ગર્ગસંહિતા · અધ્યાય 10.39

અશ્વમેધખણ્ડઃ - એકોનચત્વારિંશોઽધ્યાયઃ
અસુરૈઃ સહ યુદ્ધે અનિરુદ્ધવિજયમ્ -
ગર્ગ ઉવાચ -
કૃષ્ણં દૃષ્ટ્વા હરસ્તત્ર ભીતઃ શંકિતમાનસઃ ॥
ત્યક્ત્વા ચાપત્રિશૂલાદીન્ભક્ત્યા શ્રીનાથમબ્રવીત્

શંકર ઉવાચ -
ૐ અવિનયમપનય વિષ્ણો દમય મનઃ શમય વિષયમૃગતૃષ્ણામ્ ॥
ભૂતદયાં વિસ્તારય તારય સંસારસાગરતઃ

દિવ્યધુનીમકરંદે પરિમલપરિભોગસચ્ચિદાનંદે ॥
શ્રીપતિપદારવિંદે ભવભયખેદચ્છિદે વંદે

સત્યપિ ભેદાપગમે નાથ તવાહં ન મામકીનસ્ત્વમ્ ॥
સામુદ્રો હિ તરંગઃ ક્વચન સમુદ્રો ન તારંગઃ

ઉદ્‌ધૃતનગ નગભિદનુજ દનુજકુલામિત્ર મિત્રશશિદૃષ્ટે ॥
દૃષ્ટે ભવતિ પ્રભવતિ ન ભવતિ કિં ભવતિરસ્કારઃ

મત્સ્યાદિભિરવતારૈરવતારવતાઽવતા વસુધામ્ ॥
પરમેશ્વર પરિપાલ્યો ભવતા ભવતાપભીતોઽહમ્

દામોદર ગુણમંદિર સુન્દરવદનારવિંદ ગોવિન્દ ॥
ભવજલધિમથનમંદર પરમં દરમપનય ત્વં મે

નારાયણ કરુણામય શરણં કરવાણિ તાવકૌ ચરણૌ ॥
ઇતિ ષટ્પદી મદીયે વદનસરોજે સદા વસતુ

ઇતિ સ્તુતઃ શંકરેણ પ્રીતઃ સંકર્ષણાનુજઃ ॥
પપ્રચ્છ સર્વાભિપ્રાયં નમન્તં ચન્દ્રશેખરમ્

શ્રીકૃષ્ણ ઉવાચ -
કિં કૃતસ્તેઽપરાધો વૈ મત્પુત્રેણ કુબુદ્ધિના ॥
યતસ્ત્વયા હતઃ સંખ્યેઽનિરુદ્ધો મૂર્ચ્છિતઃ કૃતઃ

હતં યદુબલં કસ્માત્કસ્માત્ત્વં ચાગતો રણે ॥
કસ્માદ્યુદ્ધં ચ કૃતવાંસ્તન્મે વ્યાખ્યાતુમર્હસિ

ઇત્થં શ્રીકૃષ્ણવચનં નિશમ્ય પ્રમથેશ્વરઃ ॥
ઉવાચ લજ્જિતો ભૂત્વા વિચાર્ય મધુસૂદનમ્

શંકર ઉવાચ -
દેવદેવ જગન્નાથ રાધિકેશ જગન્મય ॥
પાહિ પાહિ કૃપાકારિન્નિસ્ત્રપં માં કૃતાગસમ્

ત્વં ન જાનાસિ કિં દેવ કથયિષ્યામિ કિં ત્વહમ્ ॥
ભક્તસ્ય પાલનં કર્તું માયયા તવ મોહિતઃ

અહમાગતવાન્દેવ ત્વં સર્વં ક્ષંતુમર્હસિ ॥
શાસ્તાહં સર્વલોકસ્ય માનાદિતિ મયા હરે

મારિતાઃ સંગરે શૂરા વૃષ્ણયઃ કૃષ્ણદેવતાઃ ॥
તસ્માત્સંતઃ સ્વયં ત્યક્ત્વા પરમૈશ્વર્યમીપ્સિતમ્

ધ્યાયંતે સતતં કૃષ્ણપાદાબ્જં તે નિરાપદમ્ ॥
સુખં દુઃખં નૃણાં તાવદ્યાવત્કૃષ્ણે ન માનસમ્

કૃષ્ણે મનસિ સઞ્જાતે ભેત્તિ ખડ્ગો દુરત્યયઃ ॥
નરાણાં કર્મવૃક્ષાણાં મૂલચ્છેદં કરોતિ યઃ

