ગર્ગસંહિતા · અધ્યાય 10.6

અશ્વમેધખણ્ડઃ - ષષ્ઠોઽધ્યાયઃ
કૃષ્ણચરિતવર્ણનમ્ -
શ્રીગર્ગ ઉવાચ -
પુનસ્તે કથયિષ્યામિ યશઃ સંક્ષેપતો હરેઃ ॥
ચકાર હાસ્યં ભગવાન્‍રુક્મિણ્યા સહ ચાદ્‌ભુતમ્

અનિરુદ્ધવિવાહે ચાવધીદ્‌ભ્રાત્રા તુ રુક્મિણમ્ ॥
ઊષાસ્વપ્નકથા ચિત્રલેખયા હરણં હરેઃ

પૌત્રસ્ય બન્ધનં ચાપિ બાણયાદવસંયુગઃ ॥
કૃષ્ણશંકરયોર્યુદ્ધે જ્વરસંસ્તવનં તતઃ

બાણબાહુચ્છિદો રુદ્રસ્તુતિર્બાણસ્ય રક્ષણે ॥
ઊષાપ્રાપ્તિર્નૃગાખ્યાનં બલસ્ય ચ વ્રજાગમમ્

ગોપીવિલાપો રામસ્ય સ્તુતિર્ગોપીભિરેવ ચ ॥
યમુનાકર્ષણં કાશીપતિપૌંડ્રકઘાતનમ્

કૃત્યોત્પત્તિર્દાહનં ચ કાશ્યાઃ કપિવધસ્તતઃ ॥
સાંબસ્ય બન્ધને રામવિક્રમો ગજસાહ્વયે

ઉગ્રસેનરાજસૂયે જઘાન શકુનિં હરિઃ ॥
નારદેન હરેર્લીલાદર્શનં ગૃહમેધિનામ્

આહ્નિકં વાસુદેવસ્ય રાજદૂતેન વૈ સ્તુતિઃ ॥
ઇન્દ્રપ્રસ્થે ચ ગમનમુદ્ધવેન ચ યાદવૈઃ

જરાસન્ધં ચ ભીમેન નિજઘાન ગિરિવ્રજે ॥
સહદેવાભિષેકં ચ રાજભિશ્ચ કૃતા સ્તુતિઃ

રાજસૂયે હરેઃ પૂજા શિશુપાલવધસ્તથા ॥
દુર્યોધનાભિમાનસ્ય ભંગઃ પ્રદ્યુમ્નશાલ્વયોઃ

યુદ્ધં ત્રિનવરાત્રં ચ કૃષ્ણસ્યાગમનં તતઃ ॥
શાલ્વસ્ય દન્તવક્ત્રસ્ય તદ્‌ભ્રાતુર્લીલયા વધઃ

તતો ગજાહ્વયે રાજન્દુર્દ્યૂતેન ચ કૌરવૈઃ ॥
વિનિર્જિતો ભ્રાતૃયુક્તઃ સભાર્યસ્તુ યુધિષ્ઠિરઃ

વનં જગામ સંસ્થાપ્ય પૃથાં ચ વિદુરગૃહે ॥
ગત્વારણ્યે નિવાસં વૈ ચકાર બહુભિર્દિનૈઃ

તતશ્ચ પાલયામાસ મહીં દુર્યોધનો મુદા ॥
પ્રજાસ્તં નાભ્યનન્દન્સ્મ પાંડુપુત્રે ગતે સતિ

અરણ્યે વર્તમાનાન્વૈ પાંડવાન્દુઃખકર્ષિતાન્ ॥
મિલિત્વાઽઽશ્વાસયામાસ હ્યનંતશ્ચૈકદા હરિઃ

દૃષ્ટ્વાથ પાંડવાન્કૃષ્ણો હ્યાજગામ કુશસ્થલીમ્ ॥
ઉગ્રસેનસુધર્માયાં શશંસ ચેષ્ટિતં ચ તત્

તચ્ચ શ્રુત્વા યાદવાશ્ચ પ્રોચુઃ સર્વે હિ વિસ્મિતાઃ ॥
યાદવા ઊચુઃ
કિં કૃતં ધૃતરાષ્ટ્રેણ દીના ભ્રાતૃસુતા અહો

દુર્દ્યૂતેન વિનિર્જિત્યાધર્માન્નિષ્કાસિતા ગૃહાત્ ॥
સ્વાધર્મેણ વિનશ્યંતિ કૌરવા રાજ્યલોલુપાઃ

પાંડવેભ્યસ્તુ ભગવાંસ્તસ્માદ્દાસ્યતિ સંપદમ્ ॥
ગર્ગ ઉવાચ -
ઇતિ શ્રુત્વા યાદવાનાં વાક્યં ચ મધુસૂદનઃ

આયયૌ વૈ સ્વભવનં સાયંકાલે નૃપેશ્વર ॥
આગતં સ્વાત્મજં વીક્ષ્ય નમંતં દેવકી મુદા

દત્વાઽઽશિષં ભોજનં ચ કારયામાસ વૈ સતી

તતઃ સ ચાયયૌ કૃષ્ણઃ સ્વસ્ત્રીણાં મંદિરાણિ ચ ॥
પ્રિયાભિઃ પૂજિતસ્તત્ર ચકાર શયનં કિલ

ઇતિ શ્રીગર્ગસંહિતાયામશ્વમેધખંડે
શ્રીકૃષ્ણચરિત્રવર્ણનં નામ ષષ્ઠોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા