ગર્ગસંહિતા · અધ્યાય 2.25

રાસક્રીડાયાં શિવ તથા આસુરિ સ્તવનમ્ -
શ્રીનારદ ઉવાચ -
એવં વિચિન્ત્ય મનસા શિવો વાઽઽસુરિણા સહ ।
તૌ કૃષ્ણદર્શનાર્થાય જગ્મતુર્વ્રજમણ્ડલમ્

દિવ્યદ્રુમલતાકુઞ્જતોલિકાપુંજશોભિતામ્ ।
પશ્યન્તૌ તૌ દિવ્યભૂમિં કાલિન્દીનિકટે ગતૌ

ગોલોકવાસિન્યો નાર્યો વેત્રહસ્તા મહાબલાઃ ।
ચક્રુર્બલાત્તન્નિષેધં માર્ગસ્થા દ્વારપાલિકાઃ

તાવૂચતુશ્ચાગતૌ સ્વઃ કૃષ્ણદર્શનલાલસૌ ।
તાવાહુર્નૃપશાર્દૂલ માર્ગસ્થા દ્વારપાલિકાઃ

દ્વારપાલિકા ઊચુઃ -
સર્વતો વૃંદકારિણ્યં કોટિશઃ કોટિશો વયમ્ ।
રાસરક્ષાં સદા કુર્મો ન્યસ્તા કૃષ્ણેન ભો દ્વિજૌ

એકોઽસ્તિ પુરુષઃ કૃષ્ણો નિર્જને રાસમણ્ડલે ।
અન્યો ન યાતિ રહસિ ગોપીયૂથં વિના ક્વચિત્

ચેદ્દિદૃક્ષૂ યુવાં તસ્ય સ્નાનં માનસરોવરે ।
કુરુતં તત્ર ગોપીત્વં પ્રાપ્યાશુ વ્રજતં મુની

શ્રીનારદ ઉવાચ -
ઇત્યુક્તૌ તૌ મુનિશિવૌ સ્નાત્વા માનસરોવરે ।
ગોપીત્વં પ્રાપ્ય સહસા જગ્મતૂ રાસમણ્ડલે

સૌવર્ણપ્રખચિત્પદ્મરાગભૂમિ મનોહરે ।
માધવીલતિકાવૃન્દકદંબાચ્છાદિતે શુભે

વસંતચંદ્રકૌમુદ્યા પ્રદીપ્તે સર્વકૌશલે ।
યમુનારત્‍નસોપાનતોલિકાભિર્વિરાજિતે

મયૂરહંસદાત્યૂહકોકિલૈઃ કૂજિતે પરે ।
યમુનાનિલનીલૈજત્તરુપલ્લવશોભિતે

સભામણ્ડપવીથીભિઃ પ્રાંગણસ્તમ્ભપંક્તિભિઃ ।
પતત્પતાકૈર્દિવ્યાભૈઃ સૌવર્ણૈઃ કલશૈર્વૃતે

શ્વેતારુણૈઃ પુષ્પસંઘૈઃ પુષ્પમંદિરવર્ત્મભિઃ ।
અલિકોલાહલૈર્વ્યાપ્તે વાદિત્રમધુરધ્વનૌ

સહસ્રદલપદ્માનાં વાયુના મંદગામિના ।
શીતલેન સુપુણ્યેન સર્વતઃ સુરભીકૃતે

તસ્મિન્નિકુંજે શ્રીકૃષ્ણં કોટિચંદ્રપ્રકાશયા ।
પદ્મિન્યા હંસગામિન્યા રાધયા સમલંકૃતમ્

સ્ત્રીરત્‍નૈરાવૃતં શશ્વદ્‌રાસમણ્ડલમધ્યગમ્ ।
કોટિમન્મથલાવણ્યં શ્યામસુંદરવિગ્રહમ્

વંશીધરં પીતપટં વેત્રપાણિં મનોહરમ્ ।
શ્રીવત્સાંકં કૌસ્તુભિનં વનમાલાવિરાજિતમ્

ક્વણન્નૂપુરમંજીર કાંચિકેયૂરભૂષિતમ્ ।
હારકંકણ બાલાર્ક કુંડલદ્વયમંડિતમ્

કોટિચંદ્રપ્રતીકાશમૌલિનં નંદનંદનમ્ ।
દાનદક્ષૈઃ કટાક્ષૈશ્ચ હરન્તં યોષિતાં મનઃ

દૂરાદપશ્યતાં રાજન્ આસુરીશૌ કૃતાંજલી ।
ગોપીજનાનાં સર્વેષાં પશ્યતાં નૃપસત્તમ

નત્વા શ્રીકૃષ્ણપાદાબ્જમૂચતુર્હર્ષવિહ્વલૌ ।
દ્વાવૂચતુઃ -
કૃષ્ણ કૃષ્ણ મહાયોગિન્ દેવદેવ જગત્પતે

