ગર્ગસંહિતા · અધ્યાય 10.60

અશ્વમેધખણ્ડઃ - ષષ્ટિતમોઽધ્યાયઃ
રાધા કૃષ્ણસ્ય ગોલોકારોહણ -
શ્રીગર્ગ ઉવાચ -
ઇતિ શ્રુત્વા વ્યાસમુખાત્કૃષ્ણનામ્નાં સહસ્રકમ્ ।
સંપૂજ્ય તં યાદવેન્દ્રો ભક્ત્યા કૃષ્ણે મનો દધે

તતઃ સ મિથિલાયાં ચ બહુલાશ્વશ્રુતદેવયોઃ ।
દત્ત્વા સ્વદર્શનં કૃષ્ણ આયયૌ દ્વારકાં પુરીમ્

તતશ્ચ પાંડવાઃ સર્વે દ્રૌપદ્યા સહ ભાર્યયા ।
દ્વારકાયા વિનિર્ગત્ય વિચેરુસ્તે વને વને

ભુક્ત્વા ચ વનવાસં તેઽજ્ઞાતવાસં તથૈવ ચ ।
વિરાટનગરે સર્વે સસૈન્યાસ્તેઽભવન્નૃપ

તતશ્ચ કૌરવાઃ સર્વે શ્રીકૃષ્ણેનાપિ પ્રાર્થિતાઃ ।
ન તેષાં પ્રદદૂ રાજ્યમર્ધાર્ધં ચ તદર્ધકમ્

પાંડવાનાં કૌરવાણાં જ્ઞાત્વા યુદ્ધં જનાર્દનઃ ।
નિરાયુધોઽભૂદ્‌યાત્રાયાં બલોઽહન્સૂતબલ્વલૌ

તતઃ સર્વે કુરુક્ષેત્રે ધર્મક્ષેત્રે પ્રવિશ્ય ચ ।
કૌરવાઃ પાંડવાશ્ચૈવ યુદ્ધં ચક્રુઃ પરસ્પરમ્

જયઃ કૃષ્ણસ્ય કૃપયા પાંડવાનાં બભૂવ હ ।
ભારતે ચ મૃતાઃ સર્વે કૌરવાઃ કૃતકિલ્બિષાઃ

તતશ્ચ નવ વર્ષાણિ ધર્મો રાજ્યં ચકાર હ ।
હયમેધત્રયં ચક્રે તેન શુદ્ધોઽભવન્નૃપઃ

તતઃ કૃષ્ણેચ્છયા રાજન્દ્વારકાયાં કિલૈકદા ।
યાદવેભ્યશ્ચ સર્વેભ્યો વિપ્રશાપોઽભવન્મહાન્

તતઃ કૃષ્ણસ્તુ ભગવાન્પ્રપન્નાયોદ્ધવાય ચ ।
અશ્વત્થે કથયામાસ શ્રીમદ્‌ભાગવતં પરમ્

તતો બભૂવ સંગ્રામો યાદવાનાં પરસ્પરમ્ ।
નિહતાસ્તે પ્રભાસે વૈ શસ્ત્રૈર્નાનાવિધૈરપિ

બલઃ શરીરં માનુષ્યં ત્યક્ત્વા ધામ જગામ હ ।
દેવાઁસ્તત્રાગતાન્દૃષ્ટ્વા હરિરંતરધીયત

વ્રજે ગત્વા હરિર્નંદં યશોદાં રાધિકાં તથા ।
ગોપાન્ગોપીર્મિલિત્વાઽઽહ પ્રેમ્ણા પ્રેમી પ્રિયાન્સ્વકાન્

શ્રીકૃષ્ણ ઉવાચ -
ગચ્છ નંદ યશોદે ત્વં પુત્રબુદ્ધિં વિહાય ચ ।
ગોલોકં પરમં ધામ સાર્ધં ગોકુલવાસિભિઃ

અગ્રે કલિયુગો ઘોરશ્ચાગમિષ્યતિ દુઃખદઃ ।
યસ્મિન્વૈ પાપિનો મર્ત્યા ભવિષ્યંતિ ન સંશયઃ

સ્ત્રીપુંસોર્નિયમો નાસ્તિ વર્ણાનાં ચ તથૈવ ચ ।
તસ્માદ્‌ગચ્છાશુ મદ્ધામ જરામૃત્યુહરં પરમ્

ઇતિ બ્રુવતિ શ્રીકૃષ્ણે રથં ચ પરમાદ્‌ભુતમ્ ।
પઞ્ચયોજનવિસ્તીર્ણં પઞ્ચયોજનમૂર્ધ્વગમ્

વજ્રનિર્મલસંકાશં મુક્તારત્‍નવિભૂષિતમ્ ।
મન્દિરૈર્નવલક્ષૈશ્ચ દીપૈર્મણિમયૈર્યુતમ્

સહસ્રદ્વયચક્રં ચ સહસ્રદ્વયઘોટકમ્ ।
સૂક્ષ્મવસ્ત્રાચ્છાદિતં ચ સખીકોટિભિરાવૃતમ્

ગોલોકાદાગતં ગોપા દદૃશુસ્તે મુદાન્વિતાઃ ।
એતસ્મિન્નંતરે તત્ર કૃષ્ણદેહાદ્વિનિર્ગતઃ

દેવશ્ચતુર્ભુજો રાજન્કોટિમન્મથસન્નિભઃ ।
શંખચક્રધરઃ શ્રીમાઁલ્લક્ષ્મ્યા સાર્ધં જગત્પતિઃ

