ધ્વન્યાલોક (ટીકા સહિત) · ભાગ 561561

અત ઇત્યુભયત્ર પૂર્વેણ સમ્બન્ધઃ ।
અથ પરમમાહેશ્વરો ગ્રન્થકારો ગ્રન્થાન્તે પરમશિવાનુસન્ધાનાત્મકં પરમમઙ્ગલમનુતિષ્ઠન્નાહ---વસ્તુત ઇત્યાદિ ।
જનસ્ય હૃદિ હૃદયે વસ્તુતઃ શિવમયે સતિ શિવમયે હૃદીતિ વા યોજના, સર્વતઃ સર્વં વસ્તુ સ્ફુટં શિવમયં વિરાજતે ભાતિ ।
નાશિવમિત્યાદિ ।
ક્વચન ક્વચિદપિ કસ્યચિદ્વચઃ અશિવં ન ભવતિ, કિન્તુ સર્વત્ર શિવમેવ ભવતીત્યર્થઃ ।
અનેન વસ્તુતઃ શિવમયે સ્વસ્ય હૃદયે સર્વં શિવમયં ભાતિ ।
અતસ્સર્વત્રાપિ વિષયે સ્વવચઃ શિવમેવેત્યર્થઃ પ્રદર્શિતઃ ।
તેનેતિ ।
સ્વવચનેનેત્યર્થઃ ।
વ ઇતિ શ્રોતૄનુદ્દિશ્યોક્તિઃ ।
શિવમયી મઙ્ગલમયી દશા ભવેત્ ભવત્વિતિ સર્વં શિવમ્ ।
દેવી વિજયતાં વાણી સમં સત્કવિસૂરિભિઃ ।
હૃદ્યસ્સચેતસાં કાવ્યાલોકશ્ચ સહલોચનઃ ॥ ॥
સર્વવિદ્યાબ્ધિરાજર્ષિમહાગોશ્રીભૃદાદિતઃ ।
વિરુદં યસ્સહૃદયતિલકાદ્યમવાપ્તવાન્ ॥ ॥
સમ્માનિતશ્ચાઙ્ગલશ્રીચક્રવર્તિસુતે નયઃ ।
શાકુન્તલાદિ યો વ્યાખ્યાદ્ગોશ્રીશાદિગુરુશ્ચ યઃ ॥ ॥
શાસ્ત્રસાહિત્યવિન્મૌલિઃ પરીક્ષિદુપનામકઃ ।
સુહૃત્સતીર્થ્યો ગોશ્રીશો યસ્યાલમ્બો ઽસ્તિ સર્વતઃ ॥ ॥
રામાખ્યષ્ષારકસ્સો ઽહમકાર્ષં ટિપ્પણીમિમામ્ ।
ઇષ્વગ્નિખેષુ કલ્યબ્દે બાલાનામસ્ત્વિયં પ્રિયા ॥ ॥
પ્રૌઢં ક્વ લોચનં ક્વાહં મન્દધીર્બહુધાત્ર તત્ ।
ટિપ્પણ્યાં સ્ખલિતાનિ સ્યુસ્તદિયં શોધ્યતાં બુધૈઃ ॥
ઇતિ શ્રીસહૃદયતિલક પણ્ડિતરાજ બિરુદદ્વયશાલિના રામનામ્ના શારકેણ વિરચિતાયાં કાવ્યાલોકલોચનટિપ્પણ્યાં બાલપ્રિયાખ્યાયાં ચતુર્થ ઉદ્યોતઃ સમાપ્તો ઽયં ગ્રન્થઃ ॥