મદ્‌ભક્તિબલદર્પિષ્ઠા મત્પ્રભું ત્વાં યદૂત્તમમ્ ॥
ન મન્યંતે ચ તે સર્વે યાસ્યંતિ નિરયં ધ્રુવમ્

ઇત્યુક્ત્વા શંકરસ્તૂષ્ણીં ભૂત્વા કૃષ્ણસ્ય પાદયોઃ ॥
પપાત દંડવદ્‌ભક્ત્યા હ્યશ્રુપૂર્ણાકુલેક્ષણઃ

ઉત્થાપ્યાશ્વાસ્ય તં રુદ્રં પાર્શ્વતસ્તત્પ્રદર્શનાત્ ॥
મિલિત્વા ભગવાન્કૃષ્ણ આલુલોક સુધાર્દ્રદૃક્

આહ કૃષ્ણઃ સુરાઃ સર્વે કુર્વંતિ ભક્તપાલનમ્ ॥
ત્વયા જુગુપ્સિતં કર્મ કિં કૃતં ભક્તપાલને

મમાસિ હૃદયે ત્વં તુ ભવતો હૃદયે હ્યહમ્ ॥
આવયોરંતરં નાસ્તિ મૂઢાઃ પશ્યંતિ દુર્દ્ધિયઃ

ત્વાં નમંતિ ચ મદ્‌ભક્તાસ્ત્વદ્‌ભક્તા માં સદાશિવ ॥
યે ન મન્યંતિ મદ્વાક્યં યાસ્યંતિ નરકં ચ તે

ઇત્યુક્ત્વા ભગવાન્કૃષ્ણો હતં પુત્રં સુનન્દનમ્ ॥
દૃષ્ટ્યા પીયૂષવર્ષિણ્યા જીવયામાસ સંયુગે

તત્પશ્ચાદનિરુદ્ધસ્ય હૃદયાચ્છૂલમેવ ચ ॥
શનૈઃ શનૈઃ સમાકૃષ્ય જીવયામાસ તં હરિઃ

તત્પશ્ચાદ્યાદવાન્સર્વાન્નિહતાન્સંયુગે ભૃશમ્ ॥
અજીવયત્સુધાદૃષ્ટ્યા કૃષ્ણસ્તુ પ્રભુરીશ્વરઃ

તાવત્સદુંદુભિરવં પુષ્પવૃષ્ટિં દિવૌકસઃ ॥
ઉત્સાહલક્ષણાં ચક્રુઃ પ્રસાદ્ય ગરુડધ્વજમ્

પ્રભું ત્રૈલોક્યનેતારં કૃષ્ણં દૃષ્ટ્વા યદૂત્તમાઃ ॥
ઉત્થાય સંભ્રમાચ્ચક્રુર્જયારાવં મુદાન્વિતાઃ

અથોત્થિતો બલ્વલસ્તુ મહાદેવન રક્ષિતઃ ॥
ક્વ ગતશ્ચાનિરુદ્ધો વૈ બ્રુવન્વાક્યં રુષાન્વિતઃ

તતઃ શર્વેણ દૈત્યસ્તુ બોધિતો વચનૈઃ શુભૈઃ ॥
જ્ઞાત્વા કૃષ્ણસ્ય માહાત્મ્યં મુદિતોઽભૂન્મહામનાઃ

તતઃ પ્રણમ્ય ગોવિંદં સ્તુત્વા દૈત્યસ્તુ બલ્વલઃ ॥
તુરગં પ્રદદૌ રાજન્બહુદ્રવ્યેણ સંયુતમ્

તતો યજ્ઞહયં નીત્વા પુત્રપૌત્રસમન્વિતઃ ॥
સેતુમાર્ગેણ કૃષ્ણસ્તુ પ્રયયૌ પશ્ચિમાં દિશમ્

કૃષ્ણે ગતે ભગવતિ રાજ્યે સંસ્થાપ્ય બલ્વલમ્ ॥
કૈલાસં પ્રયયૌ રુદ્રઃ સગણસ્તુ સભૈરવઃ

એતત્કૃષ્ણચરિત્રં તુ યે શૃણ્વન્તિ ગૃહે જનાઃ ॥
તેષાં સહાયં ભગવાન્કરિષ્યતિ સદા હરિઃ

ઇતિ શ્રીગર્ગસંહિતાયાં હયમેધખણ્ડે
ઽનિરુદ્ધવિજયવર્ણનં નામૈકોનચત્વારિંશોઽધ્યાયઃ

હરિઃ ૐ તત્સત્ શ્રીકૃષ્ણાર્પણમસ્તુ ॥
વર્ગઃગર્ગ સંહિતા