ક્ષીરોદં પ્રયયૌ શીઘ્રં રથમારુહ્ય સુંદરમ્ ।
તથા ચ વિષ્ણુરૂપેણ શ્રીકૃષ્ણો ભગવાન્ હરિઃ

લક્ષ્મ્યા ગરુડમારુહ્ય વૈકુણ્ઠં પ્રયયૌ નૃપ ।
તતો ભૂત્વા હરિઃ કૃષ્ણો નરનારાયણાવૃષી

કલ્યાણાર્થં નરાણાં ચ પ્રયયૌ બદ્રિકાશ્રમમ્ ।
પરિપૂર્ણતમઃ સાક્ષાચ્છ્રીકૃષ્ણો રાધયા યુતઃ

ગોલોકાદાગતં યાનમારુરોહ જગત્પતિઃ ।
સર્વે ગોપાશ્ચ નન્દાદ્યા યશોદાદ્યા વ્રજસ્ત્રિયઃ

ત્યક્ત્વા તત્ર શરીરાણિ દિવ્યદેહાશ્ચ તેઽભવન્ ।
સ્થાપયિત્વા રથે દિવ્યે નંદાદીન્ભગવાન્હરિઃ

ગોલોકં પ્રયયૌ શીઘ્રં ગોપાલો ગોકુલાન્વિતઃ ।
બ્રહ્માંડેભ્યો બહિર્ગત્વા દદર્શ વિરજાં નદીમ્

શેષોત્સંગે મહાલોકં સુખદં દુઃખનાશનમ્ ।
દૃષ્ટ્વા રથાત્સમુત્તીર્ય સાર્ધં ગોકુલવાસિભિઃ

વિવેશ રાધયા કૃષ્ણઃ પશ્યન્ન્યગ્રોધમક્ષયમ્ ।
શતશૃઙ્ગં ગિરિવરં તથા શ્રીરાસમણ્ડલમ્

તતો યયૌ કિયદ્‌દૂરં શ્રીમદ્‌વૃન્દાવનં વનમ્ ।
વનૈર્દ્વાદશભિર્યુક્તં દ્રુમૈઃ કામદુઘૈર્વૃતમ્

નદ્યા યમુનયા યુક્તં વસંતાનિલમંડિતમ્ ।
પુષ્પકુઞ્જનિકુઞ્જં ચ ગોપીગોપજનૈર્વૃતમ્

તદા જયજયારાવઃ શ્રીગોલોકે બભૂવ હ ।
શૂન્યીભૂતે પુરા ધામ્નિ શ્રીકૃષ્ણે ચ સમાગતે

તતશ્ચ યદુપત્‍ન્યશ્ચ ચિતામારુહ્ય દુઃખતઃ ।
પતિલોકં યયુઃ સર્વા દેવક્યાદ્યાશ્ચ યોષિતઃ

બંધૂનાં નષ્ટગોત્રાણાં ચકાર સાંપરાયિકમ્ ।
ગીતાજ્ઞાનેન સ્વાત્માનં શાંતયિત્વા સ દુઃખતઃ

અર્જુનઃ સ્વપુરં ગત્વા તમુવાચ યુધિષ્ઠિરમ્ ।
સ રાજા ભ્રાતૃભિઃ સાર્ધં યયૌ સ્વર્ગં ચ ભાર્યયા

પ્લાવયદ્‌દ્વારકાં સિન્ધૂ રૈવતેન સમન્વિતામ્ ।
વિહાય નૃપશાર્દૂલ ગેહં શ્રીરુક્મણીપતેઃ

અદ્યાપિ શ્રૂયતે ઘોષો દ્વાર્વત્યામર્ણવે હરેઃ ।
અવિદ્યો વા સવિદ્યો વા બ્રાહ્મણો મામકી તનુઃ

વિષ્ણુસ્વામી રવેરંશઃ કલેરાદૌ મહાર્ણવે ।
ગત્વા નીત્વા હરેરર્ચાં દ્વાર્વત્યાં સ્થાપયિષ્યતિ

તં દ્વારકેશં પશ્યંતિ મનુજા યે કલૌ યુગે ।
સર્વે કૃતાર્થતાં યાંતિ તત્ર ગત્વા નૃપેશ્વરઃ

યઃ શૃણોતિ ચરિત્રં વૈ ગોલોકારોહણં હરેઃ ।
મુક્તિં યદૂનાં ગોપાનાં સર્વપાપૈઃ પ્રમુચ્યતે

ઇતિ શ્રીમદ્‌ગર્ગસંહિતાયામશ્વમેધખણ્ડે
રાધાકૃષ્ણયોર્ગોલોકારોહણં નામ ષષ્ટિતમોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા