ગર્ગસંહિતા · અધ્યાય 10.43

અશ્વમેધખણ્ડઃ - ત્રિચત્વારિંશોઽધ્યાયઃ
રાસક્રીડા -
ગર્ગ ઉવાચ -
વૃંદાવને વૃક્ષલતાલિસંકુલે
મંદાનિલે વીજતિ શીતલે નૃપ ॥
રંધ્રાણિ વેણોઃ કિલ પૂરયન્હરિ-
ર્મુહુર્હરત્યેવ દિવૌકસાં મનઃ

વેણુગીતં તતઃ શ્રુત્વા શ્રીરાધા કીર્તિનંદિની ॥
ભુજાભ્યાં નન્દસૂનું વૈ જગ્રાહાનંગવિહ્વલા

ગોકુલસ્ય ચકોરીં તાં કૃષ્ણો ગોકુલચન્દ્રમાઃ ॥
દૃષ્ટ્વા કુસુમપર્યંકે તયા રેમે હરન્મનઃ

શ્રીકૃષ્ણસ્ય વિહારેણ બ્રહ્માનન્દેન સ્વામિની ॥
મુદં લેભે મહાત્યંતં તથા સ્વામી વશીકૃતઃ

રમણીયં રતિકરં રાસે રામા રમેશ્વરમ્ ॥
જગૃહુઃ સર્વતો રાજઞ્છતયૂથાશ્ચ યોષિતઃ

તાભિઃ સાર્દ્ધં હરી રમ્યો રેમે વૈ રાસમણ્ડલે ॥
તાવદ્‌રૂપધરો રાજન્ યાવત્યો વ્રજયોષિતઃ

વિરહિણ્યશ્ચ તાઃ સર્વા વિરહેણ વિહારિણઃ ॥
બ્રહ્માનંદેન સન્મર્ત્યા આનન્દં લેભિરે યથા

શ્રીકરાભ્યાં શ્રીકરાભ્યાં શ્રીશઃ શ્રીશ્યામસુન્દરઃ ॥
દધાર હૃદયે સર્વાસ્તાભિર્ભક્ત્યા વશીકૃતઃ

સ્વેદયુક્તાન્યાનનાનિ તાસાં પ્રીત્યા વ્રજેશ્વરઃ ॥
પ્રામૃજત્પીતવસ્ત્રેણ કિં વદામિ તપઃફલમ્

વિના સાંખ્યેન યોગેન તપસા શ્રવણેન ચ ॥
વિના તીર્થેન દાનેન પ્રાપ્તાઃ કામેન તા હરિમ્

તતો ગોપીજનાઃ સર્વા માનવત્યઃ પરસ્પરમ્ ॥
કુવાક્યં કથયામાસુઃ કૃષ્ણં તૃપ્તા વિહારતઃ

અસ્માઁસ્ત્યક્ત્વા પુરા કૃષ્ણો ગતઃ શ્રીમથુરાં પુરીમ્ ॥
વિલોકિતું રૂપિણીશ્ચ સુન્દરીઃ સ્ત્રીશ્ચ સુન્દરઃ

ન દૃષ્ટાસ્તેન સુંદર્યો જગામ દ્વારકાં પુનઃ ॥
ન દૃષ્ટાસ્તેન તાસ્તત્ર વિવાહં કૃતવાન્પુનઃ

રુક્મિણીં ભીષ્મકસુતાં ન મત્વા તાં તુ રૂપિણીમ્ ॥
પુનર્વિવાહાન્કૃતવાન્સહસ્રાણી ચ ષોડશ

ન મત્વા રૂપિણીસ્તાશ્ચ શોકં કુર્વન્પુનઃ પુનઃ ॥
વ્રજમાગતવાન્સખ્યઃ શ્રીકૃષ્ણોઽસ્માન્વિલોકિતુમ્

દૃષ્ટ્વા રૂપાણિ ચાસ્માકં સર્વદ્રષ્ટા રમેશ્વરઃ ॥
પ્રસન્નોઽભૂત્તથા સખ્યો યથા રાસે હરિઃ પુરા

તસ્માદ્વયં ચ સર્વાસાં સુન્દરીણાં વરાઃ સ્મૃતાઃ ॥
સુનેત્રાશ્ચંદ્રવદનાઃ શશ્વત્સુસ્થિરયૌવનાઃ ॥
અસ્મત્તુલ્યાશ્ચ રૂપિણ્યો નૈવ દેવાંગનાશ્ચ ખે ॥
યાભિઃ શીઘ્રં કટાક્ષૈશ્ચ કૃષ્ણઃ કામી વશીકૃતઃ

અહો વૈ યેન હંસેન મુક્તાઃ પૂર્વં પ્રભક્ષિતાઃ ॥
સ એવાન્યત્કથં વસ્તુ ભક્ષયિષ્યતિ દુઃખતઃ

ન સંતિ મુક્તાઃ સર્વત્ર સંતિ માનસરોવરે ॥
તથા વરસ્ત્રિયો ભૂમૌ ન સંતિ સંતિ ચાત્ર હિ

ગર્ગ ઉવાચ -
ઇતિ માનવતીનાં ચ સ્વાત્મારામો જગત્પતિઃ ॥
વચઃ શૃણ્વન્‍રાધયા ચ તત્રૈવાંતરધીયત

નિર્દ્ધનોઽપિ ધનં લબ્ધ્વા માનં પ્રકુરુતે નૃપ ॥
યસ્ય નારાયણઃ પ્રાપ્તો તસ્ય કિં કથયામ્યહમ્

ઇતિ શ્રીગર્ગસંહિતાયાં હયમેધખણ્ડે
રાસક્રીડાયાં ત્રિચત્વારિંશોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા