ગર્ગસંહિતા · અધ્યાય 10.58

અશ્વમેધખણ્ડઃ - અષ્ટપંચાશત્તમોઽધ્યાયઃ
કૃષ્ણાહ્વાને મૃતાનાં કંસાદિ ભ્રાતૃગણાનાં વૈકુણ્ઠાત્
ઉગ્રસેનસભાગમનં તથા કંસાય તેષાં ઉપદેશઃ -
શ્રીગર્ગ ઉવાચ -
તતઃ સર્વે સમાહૂતાઃ શ્રીકૃષ્ણેન મહાત્મના ॥
વૈકુણ્ઠાદાયયુઃ શીઘ્રં કંસાદ્યા નવ ભ્રાતરઃ

દૃષ્ટ્વા તાનાગતાન્સર્વે વિસ્મયં પરમં યયુઃ ॥
તે સમાગત્ય શ્રીકૃષ્ણં બલં પ્રદ્યુમ્નમેવ ચ

અનિરુદ્ધં ચ કંસાદ્યા નેમુઃ સર્વે પૃથક્પૃથક્ ॥
દદર્શ ચોગ્રસેનસ્તુ સુધર્માયાં સુતાન્નૃપ

શક્રસિંહાસનસ્થો વૈ રુચિમત્યા સમન્વિતઃ ॥
કંસાદીન્સ્વસુતાન્પ્રીતઃ કૃષ્ણાકારાંશ્ચતુર્ભુજાન્

શંખચક્રગદાપદ્મૈર્ભૂષિતાન્પીતવાસસઃ ॥
કૃષ્ણપાર્શ્વે સ્થિતાન્પુત્રાનાહ્વયામાસ ભૂપતિઃ

તતઃ કૃષ્ણસ્તુ ભગવાન્કંસાદીન્પ્રાહ સસ્મિતઃ ॥
પશ્ય સ્વમાતાપિતરૌ યુષ્માકં દર્શનોત્સુકૌ

ગત્વા સમીપે હે વીરા યૂયં નમત ભક્તિતઃ ॥
ઇતિ કૃષ્ણસ્ય વચનં કૃષ્ણભૃત્યા નિશમ્ય ચ

ઊચુઃ પ્રહર્ષિતાઃ સર્વે કંકન્યગ્રોધકાદયઃ ॥
કંસાદ્યા ઊચુઃ -
ઈદૃશાઃ પિતરોઽસ્માકમીદૃશ્યો માતરશ્ચ વૈ

બહવશ્ચાભવન્નાથ ભ્રમતાં તવ માયયા ॥
હરિઃ પિતા તુ જીવસ્ય શ્રુતિરેષા સનાતની

તસ્માચ્ચાન્યં ન પશ્યામો વયં ત્વન્નિકટે સ્થિતાઃ ॥
પુરા વિલોકિતસ્ત્વં વૈ સંગ્રામે બલસંયુતઃ

પશ્ચાઞ્જાતૌ દ્વારકાયાં ન દૃષ્ટૌ કાર્ષ્ણિકાર્ષ્ણિજૌ ॥
તસ્માદ્‌દ્રષ્ટું ચતુર્વ્યૂહં વયમત્ર સમાગતાઃ

શ્રીકૃષ્ણો બલભદ્રશ્ચ શ્રીપ્રદ્યુમ્ન ઉષાપતિઃ ॥
પરિપૂર્ણતમા એતે હ્યહોઽસ્માભિર્વિલોકિતાઃ

કેન પૂર્વેણ પુણ્યેન દૃષ્ટો યો દુર્લભઃ સતામ્ ॥
પરિપૂર્ણશ્ચચતુર્વ્યૂહો ન જાનીમો વયં કિલ

હે સંકર્ષણ હે કૃષ્ણ હે પ્રદ્યુમ્ન ઉષાપતે ॥
મૂઢાનાં નઃ કુબુદ્ધીનામપરાધં ક્ષમસ્વ ચ

ગચ્છ ગોવિંદ વૈકુણ્ઠં શૂન્યં તે ધામ સુન્દરમ્ ॥
ધન્યા ત્વયા દ્વારકા તુ વૈકુણ્ઠાચ્ચ કૃતાધિકા

યદર્ચિતં બ્રહ્મશચીશવહ્નિભિ-
રાદિત્યગૌરીશમરુદ્યમાદિભિઃ ॥
પૌલસ્ત્યતારેશજલેશપૂજિતં
પાદારવિંદં સતતં ભજામહે

મુનીંદ્રલક્ષ્મીસુરભક્તસાત્વતૈઃ
સુપૂજિતં ચંદનગંધધૂપકૈઃ ॥
લાજાક્ષતૈશ્ચાંકુરપૂગચર્ચિતં
પાદારવિંદં સતતં ભજામહે

ગર્ગ ઉવાચ -
ઇત્યુક્ત્વા તે ચ કંસાદ્યા વૈકુણ્ઠં પ્રયયુર્નૃપ ॥
સર્વેષાં પશ્યતાં રાજા વિસ્મિતોઽભૂત્સભાર્યયા

ઇતિ શ્રીગર્ગસંહિતાયાં હયમેધખણ્ડે
કંસાદિદર્શનં નામાષ્ટપંચાશત્તમોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા