ગર્ગસંહિતા · અધ્યાય 10.47

અશ્વમેધખણ્ડઃ - સપ્તચત્વારિંશોઽધ્યાયઃ
યાદવગણાનાં વ્રજપુરાત્ યાત્રા -
ગર્ગ ઉવાચ -
ઇદં કૃષ્ણ્સ્ય ચરિતં ગુપ્તં શાસ્ત્રેષુ વર્ણિતમ્ ॥
મયા તવાગ્રે રાજેંદ્ર અથાન્યચ્છૃણુ વિસ્તરાત્

એવં સ્થિત્વા દિનાન્યષ્ટૌ શ્રીકૃષ્ણો નંદપત્તને ॥
આનંદં પ્રદદન્નૄણાં પુનર્ગન્તું મનો દધે

યશોમતી કૃષ્ણમાતા પ્રાણેભ્યોઽપિ પ્રિયં સુતમ્ ॥
ગન્તુમભ્યુદિતં દૃષ્ટ્વા રુરોદોચ્ચૈર્યથા પુરા

રુરુદુસ્તત્ર ગોપ્યશ્ચ બાષ્પપર્યાકુલેક્ષણાઃ ॥
સ્મરંત્યઃ પૂર્વદુઃખાનિ ગેહે ગેહે નૃપેશ્વર

યાવત્યો વ્રજનાર્યશ્ચ તાવદ્‌રૂપધરો હરિઃ ॥
પૃથગાશ્વાસયામાસ તથા રાધાં સ કોવિદઃ

માતરં પ્રાહ ભગવાન્માતઃ શોકં તુ મા કુરુ ॥
શીઘ્રમત્રાગમિષ્યામિ કારયિત્વા ક્રતૂત્તમમ્

ત્વં ન મન્યસે ચેન્માતર્નિત્યં દ્રક્ષસિ ચાંતિકે ॥
પુત્રરૂપં ચ માં ભક્ત્યા કૃતાંતભયભઞ્જનમ્

એવં તાં તુ સમાશ્વાસ્ય નિષ્ક્રમ્ય સદનાદ્ધરિઃ ॥
ગોપૈર્યુક્તોઽશ્રુપૂર્ણાક્ષઃ પૌત્રસેનાં જગામ હ

ગત્વાનિરુદ્ધસેનાયાં યાદવાન્હયમોચને ॥
દદાવાજ્ઞાં નૃપશ્રેષ્ઠ સાક્ષાન્નારાયણો હરિઃ

નોદિતઃ કૃષ્ણચન્દ્રેણ હયં સંપૂજ્ય યત્‍નતઃ ॥
પુનુર્મુમોચ તત્પૌત્રો વિજયાર્થે હિ પૂર્વવત્

યાદવાશ્ચાનિરુદ્ધાદ્યા નંદં નત્વાશ્રુપૂરિતાઃ ॥
ગંતુમારુરુહુઃ સર્વે વાહનાનિ ચ કૃચ્છ્રતઃ

કૃષ્ણાકારાન્કૃષ્ણપુત્રાન્કૃષ્ણપૌત્રાઁશ્ચ સુન્દરાન્ ॥
ગંતુમભ્યુદિતાન્સર્વાન્કૃષ્ણેન સહિતાન્યદૂન્

દૃષ્ટ્વા તે રુરુદુર્ગોપા ગોવિંદવિરહાતુરાઃ ॥
સ્મરંતઃ પૂર્વદુઃખાનિ શુષ્કકંઠૌષ્ઠતાલુકાઃ

રુરોદ નંદરાજોઽપિ બાષ્પવ્યાકુલલોચનઃ ॥
ન કિંચિદૂચે દુઃખાર્તો મુખેન પરિશુષ્યતા

સર્વાનાશ્વાસયામાસ કૃષ્ણોઽપ્યશ્રુપરિપ્લુતઃ ॥
આયાસ્ય ઇતિ વાક્યૈશ્ચ મિલિત્વા તુ પૃથક્પૃથક્

ચૈત્રમાસે યદા યજ્ઞો દ્વારકાયાં ભવિષ્યતિ ॥
આહ્વયિષ્યામિ ગોપાલા યુષ્માન્સર્વાન્ન સંશયઃ

ગોપાલા ગોકુલે નિત્યં ગોપાલં માં હિ દ્રક્ષ્યથ ॥
તસ્માન્નિવાસં કુરુત અત્રૈવ વ્રજમણ્ડલે

એવમાશ્વાસ્ય તૈર્દત્તં પારિબર્હં પ્રગૃહ્ય ચ ॥
નંદં નત્વા રથે સ્થિત્વા પ્રાયાદ્‌વૃષ્ણિવરૈર્હરિઃ

નન્દાદ્યા દુઃખિતા ગોપાઃ કૃષ્ણસ્ય ચરણાંબુજે ॥
ક્ષિપ્તં મનઃ પુનર્હર્તુમનીશા ગોકુલં યયુઃ

ગોપા ગોપ્યાશ્ચ શ્રીકૃષ્ણં પ્રેમમગ્નાશ્ચ નિત્યશઃ ॥
સમીપે નૃપ પશ્યંતિ યોગિનામપિ દુર્લભમ્

ઇતિ શ્રીગર્ગસંહિતાયાં હયમેધખણ્ડે
વ્રજાદન્યત્ર ગમનં નામ સપ્તચત્વારિંશોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા