપતયે
સ્વયમ્ભગવતે સબલાય નમસ્તે નમસ્તે

શ્રીનારદ ઉવાચ -
ઇતિ શક્રકૃતં સ્તોત્રં પ્રાતરુત્થાય યઃ પઠેત્ ।
સર્વા સિદ્ધિર્ભવેત્તસ્ય સંકટાન્ન ભયં ભવેત્

ઇતિસ્તુત્વા હરિં દેવં સર્વૈર્દેવગણૈઃ સહ ।
કૃતાઞ્જલિપુટો ભૂત્વા પ્રણનામ પુરન્દરઃ

અથ ગોવર્ધને રમ્યે સુરભિર્ગૌઃ સમુદ્રજા ।
સ્નાપયામાસ ગોપેશં દુગ્ધધારાભિરાત્મનઃ

શુંડાદણ્ડૈશ્ચતુર્ભિશ્ચ દ્યુગંગાજલપૂરિતૈઃ ।
શ્રીકૃષ્ણં સ્નાપયામાસ મત્ત ઐરાવતો ગજઃ

ઋષિભિઃ શ્રુતિભિઃ સર્વૈર્દેવગન્ધર્વકિન્નરાઃ ।
તુષ્ટુવુસ્તે હરિં રાજન્ હર્ષિતાઃ પુષ્પવર્ષિણઃ

કૃષ્ણાભિષેકે સંજાતે ગિરિર્ગોવર્ધનો મહાન્ ।
દ્રવીભૂતોઽવહદ્‌રાજન્ હર્ષાનન્દાદિતસ્તતઃ

પ્રસન્નો ભગવાંસ્તસ્મિન્કૃતવાન્હસ્તપંકજમ્ ।
તદ્ધસ્તચિહ્નમદ્યાપિ દૃશ્યતે તદ્‌ગિરૌ નૃપ

તત્તીર્થં ચ પરં ભૂતં નરાણાં પાપનાશનમ્ ।
તદેવ પાદચિહ્નં સ્યાત્તત્તીર્થં વિદ્ધિ મૈથિલ

એતાવત્તસ્ય તત્રૈવ પાદચિહ્નં બભૂવ હ ।
સુરભેઃ પાદચિહ્નાનિ બભૂવુસ્તત્ર મૈથિલ

દ્યુગઙ્ગાજલપાતેન કૃષ્ણસ્નાનેન મૈથિલ ।
તત્ર વૈ માનસી ગઙ્ગા ગિરૌ જાતાઽઘનાશિની

સુરભેર્દુગ્ધધારાભિર્ગોવિન્દસ્નાનતો નૃપ ।
જાતો ગોવિન્દકુણ્ડોઽદ્રૌ મહાપાપહરઃ પરઃ

કદાચિત્તસ્મિન્દુગ્ધસ્ય સ્વાદુત્વં પ્રતિપદ્યતે ।
તત્ર સ્નાત્વા નરઃ સાક્ષાદ્‌‌ગોવિન્દપદમાપ્નુયાત્

પ્રદક્ષિણીકૃત્ય હરિં પ્રણમ્ય વૈ
દત્ત્વા બલીંસ્તત્ર પુરન્દરાદયઃ ।
જયધ્વનિં કૃત્ય સુપુષ્પવર્ષિણો
યયુઃ સુરાઃ સૌખ્યયુતાસ્ત્રિવિષ્ટપમ્

કૃષ્ણાભિષેકસ્ય કથાં શૃણોતિ યો
દશાશ્વમેધાવભૃથાધિકં ફલમ્ ।
પ્રાપ્નોતિ રાજેન્દ્ર સ એવ ભૂયસઃ
પરં પદં યાતિ પરસ્ય વેધસઃ

ઇતિ શ્રીગર્ગસંહિતાયાં ગિરિરાજખણ્ડે શ્રીનારદબહુલાશ્વસંવાદે
શ્રીકૃષ્ણાભિષેકો નામ ચતુર્થોઽધ્યાયઃ

હરિઃ ૐ તત્સચ્છ્રીકૃષ્ણાર્પણમસ્તુ ॥
વર્ગઃ :ગર્ગ સંહિતા