પુણ્ડરીકાક્ષ ગોવિંદ ગરુડધ્વજ તે નમઃ ।
જનાર્દન જગન્નાથ પદ્મનાભ ત્રિવિક્રમ ।
દામોદર હૃષીકેશ વાસુદેવ નમોઽસ્તુ તે

અદ્યૈવ દેવ પરિપૂર્ણતમસ્તુ સાક્ષા-
દ્‌ભૂભૂરિભારહરણાય સતાં શુભાય ।
પ્રાપ્તોઽસિ નંદભવને પરતઃ પરસ્ત્વં
કૃત્વા હિ સર્વનિજલોકમશેષશૂન્યમ્

અંશાંશકાંશકલયાભિરુતાભિરામ-
માવેશપૂર્ણનિચયાભિરતીવ યુક્તઃ ।
વિશ્વં બિભર્ષિ રસરાસમલંકરોષિ
વૃંદાવનં ચ પરિપૂર્ણતમઃ સ્વયં ત્વમ્

ગોલોકનાથ ગિરિરાજપતે પરેશ
વૃંદાવનેશ કૃતનિત્યવિહારલીલ ।
રાધાપતે વ્રજવધૂજનગીતકીર્તે
ગોવિંદ ગોકુલપતે કિલ તે જયોઽસ્તુ

શ્રીમન્નિકુંજલતિકા કુસુમાકરસ્ત્વં
શ્રીરાધિકાહૃદયકંઠ વિભૂષણસ્ત્વમ્ ।
શ્રીરાસમંડલપતિર્વ્રજમંડલેશો
બ્રહ્માંડમંડલમહીપરિપાલકોઽસિ

શ્રીનારદ ઉવાચ -
તદા પ્રસન્નો ભગવાન્ રાધયા સહોતો હરિઃ ।
મન્દસ્મિતો મુનિં પ્રાહ મેઘગંભીરયા ગિરા

ષષ્ટિવર્ષસહસ્રાણિ યુવયોસ્તપતોસ્તપઃ ।
મદ્દર્શનં તેન જાતં સર્વતો નૈરપેક્ષયોઃ

નિષ્કિંચનો યઃ શાન્તશ્ચાજાતશત્રુઃ સ મત્સખા ।
તસ્માદ્‌યુવાભ્યાં મનસા વ્રિયતામીપ્સિતો વરઃ

શિવાસુરી ઊચતુઃ -
નમોઽસ્તુ ભૂમન્યુવયોઃ પદાબ્જે
સદૈવ વૃંદાવનમધ્યવાસ ।
ન રોચતે નોઽન્યમતસ્ત્વદંઘ્રે-
ર્નમો યુવાભ્યાં હરિરાધિકાભ્યામ્

શ્રીનારદ ઉવાચ -
તથાઽસ્તુ ચોક્ત્વા ભગવાન્ વૃંદારણ્યે મનોહરે ।
કાલિંદીનિકટે રાજન્ રાસમંડલમંડિતે

નિકુઞ્જપાર્શ્વે પુલિને વંશીવટસમીપતઃ ।
શિવોઽપિ ચાસુરિમુનિર્નિત્યં વાસં ચકાર હ

અથ કૃષ્ણો રાસલીલાં ચક્રે પદ્માકરે વને ।
પતત્સુગંધિરજસિ ગોપીભિર્ભ્રમરાકુલે

એવં ષાણ્માસિકી રાત્રિઃ
કૃતા કૃષ્ણેન મૈથિલ ।
ગોપીનાં રાસલીલાયાં
વ્યતીતા ક્ષણવત્સુખૈઃ

અરુણોદયવેલાયાં સ્વગૃહાન્ વ્રજયોષિતઃ ।
યૂથીભૂત્ત્વા યયૂ રાજન્ સર્વાઃ પૂર્ણમનોરથાઃ

શ્રીનંદમંદિરં સાક્ષાત્પ્રયયૌ નંદનંદનઃ ।
વૃષભાનુપુરં પ્રાગાદ્‌વૃષભાનુસુતા ત્વરમ્

એવં શ્રીકૃષ્ણચંદ્રસ્ય રાસાખ્યાનં મનોહરમ્ ।
સર્વપાપહરં પુણ્યં કામદં મંગલાયનમ્

ત્રિવર્ગ્યદં જનાનાં તુ
મુમુક્ષુણાં સુમુક્તિદમ્ ।
મયા તવાગ્રે કથિતં
કિં ભૂયઃ શ્રોતુમિચ્છસિ

ઇતિ શ્રીગર્ગસંહિતાયાં વૃન્દાવનખણ્ડે
રાસક્રીડાયાં શિવ તથા આસુરિ સ્તવનં નામ પઞ્ચવિંશોઽધ્યાયઃ