ગર્ગસંહિતા · અધ્યાય 10.41

અશ્વમેધખણ્ડઃ - એકચત્વારિંશોઽધ્યાયઃ
રાધાકૃષ્ણમિલનમ્ -
શ્રીગર્ગ ઉવાચ -
આહૂતો રાધયા કૃષ્ણઃ સન્ધ્યાયાં નન્દનંદનઃ ॥
જગામ શશ્વદેકાન્તે શીતલં કદલીવનમ્

રંભાદલૈશ્ચંદનસ્ય પંકયુક્તં મનોહરમ્ ॥
સ્ફારાસ્ફુરન્નભ્રગેહં યમુનાવાયુશીકરમ્

એતાદૃશં રાધિકાયાઃ સુન્દરં મેઘમંદિરમ્ ॥
સર્વં દુઃખાગ્નિના નિત્યં ભસ્મીભૂતં બભૂવ હ

શ્રીદામશાપેન નૃપ દુઃખેન વૃષભાનુજા ॥
તનું રક્ષતિ તત્રાપિ કૃષ્ણાગમનહેતવે

નિશમ્ય કૃષ્ણં સ્વવને સમાગતં
સખીમુખાચ્છ્રીવૃષભાનુનંદિની ॥
આનેતુમુત્થાય વરાસનાત્ત્વરં
દ્વારે સખીભિર્નૃપ સા જગામ હ

દદૌ હ્યાસનપાદ્યાદ્યાનુપચારાન્વ્રજેશ્વરી ॥
વદંતી કુશલં વાક્યં કૃષ્ણા કૃષ્ણં વ્રજેશ્વરમ્

પરિપૂર્ણતમં દૃષ્ટ્વા પરિપૂર્ણતમા નૃપ ॥
જહૌ વિરહજં દુઃખં સંયોગે હર્ષપૂરિતા

ચકાર સ્વસ્યાઃ શૃઙ્ગારં વસ્ત્રાલંકારચંદનૈઃ ॥
કુશસ્થલ્યાં ગતે નાથે શૃઙ્ગારો ન કૃતસ્તયા

પુરા તયા ન ભુક્તં ચ તાંબૂલં મિષ્ટભોજનમ્ ॥
કૃતં ન શય્યાશયનં ક્વચિદ્ધાસ્યં ન વા કૃતમ્

સિંહાસને સ્થિતં રાધા દેવં મદનમોહનમ્ ॥
હર્ષાશ્રૂણિ પ્રમુંચંતી જગૌ ગદ્‌ગદયા ગિરા

રાધોવાચ -
ગોકુલં મથુરાં ત્યક્ત્વા ગતઃ કસ્માત્કુશસ્થલીમ્ ॥
વદ તન્મે હૃષીકેશ ત્વં સાક્ષાદ્‌ગોકુલેશ્વરઃ

ક્ષણં યુગસમં નાથ જાનામિ ત્વદ્વિયોગતઃ ॥
ઘટીં મન્વંતરસમાં દ્વિપરાર્દ્ધસમં દિનમ્

કસ્મિન્કુકાલે વિરહો મે બભૂવ ચ દુઃખદઃ ॥
યેન ત્વચ્ચરણૌ દેવ ન પશ્યામિ સુખપ્રદૌ

યથા રામં તુ સીતેવ માનસં વરટેવ ચ ॥
તથા રાસેશ્વરં ત્વાં તુ માનદં હિ સમુત્સહે

સર્વં જાનાસિ સર્વજ્ઞ કિં દુઃખં કથયામ્યહમ્ ॥
શતવર્ષં ગતં નાથ વિયોગો ન ગતો મમ

ઇત્યુક્ત્વા વચનં રાજન્સ્વામિની સ્વામિનં પરમ્ ॥
વિયોગખિન્ના દુઃખાનિ સ્મરંતી સા રુરોદ હ

દૃષ્ટ્વા પ્રિયાં રુદંતીં તાં પ્રિયઃ પ્રાહ પ્રિયં વચઃ ॥
તસ્માશ્ચ શમયન્વાક્યૈઃ કૃષ્ણઃ કશ્મલમેવ ચ

શ્રીકૃષ્ણ ઉવાચ -
ન કર્તવ્યસ્ત્વયા રાધે શોકશ્ચ તનુશોષકઃ ॥
તેજશ્ચૈકં દ્વિધાભૂતભાવયોઃ ઋષયો વિદુઃ

યત્રાહં ત્વં સદા તત્ર યત્ર ત્વં હ્યહમેવ ચ ॥
વિયોગ આવયોર્નાસ્તિ માયાપુરુષયોર્યથા

ભેદં હિ ચાવયોર્મધ્યે યે પશ્યંતિ નરાધમાઃ ॥
દેહાંતે નરકાન્‌રાધે તે પ્રયાંતિ સ્વદોષતઃ

અથાતસ્ત્વં તુ માં રાધે નિત્યં દ્રક્ષ્યસિ ચાંતિકે ॥
પ્રભાતે ચક્રવાકીવ ચક્રવાકં પ્રિયંકરમ્

કિંચિત્કાલેન દયિતે ગોપગોપીભિરેવ ચ ॥
સાકં ત્વયાક્ષરં બ્રહ્મ શ્રીગોલોકં વ્રજામ્યહમ્

ગર્ગ ઉવાચ -
માધવસ્ય વચઃ શ્રુત્વા ગોપીભિઃ સહ રાધિકા ॥
પ્રસન્ના પૂજયામાસ રમેશં ચ રમા યથા

શ્રીરાધયા પુનઃ કૃષ્ણો રાસાર્થં પ્રાર્થિતો નૃપ ॥
પ્રસ્રન્નો વૃંદકારણ્યે રાસં કર્તું મનો દધે

ઇતિ શ્રીગર્ગસંહિતાયાં હયમેધખણ્ડે
રાધાકૃષ્ણમેલનં નામૈકચત્વારિંશોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા